Nau Mprơ Ơm - Đoạn 94

1. Ơ Yêhôva, may jêng Brah Ndu ma nau plơng, sol hom.

2. Dâk hom may, Ơ Kôranh phat dôih ma neh ntu; Nsĭt lơi ma phung sưr tĭng nâm khân păng khư.

3. Ndah nâm jŏ phung ƀai mra geh nau dơi?

4. Khân păng ngơi ta năp bu, khân păng ngơi ma nau sưr; Lĕ rngôch phung ƀư nau kue, tâm rnê ma khân păng nơm.

5. Khân păng jot blên phung ƀon lan may. Jêh ri khân păng ƀư rêh ni phung drăp ndơ may.

6. Khân păng nkhĭt phung bu ur ndrô khĭt sai, jêh ri bu năch. Khân păng nkhĭt lơi phung kon đơi mbơ̆.

7. Jêh ri khân păng lah, Yêhôva mâu mra saơ ôh. Mâu lĕ Brah Ndu Yakôb mra njrăng ma nau nây.

8. Njrăng hom ơ phung rluk; Jêh ri phung moih, ndah jŏ khân may mra jêng phung blau mĭn?

9. Nơm tăm jêh, păng mâu mra tăng hĕ?

10. Nơm nkra phung mpôl băl bunuyh, mâu hĕ păng mra tâm rmal? Păng nơm ăn nau gĭt rbăng ma bunuyh.

11. Yêhôva gĭt năl nau mĭn bunuyh. Păng gĭt nau mĭn khân păng jêng dơm dam.

12. Ueh maak yơh bunuyh may nkra, Ơ Yêhôva, Jêh ri nti ma păng nau vay may;

13. Gay ăn ma păng nau rlu dôl nar mhĭk, Kŏ bu kuyh jêh ntu jru ma phung ƀai.

14. Yorlah Yêhôva mâu mra cha lơi ôh phung ƀon lan Păng, Mâu lĕ Păng mra cha lơi phung drăp ndơ Păng.

15. Yorlah nau phat dôih mra lŏ plơ̆ sĭt ma nau sŏng; Jêh ri lĕ rngôch phung geh nuih n'hâm sŏng mra tĭng ndô̆ nau nây.

16. Mbu mra dâk ăn ma gâp, gay ƀư ma phung ƀai? Mbu nâm mra n'gang gâp ƀư ma phung kơt nau kue?

17. Tơlah Yêhôva mâu jêng nơm koh dŏng gâp. Huêng gâp gŭ jêh tâm ntŭk nau rklăk.

18. Tơlah gâp lah, jâng gâp prah; Nau ueh may, Ơ Yêhôva, Kuăn rdâng gâp jêh.

19. Tơlah gâp geh âk nau mĭn. Nau may bonh jêng maak huêng gâp.

20. Dơi lĕ sưng hađăch nau ƀai geh nau tâm rnglăp đah may? Phung nây njêng nau tih đah nau vay.

21. Khân păng tâm rƀŭn gay ƀư ma huêng bunuyh sŏng, Jêh ri khân păng tâm rmal mham bunuyh sŏng,

22. Ƀiălah Yêhôva jêng tŭm prêh gâp, Brah Ndu gâp jêng lŭ, ntŭk gâp gŭ krap.

23. Păng ăn tŭp jêh ta khân păng nau kue khân păng, Păng mra koh lơi phung nây tâm nau ƀai khân păng; Yêhôva; Brah Ndu he, mra koh lơi khân păng.