Cov Thawjtswj - Đoạn 5

1. Ntenpaula hab Anpinau‑aa tug tub Npala hu zaaj nkauj rua nub hov tas,

2. “Ca le qhuas Yawmsaub, tsua qhov Yixayee cov thawj xub nqeg teg hab cov pejxeem tau xyiv faab xyiv yeem paab.

3. Au tej vaajntxwv, ca le noog. Tej thawj, ca le tig ntsej noog. Kuv yuav hu nkauj rua Yawmsaub, kuv seev suab hu nkauj rua Yawmsaub kws yog Yixayee tug Vaajtswv.

4. “Au Yawmsaub, thaus koj tawm ntawm Xe‑i moog ua rog, thaus koj taug kev tawm Entoo tebchaws moog, lub nplajteb kuj ua zug quas kais, lub ntuj tso naag lug, tej fuab tso naag lug tuam tsaam.

5. Tej roob kuj ua zug quas kais rua ntawm Yawmsaub xubndag, yog Xinai tug Vaajtswv, yog Yawmsaub kws yog Yixayee tug Vaajtswv.

6. “Ntu kws Anav tug tub Saaka nyob hab ntu kws Ya‑ee nyob, tej kev luj tsw muaj tuabneeg taug, cov kws moog moog lug lug tsuas taug miv kev xwb.

7. Tej tub qoob tub loos huv Yixayee tebchaws kuj tseg tsw ua teb lawm, tsw ua moog txug thaus kuv, Ntenpaula sawv lug kaav, txug thaus kuv sawv lug ua nam huv Yixayee tebchaws.

8. Thaus xaiv tej daab tshab lug teev kev ua rog kuj tuaj txug ntawm rooj loog. Yeej tsw pum ib daim hlau thaiv ua rog hab ib raab muv rua huv plaub vaam tug tub rog huv Yixayee le.

9. Kuv lub sab dai quas dhuas Yixayee cov thawj, hab cov pejxeem kws xyiv faab xyiv yeem moog paab. Ca le qhuas Yawmsaub.

10. “Mej cov kws caij tej neeg luav dawb, cov kws nyob sau ntaub pua eeb neeg hab cov kws xuas kwtaw taug kev ca le has zaaj nuav.

11. Ca le noog zaaj lug txaj kws has ntawm qhov dej. Puab has txug qhov kws Yawmsaub kov yeej, has txug nwg cov tub qoob tub loos Yixayee kov yeej. “Thaus hov Yawmsaub cov tuabneeg kuj moog ua ib txwg ib txwg rua ntawm rooj loog.

12. ‘Ntenpaula, ca le tswm lug, tswm lug. Ca le tswm lug tswm lug hu nkauj. Npala ca le sawv tseeg, Anpinau‑aa tug tub, ca le coj cov kws koj nteg tau moog.’

13. Thaus hov cov kws muaj meej kws tseed tshuav nyob nqeg lug, Yawmsaub cov pejxeem nqeg lug nrug kuv ua rog rua cov kws muaj zug heev.

14. Cov kws cog caag rua huv Amalej tau nqeg peg Efa‑i lug. Npeeyamee, puab lawv koj hab koj cov kwvtij qaab. Cov thawj nqeg ntawm Makhi lug hab cov kws coj tug cwj thawj rog tawm huv Xenpuloo lug.

15. Ixakha cov kws ua thawj kuj nrug Ntenpaula lug, Ixakha kuj nrug Npala lug. Puab lawv nwg qaab dha moog rua huv lub haav. Xeem Lunpee cov quas cum sab faab tsw txawj ua txuj twg.

16. Ua le caag mej nyob ntawm nkuaj yaaj tog, noog lub suab raaj kws tshuv rua yaaj xwb? Xeem Lunpee cov quas cum sab faab tsw txawj ua txuj twg.

17. Kile‑a kuj nyob saab dej Yalatee nub tuaj. Ntaaj nyob daabtsw ntawm lub nkoj txwg? Asaw nyob tuabywv ntawm ntug havtxwv, nyob tuabywv huv tej tsev ntawm tshaav nkoj.

18. Xenpuloo yog cov kws zoo sab tso nyog txujsa moog paab. Nathali kuj ib yaam nkaus rua huv tej tshaav rog peg toj sab.

19. “Cov vaajntxwv tuaj, puab tuaj ua rog, cov Khana‑aa tej vaajntxwv ua rog ntawm Tha‑ana ntawm ntug dej Mekintau. Puab tsw txeeb tej nyaj txag le.

20. Tej nub qub sau ntuj kuj ua rog, tej nub qub kuj tuaj sau ntuj ua rog rua Xixela.

21. Tug nam dej Khisoo kuav puab moog, yog tug nam dej Khisoo kws hlub kawg le. Kuv lub sab, ca le taug kev moog tuaj zug moog.

22. Lub suab neeg dha rau nrov quas dawg, yog cov neeg dha noj tuam pwm.

23. Yawmsaub tug tubkhai ntuj has tas, ‘Ca le tsawm foom Melau, ca le foom nyaav kawg rua cov tuabneeg huv lub moos hov vem yog puab tsw tuaj paab Yawmsaub, tsw paab Yawmsaub ua rog rua cov kws muaj zug.’

24. “Ca Ya‑ee tau moov zoo tshaaj plawg tej quaspuj huvsw, nwg yog Henpaw kws yog tuabneeg Khenai tug quaspuj. Ca nwg tau moov zoo tshaaj plawg tej quaspuj kws nyob huv tsev ntaub huvsw.

25. Xixela thov dej haus, mas nwg pub nyuj mig, nwg muab kua mig nyeem rua huv lub phaaj kws yog cov thawj swv cev rua Xixela.

26. Nwg txawm cev teg muab tug tswg tsev ntaub hab nwg txhais teg xws tuav tug paam thawj kws cov ua num swv. Nwg ntaus Xixela ib teg, nwg tsoo Xixela taubhau, nwg tsoo taubhau tawg taag, nwg nkaug xub ntsus tshaab plhawv.

27. Xixela qaug, nwg qaug ntawg, nwg xyaab leeg ntawm tug quaspuj txhais kwtaw, nwg qaug quas lag rua ntawm tug quaspuj hov kwtaw, nwg qaug ntawg, nwg qaug rua hovtwg nwg tuag hov ntawd.

28. “Leej nam saib qhov rais ntsoov, Xixela nam saib qhov rais ntsoov has tas, ‘Ua caag nwg tsheb ua rog yuav lug qeeb ua luaj? Ua caag tej neeg hai tsheb yuav lug qeeb kawg?’

29. Tej quaspuj kws ntse teb nwg, lossws nwg teb nwg has tas,

30. ‘Yog puab tseed tshawb nrhav hab faib tej hov txhua chaw kws txeeb tau lug kab, yog faib ib tug lossws ob tug hluas nkauj rua ib tug quasyawg, hab faib tej ntaub kws raus zoo zoo rua Xixela, hab faib tej daim paaj ntaub kws raus zoo zoo hab tej daim paaj ntaub zoo nkauj rua kuv qhwv ntawm cej daab, coj lug ua puab tug.’

31. “Au Yawmsaub, ca kuas koj cov yeeb ncuab huvsw puam tsuaj ib yaam nkaus le nuav. Ca tug kws nyam koj zoo yaam nkaus le lub nub thaus kws tawm tuaj muaj fwjchim ci quas nplaag.” Mas lub tebchaws txhad tau su tsw ua rog plaub caug xyoo.