Nkauj Quaj Ntsuag - Đoạn 3

1. Kuv yog tug kws raug kev txom nyem nyuaj sab vem yog Vaajtswv txujkev npau tawg raab nplawm.

2. Nwg lawv kuv hab coj kuv moog rua huv txujkev tsaus ntuj, kws tsw muaj qhov kaaj hlo le.

3. Nwg yeej tsaa nwg txhais teg nplawm kuv nplawm taag rov nplawm thab taag nub moog le.

4. Nwg ua rua kuv cev nqaj daim tawv sem taag, hab muab kuv tej pob txhaa luv.

5. Nwg muab kuv xov kaw ca, hab muab kev ab sab kev txom nyem xov kuv ca.

6. Nwg muab kuv yuam nyob qhov tsaus ntuj, ib yaam le tug kws tuag ntev lug lawm.

7. Nwg xov laj kaab vej kuv ca kuv txhad dim tsw tau, nwg muab saw hlau nyaav khi kuv ca.

8. Thaus kuv tsaa suab taij hu thov nwg paab, los nwg tsw quav ntsej kuv tej lug thov.

9. Nwg muab tej txhwb zeb kws txhwm lug thaiv kuv txhua txuj hauv kev, nwg ua rua kuv txujkev nkhaus moog nkhaus lug.

10. Nwg zoo yaam nkaus le tug dais kws zuv tog kuv, hab zoo yaam nkaus le tug tsuv ntxhuav kws zuv kev tog.

11. Nwg chua kuv tawm ntawm kuv txujkev hab muab kuv dua ua tej dwb daim, nwg ua rua kuv raug muab tso tseg nyob do cuas.

12. Nwg ntaa nwg raab neev, hab muab kuv ua daim phaj rua nwg raab xub.

13. Nwg muab cov xub huv nwg lub raaj tua chob rua huv kuv lub sab.

14. Kuv txhad ua lub chaw kws kuv haiv tuabneeg suavdawg luag, hab ua zaaj nkauj kws puab hu thuaj luag taag naj taag nub.

15. Nwg ua rua kuv ab sab kawg nkaus, hab muab zaub ab zaub daw rua kuv noj dhuav taag.

16. Nwg muab tswg zeb rua kuv cov nav ntsuas hab muab kuv nas rua huv cub tshau.

17. Txujkev kaaj sab lug raug muab rhu ntawm kuv tug ntsuj plig lawm, kuv tsw ncu qaab tas kev zoo sab xyiv faab yog zoo le caag lawm.

18. Kuv txhad has tas, “Kuv lub koob meej pluj taag lawm, hab kuv txujkev vaam rua Yawmsaub kuj pluj taag lawm.”

19. Thov ncu txug kuv tej kev txom nyem lwj sab hab qhov kws raug tswv rua hov u hov nua, kws ab cuag le tej zaub ab zaub daw hab tswb dais.

20. Kuv tug ntsuj plig pheej ncu txug tej hov, hab poob sab quas zog.

21. Kuv rov ncu txug le nuav, kuv txhad muaj lub sab vaam tuaj has tas,

22. Yawmsaub txujkev hlub kws ruaj khov yuav tsw tu ncua, hab nwg tej kev khuvleej tsw muaj chaw kawg,

23. naj taagkig rov muaj dua tshab. Koj txujkev ua ncaaj kws tso sab tau yeej luj kawg.

24. Kuv tug ntsuj plig has tas, “Yawmsaub yog kuv tug, vem le nuav kuv txhad le vaam ntsoov nwg.”

25. Yawmsaub yeej ua zoo rua cov kws tog rawv nwg, hab ua zoo rua tug ntsuj plig kws nrhav nwg.

26. Qhov kws zoo yog qhov kws ua sab ntev tog Yawmsaub txujkev cawm dim.

27. Qhov kws zoo yog qhov kws tuabneeg kwv tug quab txwj thaus yau lug.

28. Ca puab nyob ib leeg ntsag tu rua thaus Yawmsaub muab tug quab rua puab.

29. Ca puab muab lub qhov ncauj twb nkaus rua huv aav, tej zag tseed yuav muaj vaam.

30. Ca puab tig plhu rua tug kws ntaus puab, ca puab yeem raug luas thuaj kawg nkaus.

31. Vem tas tug Tswv yuav tsw muab puab pov tseg moog ib txhws,

32. Txawm yog nwg ua rua raug kev lwj sab, los nwg yuav khuvleej, lawv le nwg txujkev hlub ruaj khov kws muaj nplua quas mag.

33. Vem yog nwg tsw muaj pluaj sab ua rua leejtwg raug kev txom nyem, lossws ua rua tuabneeg raug kev ntxhuv sab.

34. Qhov kws muab cov tuabneeg kws raug nteg thoob nplajteb tsuj yuam rua huv xwb taw kuj yog,

35. qhov kws ntxeev tuabneeg txujcai taab meeg Vaajtswv tug kws luj dua ndais kuj yog,

36. qhov kws tu plaub tsw ncaaj kuj yog, tej nuav tug Tswv tsw pum lov?

37. Leejtwg yog tug kws has hab ua kuas tav, tsuas yog tug Tswv tso ncauj txhad ua tau xwb?

38. Qhov zoo hab tej xwm txheej phem tsw yog tawm huv Vaajtswv kws luj dua ndais lub qhov ncauj lug lov?

39. Ua caag cov tuabneeg kws tseed caj yuav ywg txug qhov kws nwg raug teem txem vem nwg kev txhum?

40. Ca peb tshuaj ntsuag saib peb lub neej hab tig hlo rov lug cuag Yawmsaub.

41. Ca peb muab peb lub sab hab peb txhais teg tsaa rua Vaajtswv kws nyob sau ntuj.

42. “Peb tau faav xeeb hab kwv tawv koj hab koj tsw tau zaam peb lub txem.

43. “Koj muab koj txujkev chim lug qhwv koj hab lawv caum peb, hab muab tua tsw taab ncuab le.

44. Koj muab fuab lug qhwv koj, sub peb tej lug thov txhad txeem tsw tau moog txug koj.

45. Koj ua rua peb zoo yaam nkaus le tej tshwj xuam hab tej kws qas rua huv plawv ib tsoom tuabneeg.

46. “Peb tej yeeb ncuab suavdawg qheb ncauj tshev peb.

47. Txujkev txhawj kev ntshai hab qhov ntuj lug txug peb, hab kev lamswm hab kev puam tsuaj lug raug peb.”

48. Kuv lub qhov muag muaj kua muag ndwg lug ua ib tug nam dej, vem kuv haiv tuabneeg tug ntxhais raug kev puam tsuaj.

49. Kuv tej kua muag ndwg tsw tu, hab ndwg tsw su le,

50. moog txug thaus Yawmsaub tsaa qhov muag saib sau ntuj tuaj.

51. Kuv lub qhov muag ua rua kuv lwj sab txug tej xwm txheej kws raug kuv lub nroog tej ntxhais suavdawg.

52. Cov kws ca le ua yeeb ncuab rua kuv do do xwb, puab lawv kuv ib yaam le lawv noog.

53. Thaus kuv tseed caj sa puab muab kuv laim rua huv lub qhov taub hab puab nrum pob zeb lug tsuam kuv.

54. Dej nyaab hlo kuv taubhau, kuv has tas, “Kuv pluj tag tag le lauj!”

55. Au Yawmsaub, kuv hu koj lub npe rua thaus kuv nyob huv lub qhov tub tub.

56. Koj noog kuv tej lug kws thov has tas, “Thov tsw xob ntsaws koj qhov ntsej rua tej lug kws kuv quaj thov koj paab.”

57. Koj tuaj ze rua thaus kws kuv hu thov koj. Koj has tas, “Tsw xob ntshai.”

58. Au tug Tswv, koj has kuv tshaaj plaub lawm, koj txhwv kuv txujsa.

59. Au Yawmsaub, koj pum qhov kws puab ua txhum rua kuv lawm, thov tu kuv tshaaj plaub lauj!

60. Koj pum txhua yaam kws puab ua limham rua kuv lawm, hab tej kws puab tuav huv ua phem rua kuv huvsw.

61. Au Yawmsaub, koj nov tej lug kws puab thuaj luag kuv, hab tej kws puab tuav huv ua phem rua kuv huvsw.

62. Tej kws kuv cov yeeb ncuab lub qhov ncauj has hab tej kws puab tuav huv mas tawm tsaam kuv taag nub le.

63. Saib maj, tsw has puab nyob lossws sawv ntsug, puab muab kuv ua zaaj nkauj hu thuaj luag.

64. Au Yawmsaub, koj ca le ua pauj rua puab lawv le puab txhais teg tau ua lawm.

65. Ca le ua rua puab lub sab tsaus ntuj nti, ca koj tej lug foom tsw zoo poob rua sau puab.

66. Ca le lawv cuag puab ua chim kawg, hab muab puab ua kuas puam tsuaj taag rua huv Yawmsaub lub qaab ntuj.