1 Xwmtxheej Vajntxwv - Đoạn 16

1. Puab coj Vaajtswv lub swb xaab lug txawb rua huv lub tsev ntaub kws Tavi tub tsaa ca lawd. Puab tua tsaj ua kevcai hlawv xyeem hab ua kevcai xyeem sws raug zoo rua ntawm Vaajtswv xubndag.

2. Thaus Tavi ua kevcai hlawv xyeem hab ua kevcai xyeem sws raug zoo taag lawd, nwg txawm tuav Yawmsaub lub npe foom koob moov rua cov pejxeem.

3. Hab nwg muab ib leeg ib lub ncuav, ib leeg ib daim nqaj hab ib lub ncuav txwv maab qhuav pub tsua ib tsoom Yixayee suavdawg tsw has quaspuj quasyawg.

4. Hab Tavi tsaa cov Levi qee leej ua koom rua ntawm Yawmsaub lub swb xaab, kuas puab thov hab ua tsaug hab qhuas Yawmsaub kws yog cov Yixayee tug Vaajtswv.

5. Axas ua tug thawj, tug ob yog Xekhaliya, hab muaj Ye‑i‑ee, Semilamau, Yehi‑ee, Mathathiya, Elia, Npenaya, Aunpe Entoo hab Ye‑i‑ee ua cov ntaus nkauj nog ncaas luj hab nkauj nog ncaas miv. Axas yog tug kws npuaj nruag tooj lab,

6. Npenaya hab Yahaxi‑ee kws ua pov thawj ua tug tshuab raaj xyu ntawm Vaajtswv lub swb xaab sws cog lug txhua txhua zag moog le.

7. Nub ntawd yog thawj zag kws Tavi has kuas Axas hab nwg cov kwvtij hu nkauj ua tsaug rua Yawmsaub has tas,

8. Ca le ua Yawmsaub tsaug, ca le thov hu nwg lub npe, ca le pav nwg teg num rua txhua haiv tuabneeg.

9. Ca le hu nkauj rua nwg, hu nkauj qhuas nwg, ca le pav txug txhua yaam num phemfwj kws nwg ua.

10. Ca le khaav txug nwg lub npe kws dawb huv, ca cov kws nrhav Yawmsaub zoo sab xyiv faab.

11. Ca le nrhav Yawmsaub hab nrhav nwg tug zug. Nrhav nwg lub xubndag tsw tu le.

12. Yixayee kws yog Yawmsaub tug qhev tej caaj ceg 'e. hab Yakhauj cov tub ki kws Yawmsaub xaiv 'e, mej ca le ncu txug tej num phemfwj kws Yawmsaub tau ua, hab nwg tej txujci phemfwj hab tej lug kws nwg txav txem.

14. Nwg yog Yawmsaub, yog peb tug Vaajtswv. Nwg tej lug txav txem muaj nyob thoob plhawv huv nplajteb.

15. Nwg yeej ncu ntsoov nwg tej lug cog tseg moog ib txhws, yog tej lug kws nwg qha moog rua ib txheeb tam tuabneeg,

16. yog tej lug kws nwg cog tseg rua Aplahaa, hab yog tej kws nwg yeem lug cog twv rua Yiha,

17. yog tej kws Vaajtswv cog lug ruaj nreeg ca rua Yakhauj ua kaab ke, yog cog rua Yixayee ua lug cog tseg moog ib txhws,

18. has tas, “Kuv yuav pub lub tebchaws Khana‑aa rua koj, ua mej qub txeeg qub teg moog le.”

19. Thaus puab tseed tsw muaj tuabneeg coob, yeej yog tsawg tsawg le tag, puab tsuas yog lug ua qhua nyob xwb,

20. tswv moog tswv lug rua haiv tuabneeg nuav rua haiv tuabneeg u, rua lub tebchaws nuav rua lub tebchaws u,

21. Yawmsaub tsw kheev leejtwg quab yuam puab, vem saib rua puab nwg txhad txwv tej vaajntxwv

22. has tas, “Tsw xob kov tej kws kuv laub roj tsaa lawd hab tsw xob ua le caag rua kuv cov xwbfwb cev kuv lug.”

23. Taag nrho thoob qaab ntuj ca le hu nkauj rua Yawmsaub, ca le pav nwg txujkev cawm dim ib nub dhau ib nub.

24. Ca le pav txug nwg tug fwjchim ci ntsaa ab rua huv ib tsoom tebchaws, pav txug nwg tej num phemfwj rua huv ib tsoom tuabneeg suavdawg.

25. Tsua qhov Yawmsaub yog tug luj kawg hab tswm nyog qhuas heev, nwg txaus ntshai heev dua tej timtswv huvsw.

26. Tuabneeg tej timtswv huvsw puavleej yog txoov daab xwb, tassws Yawmsaub yog tug tswm lub ntuj.

27. Koob meej hab fwjchim meej mom nyob ntawm nwg xubndag, tug zug hab kev xyiv faab nyob huv nwg lub chaw nyob.

28. Txhua haiv tuabneeg txhua xeem 'e, ca le qhuas Yawmsaub, ca le qhuas tas Yawmsaub muaj fwjchim ci ntsaa quas ab hab muaj zug.

29. Ca le qhuas tas Yawmsaub lub npe muaj fwjchim ci ntsaa quas ab kws tswm nyog qhuas kawg le, ca le coj tej kws xyeem tuaj rua ntawm nwg xubndag, ca le naav tej tsoog kws dawb huv pe hawm Yawmsaub.

30. Taag nrho lub nplajteb, ca le tshee nyo rua ntawm nwg xubndag. Lub nplajteb yeej nyob ruaj khov yuav tsw ua zug hlo le.

31. Lub ntuj ca le zoo sab, lub nplajteb ca le xyiv faab. Ca le has rua huv ib tsoom tebchaws tas, “Yawmsaub ua vaajntxwv kaav.”

32. Dej havtxwv hab txhua yaam kws nyob huv ca le qw nrov ntsug qeeg. Tej teb hab txhua yaam kws nyob huv ca le qw zoo sab.

33. Tej xyoob ntoo huv haav zoov yuav hu nkauj xyiv faab rua ntawm Yawmsaub xubndag, vem yog nwg yuav lug txav txem rua nplajteb.

34. Ca le ua Yawmsaub tsaug vem nwg zoo kawg. Nwg txujkev hlub ruaj khov nyob moog ib txhws.

35. Hab mej ca le has tas, “Au Vaajtswv kws cawm peb dim, thov koj tso peb dim, thov qaws peb hab cawm peb dim huv txhua lub tebchaws rov lug es peb yuav ua tsaug koj lub npe kws dawb huv hab khaav qhov kws peb qhuas koj.”

36. Ca le qhuas Yawmsaub kws yog Yixayee tug Vaajtswv ib txwm thau u lug moog ib txhws. Mas cov pejxeem huvsw has tas, “Amee” hab qhuas Yawmsaub.

37. Tavi txawm ca Axas hab nwg cov kwvtij nyob ntawm Yawmsaub lub swb xaab sws cog lug es ua num hov ntawd moog lawv le kws naj nub cheem tsum ua,

38. hab Aunpe Entoo hab nwg cov kwvtij rau caum yim leej kuj nyob ntawd. Yentuthu tug tub Aunpe Entoo hab Hauxa ua cov zuv tej rooj loog.

39. Tavi kuas pov thawj Xantau hab nwg cov kwvtij kws ua pov thawj nyob ntawm Yawmsaub lub tsev ntaub kws nyob ntawm lub chaw sab pe Yawmsaub huv lub moos Kinpe‑oo,

40. es puab yuav ua kevcai hlawv huvsw xyeem rua Yawmsaub sau lub thaaj kws hlawv xyeem thaus taagkig hab thaus yuav tsaus ntuj moog le, lawv le kws tub sau ca huvsw rua huv Yawmsaub tej kevcai kws tau has rua cov Yixayee.

41. Hemaa hab Yentuthu hab cov kws raug xaiv npe nrug puab nyob hov, yog cov kws yuav ua Yawmsaub tsaug tsua qhov nwg txujkev hlub ruaj khov nyob moog ib txhws tsw kawg.

42. Hemaa hab Yentuthu muaj raaj xyu hab nruag npuaj tooj lab kws yuav ntaus, hab muaj cuab yeej kws ntaus phim nkauj qhuas Yawmsaub. Yentuthu cov tub raug tsaa ua cov zuv tej rooj loog.

43. Mas cov pejxeem suavdawg txawm nyag rov moog rua nyag tsev, mas Tavi kuj rov qaab moog tsev hab foom koob moov rua nwg tsev tuabneeg.