Amaus - Đoạn 6

1. Cov kws nyob tsw txob tsw txhawj huv Xi‑oo, hab cov kws nyob tso sab plhuav sau lub roob Xamali, yuav raug txom nyem lauj! Puab yog cov kws muaj meej thawb huv lub tebchaws kws ua thawj, kws cov Yixayee tuaj vaam khom.

2. Ca le moog tshuaj saib lub moos Khanej, hab tawm hov ntawd moog rua lub moos luj Hama, le moog rua nraag lub moos Ka huv cov Filixatee tebchaws. Tej moos hov zoo dua lub tebchaws kws mej kaav nuav lov? Puab lub tebchaws daav dua mej lub tebchaws lov?

3. Mej taav nub kws phem hov kuas nyob deb, tassws mej coj lub zwm txwv kws ua limham ndais ntuj lug ze.

4. Cov kws pw sau lub txaaj kaug ntxhw hab nyob xyaab leeg sau lub rooj ntev, hab noj tej mivnyuas yaaj huv paab yaaj hab noj tej mivnyuas nyuj huv nkuaj, yuav raug txom nyem lauj!

5. Puab hu nkauj ua sw ntxuag suab nkauj nog ncaas, hab ntaus tej suab nkauj phim tej nkauj tshab ib yaam le Tavi.

6. Puab haus hlo tej nam phaaj cawv txwv maab hab muab tej roj zoo zoo pleev puab lub cev, tassws puab tub tsw quaj ntsuag txug qhov kws Yauxej raug puam tsuaj.

7. Vem le nuav puab yuav ua thawj paab kws poob tebchaws, hab qhov kws puab paam noj paam haus pw xyaab leeg yuav pluj plag moog.

8. Vaajtswv Yawmsaub tau tuav nwg lub npe cog lug twv. Vaajtswv Yawmsaub kws muaj fwjchim luj kawg nkaus has tas, “Kuv dhuav qhov kws Yakhauj khaav theeb, hab ntxub nwg tej chaw ruaj khov. Kuv yuav muab lub nroog nuav hab txhua yaam kws nyob huv cob rua yeeb ncuab.”

9. Yog huv tsev tshuav kaum leej nyob xwb, puab yuav tuag taag huvsw.

10. Thaus leejtwg le kwvtij tuaj muab tej cev tuag hlawv es yuav nqaa tej pob txhaa tawm huv tsev, hab has rua tug kws nyob chaav huv plawv lub tsev hov tas, “Puas tshuav leejtwg nrug koj nyob hab?” tug hov yuav teb tas “Tsw tshuav.” Mas nwg yuav has tas, “Nyob tuabywv, tsw xob has txug Yawmsaub lub npe hlo le.”

11. Saib maj, Yawmsaub yeej has ca lawm, mas tej vaaj tse luj yuav raug muab tsoo tawg ua tej dwb daim, hab tej tsev miv yuav tawg mog quas nyoos.

12. Neeg dha sau tej roob tsuas lov? Muaj leejtwg muab nyuj laij dej havtxwv lov? Mej muab txujkev ua ncaaj ntxeev ua tshuaj lom muaj taug, hab muab qhov kws ua ncaaj nceeg ntxeev ua cov tshuaj ab.

13. Mej zoo sab xyiv faab rua huv lub moos Launtenpa, hab has tas, “Qhov kws peb txeeb tau lub moos Khana‑i lug rua peb, tsw yog swv peb tug zug lov?”

14. Vaajtswv Yawmsaub kws muaj fwjchim luj kawg nkaus has tas, “Yixayee caaj ceg 'e, saib nawj, kuv yuav tsaa ib haiv tuabneeg sawv tawm tsaam mej, mas puab yuav quab yuam mej txwj ntawm txujkev kws nkaag moog rua huv lub moos Hama moog txug lub haav Alanpa.”