Nau Ngluh - Đoạn 19

1. Pe khay pa kơi jêh khân păng luh bơh n'gor Êjipt, ta nar nây yơh phung ƀon lan Israel tât ta bri rdah Sinai,

2. Luh bơh Rephidim, khân păng tât ta bri rdah Sinai, jêh ri khân păng jưh tâm bri rdah ta năp yôk.

3. Y-Môis hao yôk ma Brah Ndu, jêh ri Yêhôva kuăl păng bơh yôk, lah: "Ăn may ngơi ma ngih Y-Yakôb pô aơ jêh ri lah ma phung ƀon lan Israel:

4. "Khân may saơ jêh nau gâp ƀư ma phung Êjipt, jêh ri phâm gâp yơk jêh khân may ma năr klang jêh ri njŭn leo jêh khân may ma gâp nơm.

5. Pô ri aƀaơ, tơ lah khân may tông bâr gâp jêh ri ndjôt prăp nau gâp tâm rnglăp, khân may mra jêng ndơ gâp nơm ta nklang lĕ rngôch ƀon lan; yorlah lĕ neh ntu jêng ndơ gâp.

6. Khân may mra jêng ma gâp du rplay ƀon bri hđăch phung kôranh ƀư brah jêh ri du phung mpôl băl kloh ueh. Pô ri jêng ăn nau may ngơi ma phung kon Israel."

7. Pô ri Y-Môis văch kuăl phung bu ranh phung ƀon lan, jêh ri păng tâm mpơl ma bu lĕ nau ngơi Yêhôva ntăm ăn jêh ma păng.

8. Lĕ rngôch phung ƀon lan lah ndrel n'grup. "Hên mra ƀư lĕ nau Yêhôva lah jêh." Y-Môis njŭn mbơh ma Yêhôva nau phung ƀon lan ngơi.

9. Jêh ri Yêhôva lah ma Y-Môis: "Aơ gâp hăn ma may tâm ndâr tŭk mbâl, gay ma phung ƀon lan tăng tơ lah gâp ngơi ma may, jêh ri chroh ma may mro." Y-Môis mbơh ma Yêhôva nau ƀon lan ngơi.

10. Yêhôva lah ma Y-Môis: "Hăn hom ma phung ƀon lan, prăp an khân păng nar aơ jêh ri ôi taơ ăn khân păng pih lơi kho ao khân păng.

11. Ăn khân păng njrăng ma nar tal pe; yorlah nar tal pe Yêhôva mra jŭr văch ta kalơ yôk Sinai ta năp măt lĕ rngôch phung ƀon lan.

12. Ăn khân may tâm nal n'har jŭm yôk ma phung ƀon lan, ăn may lah: 'Njrăng hom khân may, lơi hao ta kalơ yôk ôh, mâu lah dơi pah n'har yôk. Mbu nâm pah yôk mra khĭt.

13. Bu mâu mra pah nơm ƀư pô nây ma ti ôh, ƀiălah mra klŭp păng ma lŭ mâu lah pănh ma hăr, gĭt lah mpô mpa mâu lah bunuyh, păng mâu mra gŭ rêh ôh.' Tơ lah tăng bâr nŭng nke biăp nkuăng bu mra uh jŏ, ăn khân păng hăn dăch yôk."

14. Pô ri Y-Môis jŭr tă bơh yôk hăn ta phung ƀon lan, jêh ri prăp an phung ƀon lan. Khân păng jưh kho ao khân păng.

15. Păng lah ma phung ƀon lan: "Ăn khân may njrăng ma nar tal pe; lơi ta khân may bêch ndrel ma du huê bu ur ôh."

16. Nar tal pe, ta ôi, geh nglaih lơơp jêh ri ndâr tŭk mbâl ta kalơ yôk; bu tăng bâr nŭng huy ngăn, pô ri lĕ rngôch phung ƀon lan gŭ tâm ntŭk jưh râp sâr.

17. Jêh ri Y-Môis njŭn leo phung ƀon lan du luh bơh ntŭk jưh hăn tâm mâp đah Brah Ndu; jêh ri khân păng gŭ njâng yôk.

18. Lĕ yôk Sinai bêng ma nhhuk ŭnh, yor Yêhôva jŭr gŭ ta nây tâm nklang ŭnh. Nhhuk ŭnh nây hao leo kalơ nâm bu nhhuk ŭnh bơh năk toyh jêh ri lĕ yôk n'gơ ngăn.

19. Tơ bâr nŭng lơ hô nteh, Y-Môis ngơi, jêh ri Brah Ndu plơ̆ lah ma păng ma bâr nglaih.

20. Pô ri Yêhôva jŭr ta kô yôk Sinai, jêh ri Yêhôva kuăl Y-Môis ăn hao ta kalơ yôk. Jêh ri Y-Môis hao yôk lĕ.

21. Yêhôva lah ma Y-Môis: 'Jŭr hăn hom ma phung ƀon lan ăn khân păng njrăng, klach lah khân păng sâl uănh Yêhôva, jêh ri âk tâm phung khân păng rai yot.

22. Ăn nđâp phung kôranh ƀư brah lĕ, phung văch êp Yêhôva, prăp an khân păng nơm, klach lah Yêhôva ƀư ma khân păng."

23. Y-Môis lah ma Yêhôva: "Phung ƀon lan mâu dơi hao ta kalơ yôk Sinai ôh, yorlah may nơm ntăm jêh ma hên, lah: "Ƀư n'har jŭm yôk, jêh ri prăp an yôk nây, ""

24. Yêhôva lah ma păng: "Hăn jŭr hom jêh ri plơ̆ hao ndrel ma Y-Arôn, ƀiălah lơi ăn phung kôranh ƀư brah jêh ri phung ƀon lan sâl hao leo ma Yêhôva ôh, klach lah Yêhôva ƀư ma khân păng."

25. Pô ri Y-Môis jŭr hăn ta phung ƀon lan jêh ri lah nau nây ma khân păng.