Nkauj Quaj Ntsuag - Đoạn 5

1. Au Yawmsaub, thov ncu txug tej xwm txheej kws raug peb lawm, thov tsaa muag saib peb txujkev txaaj muag.

2. Peb tej qub txeeg qub teg raug poob rua luas lawm, peb tej vaaj tse ua lwm haiv tuabneeg le lawm.

3. Peb yog mivnyuas ntsuag tsw muaj txwv, peb nam zoo yaam nkaus le tej puj ntsuag.

4. Peb yuav tsum yuav dej haus hab yuav tsum yuav tawg rauv.

5. Peb kwv tug quab ntawm caaj qwb raug luas lawv, peb txhad qaug zug, hab luas tsw kheev peb su hlo le.

6. Peb tsaa teg thov cov Iyi hab cov Axilia sub peb txhad tau mov noj txaus.

7. Peb tej laug tau ua txhum, hab dua taag lawm, peb txhad tau rws puab tej kev txhum txem.

8. Tej qhev sawv lug kaav peb, tsw muaj leejtwg paab peb dim puab txhais teg.

9. Peb sev nyog txujsa tiv txhad tau mov noj, vem yog tej nav ntaaj huv tebchaws moj saab qhua.

10. Peb lub cev kub npaum nkaus le cub suavtawg, vem kev tshaib kev nqhes ua rua peb mob kub quas lawg.

11. Tej quaspuj raug luas yuam pw huv Xi‑oo, tej ntxhais hluas kws dawb huv raug luas yuam pw huv Yuta tej moos.

12. Cov thawj raug muab khi teg dai, luas tsw fwm tej kev txwj quas laug.

13. Tej tub hluas raug quab yuam zum zeb, tej mivnyuas tub kwv tawg qaug qos nuag.

14. Cov kev txwj quas laug pluj taag ntawm tej rooj loog lawm, cov tub hluas tseg tsw ntaus nkauj nog ncaas lawm.

15. Txujkev zoo sab pluj taag huv peb lub sab lawm, peb tej kev seev cev ntxeev ua kev quaj ntsuag lawm.

16. Lub mom kub hle sau peb taubhau lawm, peb raug txom nyem lauj, vem yog peb tau ua txhum.

17. Tim le nuav peb lub sab txhad mob heev, vem yog tej nuav peb lub qhov muag txhad plooj taag,

18. yog tim lub roob Xi‑oo kws nyob do cuas ca, tej maa moog moog lug lug rua sau.

19. Au Yawmsaub, koj yog tug kws kaav moog ib txhws, koj lub zwm txwv nyob ruaj rua txhua tam.

20. Ua caag koj nov qaab peb moog ib txhws le? Ua caag koj tso peb tseg ntev le nuav?

21. Au Yawmsaub, thov coj peb rov lug cuag koj, peb txhad lug cuag koj, Thov koj tsaa peb lub neej kuas rov zoo le yaav thau.

22. Ntshai tsuas yog koj muab peb tso pov tseg hlo le lawm hab koj npau tawg rua peb kawg nkaus le lawm.