Pajlug - Đoạn 1

1. Cov lug nuav yog Tavi tug tub Xalaumoo kws yog cov Yixayee tug vaajntxwv le paaj lug

2. ua kuas tau tswvyim hab paub kevcai ua neej, hab to taub tej lug txawj ntse,

3. khaws tej lug qhuab qha kws qha kev thoob tswb to nrog hab kev txav txem ncaaj hab kev ua ncaaj hab qhov kws ua ncaaj nruab nraab,

4. muab txujkev thoob tswb to nrog rua tug kws tsw paub qaabhau, muab kev txawj ntse hab kev paub txhwj paub txhua rua tug hluas.

5. Tug txawj ntse tau nov hab tsaav kev paub rua nwg, hab tug kws thoob tswb to nrog yuav tau peevxwm ua num,

6. sub txhad nkaag sab paaj lug pev lug, hab nkaag sab cov txawj ntse tej lug hab tej txhaj mim txwv.

7. Qhov kws fwm hab paub ntshai Yawmsaub yog lub hauv paug txawj ntse, tug ruag yeej saib tsw taug tswvyim hab tej lug qhuab qha.

8. Kuv tub 'e, ca le noog koj txwv tej lug qhuab qha, hab tsw xob muab koj nam tej lug qha tso tseg,

9. tsua qhov tej lug hov yog lub mom paaj ntoos zoo nkauj sau koj taubhau hab yog tej saw nyaj ntawm koj cej daab.

10. Kuv tub 'e, yog tej tuabneeg muaj txem ntxag koj, tsw xob yeem moog.

11. Yog puab has tas, “Nrug peb moog, ca peb moog zuv kev tog tua tuabneeg, ca peb moog zuv kev tog tug kws tsw ua txhum muab ntaus ua sw.

12. Ca peb muab nwg nqog caj yaam le tub tuag teb, hab nqog kheej ib yaam le puab cov kws nqeg rua huv qhov tuag.

13. Peb yuav tau tej hov txhua chaw tswm txaj txhua yaam, peb yuav muab tej kws peb txeeb tau lug ntim puv nkaus huv peb tej tsev.

14. Koj ca le nrug peb koom, peb suavdawg yuav koom ib lub naas nyaj.”

15. Kuv tub 'e, tsw xob nrug puab moog, yuav tsum tswj koj txhais kwtaw ntawm puab txujkev,

16. tsua qhov puab txhais kwtaw dha moog ua phem, hab puab maaj nroog moog txuv luas lug ntshaav.

17. Cuab vaag rua noog pum yeej tsw tau qaabhau.

18. Tassws cov tuabneeg nuav nyaag zuv tog puab tug kheej le ntshaav, hab zuv kev txuv puab txujsa.

19. Txhua tug kws ua nruj ua tswv es tau nyaj txag yeej yuav zoo le nuav, tej nyaj txag hov yuav rov txuv puab txujsa.

20. Tswvyim hu nrov nrov ntawm tej kev, nwg tsaa suab hu ntawm tshaav puam.

21. Nwg tuaj sau tej ntsaa loog hu hab pav ntawm rooj loog kws nkaag rua huv lub nroog, has tas

22. “Mej cov kws tsw thoob tswb 'e, mej yuav nyam txujkev tsw thoob tswb moog ntev le caag? Hab cov kws thuaj luas yuav zoo sab thuaj moog ntev le caag? Hab cov kws ruag yuav ntxub kev txawj ntse ntev le caag?

23. Mej ca le tig qhov ntsej noog kuv tej lug qhuab ntuag. Saib maj, kuv yuav nchuav tej kws kuv xaav huv lub sab rua mej, kuv yuav muab kuv tej lug qha tseeb rua mej.

24. Kuv tub hu los mej tsw yeem noog, kuv tub cev teg los tsw muaj leejtwg quav ntsej,

25. hab mej tsw yeem txais yuav kuv tej lug taw qha, hab tsw yeem yuav kuv tej lug qhuab ntuag hlo le.

26. Vem le nuav kuv yuav luag qhov kws mej raug kev puam tsuaj, hab kuv yuav luag rua thaus kws mej ntshai raag zum zawg,

27. hab thaus kev ntshai raag lug raug mej zoo yaam nkaus le cua daaj cua dub, hab kev puam tsuaj lug raug mej yaam le khaub zeeg cua, hab thaus kev txom nyem kev nyuaj sab lug raug mej.

28. Mas puab yuav thov kuv los kuv yuav tsw teb. Puab yuav swv zug nrhav kuv tassws nrhav tsw tau.

29. Vem puab ntxub kev txawj ntse hab tsw xaiv yuav qhov kws fwm hab paub ntshai Yawmsaub,

30. hab puab tsw yuav kuv tej lug taw qha hlo le hab saib tsw taug kuv tej lug qhuab ntuag huvsw,

31. vem le nuav puab yuav saws lawv le tej kws puab ua, hab puab tej tswvyim ua phem rua luas yuav rov raug puab pov khawv nkaus.

32. Cov tuabneeg tsw thoob tswb raug tua vem yog puab tsw quav ntsej tej lug qha, hab cov tuabneeg ruag raug puam tsuaj vem yog ua laag ua taa.

33. Tassws tug kws noog kuv yuav nyob tso sab plhuav, hab yuav nyob kaaj sab lug tsw txhawj tsw ntshai ib yaam kev phem hlo le.”