Amaus - Đoạn 2

1. Yawmsaub has le nuav tas, “Qhov kws cov Mau‑a ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab muab cov Entoo tug vaajntxwv tej pob txhaa hlawv ua moov swb.

2. Vem le nuav kuv yuav tso suavtawg lug rua sau cov Mau‑a, mas suavtawg yuav kub lub moos Kheli‑au tej chaw ruaj khov, hab cov Mau‑a yuav tuag rua huv tej suab ua nqaaj ua nqug hab rua thaus muaj suab qw ua rog hab suab raaj kub yaaj nrov.

3. Kuv yuav muab tug kws ua thawj kaav rhuav tshem tawm huv puab moog, hab yuav tua cov thawj huv lub tebchaws hov suavdawg nrug nwg ua ke.” Yawmsaub has le nuav ntaag.

4. Yawmsaub has le nuav tas, “Qhov kws cov Yuta ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab muab Yawmsaub txuj kevcai tso tseg, hab puab tsw tuav rawv nwg tej kaab ke. Puab noog tej lug daag moog yuam kev ib yaam le puab tej laug.

5. Vem le nuav kuv yuav tso suavtawg lug rua sau Yuta, mas suavtawg yuav kub Yeluxalee tej chaw ruaj khov.”

6. Yawmsaub has le nuav tas, “Qhov kws cov Yixayee ua txhum peb zag taag los ua plaub zag thab, kuv yuav tsw tso qhov kws rau txem tseg le, tsua qhov puab muab cov tuabneeg ncaaj nceeg muag yuav nyaj, hab muab cov tuabneeg tu pluag muag yuav ib nkawm khau.

7. Puab tsuj tej tuabneeg pluag lub taubhau rua huv cov moov aav, hab muab cov tuabneeg txom nyem nyuaj sab thawb pis ntag moog. Ob txw tub moog deev tuab tug puj, ua qas puag tsuas kuv lub npe kws dawb huv.

8. Puab pw ib saab ntawm txhua lub thaaj xyeem daab pw rua sau tej tsoog tsho kws muab lug yuam nqe. Huv puab tug Vaajtswv lub tuam tsev mas puab haus cawv txwv maab kws yog muab ntawm cov kws raug nplua lug.

9. “Kuv kuj muab cov Amaulai ua puam tsuaj rua ntawm puab hauv ntej, yog cov tuabneeg kws sab yaam le tej ntoo cab, hab khov yaam le tej ntoo qheb. Kuv muab puab tej txwv kws nyob sau hab tej caag kws nyob huv ua puam tsuaj taag huvsw.

10. Kuv kuj coj mej tawm huv Iyi tebchaws lug, hab coj mej huv tebchaws moj saab qhua tau plaub caug xyoo, sub mej txhad tau cov Amaulai lub tebchaws ua mej teej mej tug.

11. Kuv tsaa mej cov tub qee leej ua xwbfwb cev kuv lug, hab tsaa mej cov tub hluas qee leej ua cov Naxi. Cov Yixayee 'e, tej nuav tsw muaj tseeb lov?” Yawmsaub has le nuav ntaag.

12. “Tassws mej tseed yuam cov Naxi haus cawv txwv maab, hab txwv cov xwbfwb cev lug tas, ‘Mej tsw xob cev lug hlo le.’

13. “Saib maj, kuv yuav muab mej nas rua huv mej lub chaw, ib yaam le lub tsheb nyuj kws thauj tej qoob puv nkaus nas rua huv aav.

14. Tug tuabneeg nrawm yuav tsw muaj peevxwm tswv dim lawm, tug tuabneeg muaj zug los yuav tsw muaj zug lawm, tug kws sab luj sab tuab yuav cawm tsw tau nwg txujsa.

15. Tug kws tuav rawv neev yuav sawv tiv tsw tau, tug kws txhais taw nrawm yuav tswv tsw dim, tug kws caij neeg yuav cawm tsw tau nwg txujsa.

16. Tug kws sab luj sab tuab huv cov tub rog, los nub ntawd yuav tswv lab qaab cuas.” Yawmsaub has le nuav ntaag.