Y-Tit - Đoạn 1

1. Y-Pôl, oh mon Brah Ndu, jêh ri kôranh oh mon Yêsu Krist, gay ma tâm n'hao nau chroh phung Brah Ndu săch jêh, jêh ri nau khân păng gĭt rbăng ma nau ngăn tĭng nâm nau blau yơk ma Brah Ndu,

2. tâm nau kâp gân ma nau rêh n'ho ro Brah Ndu ton jêh bơh âk rnôk, jêh ri păng mâu mâp mƀruh ôh,

3. jêh ri tâm rnôk di păng tâm mpơl jêh nau păng ngơi tâm nau nti lah păng jao jêh ma gâp tĭng nâm Brah Ndu, Nơm Tâm Rklaih he, ntăm jêh.

4. Njuăl samƀŭt ma Y-Tit, kon gâp ngăn tâm nau he chroh tâm ban: Ăn nau yô̆ jêh ri nau đăp mpăn bơh Brah Ndu, Mbơ̆, jêh ri Yêsu Krist, Nơm Tâm Rklaih he.

5. Gâp chalơi jêh may tâm n'gor Kret, gay ma may nkra nau ê hŏ ueh ôh, jêh ri tĭng nâm nau gâp ntăm, ăn may săch phung buranh tâm ăp ƀon,

6. tơlah geh bunuyh bu mâu dơi nduyh, gŭ knŏng du huê ur, geh kon gŭ răp jăp bu mâu geh nau phong ma nau tih mâu lah ma nau dăng bôk ôh.

7. Yorlah ăn phung kôranh chiă uănh jêng bunuyh bu mâu dơi nduyh, nâm bu du huê oh mon Brah Ndu; păng mâu jêng sưr, gơnh nuih hay nhêt dak play kriăk ƀâu, janh ƀai, mâu lah hay ma prăk âk ôh,

8. ƀiălah ăn păng jêng bunuyh rom bu, mĭt jiăng đah phung ueh, blau njrăng, sŏng, kloh ueh, di keh;

9. djôt prăp Nau Brah Ndu Ngơi ngăn tâm ban ma bu hŏ nti jêh, gay ma păng dơi tâm n'hao nuih tĭng nâm nau nti kloh, jêh ri dơi đah phung tâm rlăch ma nau nây.

10. Geh âk ngăn phung bunuyh dăng bôk, hâu ngăn ngên tâm phung koh ntâu, phung ngơi nau mâu khlay, jêh ri phung ndơm.

11. Ăn khân păng gŭ rklăk yorlah khân păng ƀư rŭng lĕ ndŭl mpôl tâm du mlâm ngih dôl nti nau bu mâu vay nti yor khân păng rŏng ma prăk lă lêng.

12. Du huê tâm phung khân păng, kôranh nơm mbơh lor khân păng nơm lah jêh: "Phung Kret mƀruh ƀaƀơ, jêng phung mpa janh, ndŭl ƀlao".

13. Nau mbơh aơ ngăn. Yor nây ăn may nduyh khân păng ma nau ktang gay ma khân păng geh nau chroh kloh.

14. Jêh ri lơi khân păng dơn ôh nau phung Yuđa nkoch bri mƀruh, jêh ri ma nau bunuyh ntăm, ăn chalơi nau nanê̆.

15. Lĕ rngôch mpa jêng kloh dadê ma phung kloh, ƀiălah ma phung ƀơ̆ jêh ri ma phung mâu chroh mâu geh du ntil ndơ kloh ôh, ƀiălah nau mĭn jêh ri nuih n'hâm sŏng khân păng nơm ôm jêh.

16. Khân păng nkoch khân păng nơm gĭt năl Brah Ndu, ƀiălah khân păng dun nau nây đah kan khân păng ƀư. Khân păng jêng phung bu tâm rmot, dăng bôk, jêh ri mâu dơi ƀư du ntil kan ueh ôh.