2 Xamuyees - Đoạn 22

1. Nub kws Yawmsaub cawm Tavi dim huv nwg cov yeeb ncuab txhais teg huvsw hab dim huv Xa‑u txhais teg lawm, Tavi txhad hu zaaj nkauj nuav rua Yawmsaub.

2. Nwg has tas, “Yawmsaub yog kuv txhwb zeb, yog kuv lub chaw ruaj khov, yog tug kws tso kuv dim,

3. yog kuv tug Vaajtswv, yog txhwb zeb kws kuv lug nraim cev, yog kuv daim phaj hlau, yog txwm kub kws cawm kuv dim, yog kuv lub chaw ruaj khov, yog kuv lub chaw nraim cev, hab yog kuv tug cawmseej. Koj cawm kuv dim tej tuabneeg limham ndais ntuj.

4. Kuv hu rua Yawmsaub tug kws tswm nyog qhuas, mas kuv txhad dim huv cov yeeb ncuab lug.

5. “Tej nthwv dej kws yog kev tuag vej nkaus kuv, txujkev puam tsuaj nyaab hlo kuv,

6. kuv maag txuj hlua kws cuab huv tub tuag teb lawm, rooj ntxab kws yog kev tuag nyob ntawm kuv xubndag.

7. Thaus kuv raug kev txom nyem kuv thov hu Yawmsaub, kuv thov kuv tug Vaajtswv. Nwg nyob huv nwg lub tuam tsev nov kuv lub suab, kuv tej lug thov nrov moog txug nwg qhov ntsej.

8. “Lub nplajteb tseeg quas nkawg ua zug quas kais, tej laag zeb kws tag lub ntuj kuj ndua quas ntxag hab ua zug quas kais vem yog Yawmsaub chim.

9. Paa tawg tawm huv Yawmsaub qhov ntswg lug, hab tej nplaim tawg kub ceev tawm ntawm nwg qhov ncauj lug, thee kuj cig quas plawg tawm lug.

10. Nwg qheb rooj ntug nqeg lug, ntuj tsaus quas nti huv qaab nwg kwtaw.

11. Nwg caij ib tug Khelunpee hab yaa moog yaa lug, pum nwg caij kauj tis cua lug.

12. Nwg muab qhov tsaus ntuj lug vej puag ncig nwg, cov fuab tsaus tsaus vem yog muaj dej ua lub kaus roog nwg.

13. Tej thee ci ua nplaim tawm huv qhov kaaj kws nyob ntawm nwg xubndag lug.

14. Yawmsaub ua xub nrov tseeg quas nkawg sau ntuj, yog tug kws luj dua ndais ua suab nrov.

15. Nwg tua nwg raab xub ua rua puab tswv taag, nwg tso tsag lig xub ua rua puab tawg ua saab ua sua moog.

16. Mas txhad le pum havtxwv ti nkaus qaab thu, hab pum taag nrho tej taw kws tag lub nplajteb nuav, rua thaus Yawmsaub tshev hab tshuab tej paa tawm huv nwg qhov ntswg lug.

17. “Yawmsaub cev teg sau ntuj tuaj ntsab nkaus kuv, nwg nqug kuv tawm huv cov dej tub tub.

18. Nwg cawm kuv dim kuv cov yeeb ncuab kws muaj zug hab dim cov tuabneeg kws ntxub kuv, tsua qhov puab muaj zug luj dua kuv.

19. Nub kws kuv raug kev txom nyem ceblaaj mas puab ca le tuaj tawm tsaam kuv, tassws Yawmsaub ua kuv lub chaw tag taw.

20. Nwg coj kuv tawm moog nyob huv lub chaw daav, nwg tso kuv dim vem nwg zoo sab xyiv faab rua kuv.

21. “Yawmsaub pub moov zoo rua kuv lawv le kuv txujkev ncaaj nceeg. Yawmsaub pauj rua kuv lawv le kuv txhais teg dawb huv.

22. Kuv taug nraim Yawmsaub txujkev hab kuv tsw tau ua qhov phem es tso kuv tug Vaajtswv tseg.

23. Tsua qhov nwg tej kevcai huvsw nyob ntawm kuv xubndag hab kuv tsw tau tig ntawm nwg tej kaab ke hlo le.

24. Kuv tsw muaj ib qho chaw thuaj rua ntawm nwg xubndag, hab kuv tswjfwm kuv tug kheej tsw ua txhum.

25. Vem le nuav Yawmsaub txhad pauj rua kuv lawv le kuv txujkev ncaaj nceeg, hab lawv le nwg pum kuv txujkev dawb huv.

26. “Yawmsaub, koj ua ncaaj rua tug kws xwb rua koj, koj ua koj txujkev zoo kawg nkaus tshwm rua tug kws tsw muaj chaw thuaj le.

27. Koj ua koj txujkev dawb huv tshwm rua tug kws ua dawb huv, koj ua txujkev nkhaus tshwm rua tug kws sab nkhaus.

28. Koj tso cov tuabneeg kws txu fwjchim dim, tassws koj tsom ntsoov ua rua cov kws khaav theeb poob qeg.

29. Au Yawmsaub, koj yog kuv lub teeb, Yawmsaub ua rua kuv qhov tsaus ntuj pum kev.

30. Yog koj paab, kuv yeej ntaus tau ib paab tub rog, yog kuv tug Vaajtswv paab, kuv txhad caws qa hlaa tau ntsaa loog.

31. Tug Vaajtswv nuav, mas nwg txujkev zoo kawg nkaus, Yawmsaub lu lug cog tseg yeej muaj tseeb. Nwg yog daim phaj hlau thaiv txhua tug kws tuaj cawm sav rua huv nwg.

32. “Leejtwg yog Vaajtswv, tsuas yog Yawmsaub xwb? Leejtwg ua txhwb zeb, tsuas yog peb tug Vaajtswv xwb?

33. Vaajtswv yog kuv lub chaw nraim cev kws ruaj khov, hab ua rua txujkev kws kuv taug tso sab plhuav.

34. Nwg ua rua kuv txhais kwtaw zoo yaam nkaus le kwtaw maum muas lwj, hab nwg tso kuv nyob tso sab plhuav sau tej roob sab.

35. Nwg cob kuv txhais teg kuas txawj ua rog, kuv txhais npaab txhad nqug tau neev nti tooj lab.

36. Koj pub daim phaj hlau kws cawm dim rua kuv, hab koj nqeg lug paab ua rua kuv hlub tuaj.

37. Koj pub kuv taug txujkev daav hab kuv txhais taw tsw nplaam.

38. Kuv lawv kuv cov yeeb ncuab hab ua kuas puab puam tsuaj, kuv tsw thim rov qaab moog txug thaus puab puam tsuaj taag.

39. Kuv rhuav tshem puab, kuv ntaus puab ntsoog taag puab txhad sawv tsw taug, puab qaug rua ntawm kuv kwtaw.

40. Koj muab zug sa ntawm kuv duav moog ua rog. Koj ua rua kuv cov yeeb ncuab qaug khwb taag nrho ntawm kuv xubndag.

41. Koj ua rua kuv cov yeeb ncuab thim tswv tig nraus qaum rua kuv, hab cov kws ntxub kuv mas kuv ua kuas puam tsuaj taag.

42. Puab tsaa muag saib los tsw muaj leejtwg cawm tau puab dim, puab hu thov Yawmsaub tassws nwg tsw teb puab.

43. Kuv muab puab tsoo mog quas nyoos yaam le moov aav, kuv muab puab tsoo tawg tsuj yaam le tej aav nplaum ntawm ntug kev.

44. “Koj cawm kuv dim qhov kws nrug tej tuabneeg sws txeeb. Koj tuav rawv kuv ua ib tsoom tebchaws tug thawj, tej tuabneeg kws kuv tsw tau paub dua los kuj zwm rua kuv.

45. Lwm haiv tuabneeg kuj tuaj pe khwb nkaus rua ntawm kuv. Thaus puab tau nov txug kuv puab kuj noog kuv lug.

46. Lwm haiv tuabneeg poob sab taag, hab tawm huv puab lub chaw ruaj khov ua ib ce tshee quas nyo lug.

47. “Yawmsaub yeej muaj txujsa nyob. Ca le qhuas kuv txhwb zeb. Ca le txhawb nqaa kuv tug Vaajtswv kws yog txhwb zeb kws cawm kuv dim,

48. yog tug Vaajtswv kws paab kuv pauj taub hab coj tej tuabneeg nyob rua huv qaab kuv kev tswjfwm,

49. hab cawm kuv dim ntawm kuv cov yeeb ncuab. Koj yog tug kws tsaa kuv sawv sab dua cov kws tawm tsaam kuv. Koj tub tso kuv dim ntawm cov tuabneeg limham ndais ntuj.

50. Au Yawmsaub, vem le nuav kuv txhad qhuas ntxhas koj rua huv ib tsoom tebchaws suavdawg hab hu nkauj qhuas koj lub npe.

51. Yawmsaub pub kev kov yeej luj rua nwg tug vaajntxwv, nwg ua nwg txujkev hlub ruaj khov tshwm rua tug kws nwg laub roj tsaa ca lawd, yog Tavi hab nwg caaj ceg moog ib txhws.”