Nau Mprơ Ơm - Đoạn 83

1. Ơ Brah Ndu lơi gŭ rklăk ôh; Lơi may gŭ iăt săk ôh, Jêh ri lơi may gŭ rlu ôh, Ơ Brah Ndu.

2. Yorlah aơ, phung rlăng may ƀư nau uh ah; Phung ƀư rlăng đah may ngơ̆ bôk.

3. Ma phung ƀon lan may khân păng mĭn nau mra ƀư ma nau plăch. Jêh ri khân păng tâm nchră ŭch ƀư ma phung may n'gang

4. Khân păng lah, văch hom, ăn he ngroh lơi khân păng bơh phung mpôl băl; Gay ma bu mâu hôm kah gĭt ma amoh Israel.

5. Khân păng tâm nchră jêh du nuih n'hâm; Khân păng tâm rnglăp ndrăng khân păng gay ƀư ma may;

6. Ngih bok Êdom jêh ri phung Ismael; Phung Môap jêh ri phung Hagar;

7. Phung Gebal, phung Amôn, jêh ri phung Amalek; Phung Philistin đah phung ƀon lan tir.

8. Phung Asiri tâm rnglăp đah khân păng lĕ; Khân păng ăn phung kon Y-Lot manh ti khân păng.

9. Ƀư ma khân păng nâm bu may ƀư jêh kăl e ma phung Madian. Nâm bu ma phung Sêsêra, nâm bu ma Jabin ta n'hor dak Kisôn.

10. Khân păng rai jêh ta Êndor Khân păng jêng nâm bu ek jêng neh

11. N'glưh lơi Kôranh khân păng nâm bu ma Ôreb jêh ri ma Sêeb; Jêh ri ma lĕ phung kon hađăch khân păng, nâm bu ma Sêbol jêh ri ma Salmuna;

12. Yorlah khân păng lah, Ăn he sŏk pit ntŭk Brah Ndu gŭ.

13. Ơ Brah Ndu gâp, ăn khân păng jêng nâm bu ndruyh sial đô̆, Nâm bu rhe ba sial đô̆ rdu.

14. Nâm bu ŭnh sa bri; Nâm bu mpiăt ŭnh sa yôk

15. Pôri lĕ, ăn sial phŭt tĭng khân păng; Jêh ri nkrit nhhu khân păng ma sial phŭt katang

16. Nkŭm muh măt khân păng ma nau bêk; Gay ma khân păng joi amoh may, Ơ Yêhôva

17. Ƀư bêk khân păng jêh ri ƀư rŭng khân păng ƀaƀơ; Nanê̆, tâm rlŭk nau mĭn khân păng, jêh ri ăn khân păng rai lôch;

18. Gay ma khân păng gĭt kanŏng may yơh djôt amoh Yêhôva. Jêng Nơm Ta kalơ Lơn ma lĕ neh ntu.