Nau Mprơ Ơm - Đoạn 78

1. Ơ phung ƀon lan gâp; gŭ iăt hom nau vay gâp; Rkêng hom tôr khân may ma bâr ngơi tă bơh trôm mbung gâp,

2. Gâp mra hă trôm mbung ngơi nau hôr; Gâp mra mbơh nau ndâp bơh rnôk kăl e,

3. Nau hên tăng jêh ri gĭt jêh, Nau phung mbơ̆ hên nkoch bri jêh,

4. Hên mâu mra pôn ôh nau nây ma phung kon khân păng, Hên mra lah ma phung ndŭl mpôl pa kơi nau tâm rnê ma Yêhôva, Nau brah Păng, jêh ri kan khlay păng ƀư jêh.

5. Yorlah Păng njêng jêh du nau mbơh tâm Yakôb, Păng dơm du nau vay tâm phung Israel, Jêh ri Păng đă jêh mbơ̆ he ăn nti nau nây ma phung kon khân păng.

6. Gay ma phung mpôl băl kandơ̆ dơi gĭt nau vay; Phung kon bu mra deh; Jêh văch ma toyh, khân păng mra ngơi ma kon khân păng tâm ban lĕ,

7. Gay ma khân păng kâp gân ma Brah Ndu, Mâu chuêl ôh kan Brah Ndu, ƀiă lah djôt prăp nau păng ntăm,

8. Jêh ri mâu jêng nâm bu phung mbơ̆ khân păng, Mpôl băl mâu blau tông jêh ri dăng bôk. Mpôl băl geh nuih n'hâm mâu mâp nâp rjăp, Jêh ri huêng khân păng mâu răp jăp đah Brah Ndu ôh.

9. Phung kon bu klâu Êphraim geh jêh ndơ tâm lơh, jêh ri djôt na, Rle hom ndŭr kơi tâm nau tâm lơh,

10. Khân păng mâu djôt prăp ôh nau Brah Ndu tâm rnglăp, jêh ri dun nsong hăn tĭng nâm nau vay păng;

11. Khân păng chuêl kan păng, Jêh ri kan khlay Brah Ndu ăn khân păng saơ.

12. Ta năp phung mbơ̆ khân păng Brah Ndu ƀư jêh nau khlay,v Tâm n'gor Êjipt, tâm bri Tsôan

13. Păng pă rnglah dak rlai, jêh ri ăn khân păng rgăn; păng ăn dak gŭ nâm bu mpir

14. Dôl nar păng njŭn khân păng ma ndâr tŭk. Jêh ri lĕ măng ma ŭnh ang.

15. Păng rlah lŭ tâm bri rdah, jêh ri ăn khân păng nhêt dak âk tâm ban ma tă bơh tu jru.

16. Bơh lŭ păng luh dak n'hor, Jêh ri ăn dak hoch nâm bu dak krong,

17. Ƀiălah khân păng ăt ƀư tih đah Brah Ndu Ƀư nau tâm rdâng đah Nơm Kalơ Lơn tâm bri rdah.

18. Khân păng rlong uănh Brah Ndu tâm nuih n'hâm khân păng Ma nau khân păng dăn ndơ sông sa tĭng nâm khân păng ŭch.

19. Khân păng ngơi tâm rdâng đah Brah Ndu; Khân păng lah, dơi lĕ Brah Ndu nkra sưng sông sa tâm bri rdah?

20. Aơ, păng dong lŭ, pô ri dak hoch jêh, Jêh ri dak n'hor ler; mâm păng ƀư dơi ăn n'hor ler; Păng dơi ăn kpŭng lĕ? Păng mra ăn iăm ma phung ƀon lan păng lĕ?

21. Pô ri Yêhôva tăng, jêh ri păng ji nuih; Jêh ri geh ŭnh sênh ta phung Yakôb, Jêh ri păng hao nuih, ji nuih ma phung Israel;

22. Yorlah khân păng mâu chroh ma Brah Ndu ôh, Jêh ri khân păng mâu rnơm ôh ma nau tâm rklaih.

23. Ăt păng ntăm ma ndâr tŭk ta kalơ; Jêh ri pơk mpông trôk.

24. Păng ăn mana tŭp nâm bu dak mih jêng ndơ khân păng sa, Păng ăn ndơ sông sa tă bơh trôk,

25. Phung bunuyh sa jêh kapŭng phung brah; Brah Ndu njuăl an ma khân păng ndơ sông sa tât hơm.

26. Păng ăn sial khôm tâm trôk tă bơh lơ; Jêh ri ma nau brah Păng, Păng đă sial khôm tă bơh rđŭng.

27. Păng ăn sĭm tŭp nâm bu mih, âk nâm bu ndruyh neh, Jêh ri sĭm geh năr âk nâm bu choih tâm dak rlai;

28. Păng ăn phung sĭm nây tŭp ta nklang ntŭk khân păng jưh, jŭm ntŭk khân păng gŭ.

29. Pô ri khân păng sa jêh, jêng hơm ngăn ngên; Brah Ndu ăn moh ndơ khân păng ŭch.

30. Nau khân păng ŭeh ê mpay ôh, ndơ khân păng sa, ăt hôm tâm trôm mbung,

31. Tơlah Brah Ndu hao nuih, ji nuih ma khân păng; Păng nkhĭt phung lay lơn, Păng dong phung bu klâu mom Israel

32. Nđâp tơlah lĕ nau nây khân păng ăt ƀư tih, jêh ri khân păng mâu chroh ôh ma nau khlay păng.

33. Pôri Brah Ndu ƀư roh nar khân păng tâm nau dơm dam. Jêh ri năm khân păng lôch tâm nau klach ngăn.

34. Tơlah Brah Ndu nkhĭt khân păng, pô ri khân păng joi Brah Ndu; Khân păng lŏ plơ̆ sĭt, jêh ri joi Brah Ndu; ma lĕ nuih n'hâm

35. Khân păng kah gĭt ma Brah Ndu jêng lŭ khân păng Jêh ri Brah Ndu Nơm Kalơ lơn jêng nơm tâm chuai khân păng

36. Ƀiălah mbung khân păng ngơi nhhưnh, jêh ri mpiăt khân păng ngơi mƀruh

37. Yorlah nuih n'hâm khân păng mâu jêng nâp ôh đah Brah Ndu, Mâu lĕ khân păng gŭ răp jăp đah nau Brah Ndu tâm rnglăp.

38. Ƀiălah tâm nau păng yô̆, Păng yô̆ an nau kue jêh ri mâu ƀư rai ôh; Jêh ri mâu jao păng nơm ma nau ji nuih toyh ôh.

39. Păng kah gĭt ma phung nây jêng kanŏng, nglay săk, Du n'hâm sial hăn, jêh ri mâu hôm sĭt ôh.

40. Âk tơ̆ khân păng ƀư nau tâm rdâng đah Brah Ndu tâm ntŭk bri hŏng, Âk tơ̆ khân păng ƀư rngot ma Brah Ndu tâm bri rdah;

41. Khân păng lŏ vir jêh ri rlong uănh Brah Ndu, Jêh ri lŏk lôr Nơm Kloh Ueh Israel.

42. Khân păng mâu kah gĭt ôh ti Brah Ndu. Mâu kah gĭt lĕ, ma nar tâm rklaih păng bơh phung tŭn jot;

43. Nau tâm mbên Brah Ndu ƀư jêh tâm bri Êjipt Jêh ri kan khlay Păng tâm bri Tsôan

44. Păng plăch dak krong jêng mham, Jêh ri dak n'hor khân păng, tât khân păng mâu dơi nhêt.

45. Păng njuăl phung rhuay ta nklang khân păng, ăn sa khân păng; Jêh ri kĭt ƀư rai khân păng

46. Păng ăn ndrŭng sa lơi ba khân păng Rplay kao bơh kan khân păng ma krah,

47. Păng ƀư rai tơm play kriăk ƀâu khân păng ma pler. Jêh ri tơm si Sikômor ma pler toyh.

48. Păng jao phung ndrôk khân păng ma pler tâm ban lĕ; Jêh ri phung biăp khân păng ma ŭnh tă bơh trôk

49. Brah Ndu nkhŭt nau nuih katang ma khân păng, Nau khĭt, nau biănh jêh ri nau uh ah, Tâm nau păng njuăl phung tông mpăr mhĭk,

50. Păng ăn trong ma nau păng nuih, Brah Ndu mâu tâm rklaih huêng khân păng bơh nau khĭt ôh, Ƀiă lah Brah Ndu jao mpô mpa khân păng ma nau rai yot;

51. Păng dong lĕ rngôch kon bu klâu bôk rah tâm n'gor Êjip Rplay lor nau katang khân păng tâm ngih bok Cham. Ƀiălah păng njŭn leo phung ƀon lan păng nâm bu phung biăp,

52. Brah Ndu gai khân păng nâm bu phung biăp tâm bri rdah.

53. Brah Ndu njŭn leo khân păng ma nau đăp mpăn, gay lơi ăn khân păng klach ôh; Ƀiălah dak rlai nkŭm lơi phung rlăng khân păng

54. Brah Ndu njŭn khân păng ta n'har ntŭk păng gŭ, Tât ta yôk aơ, ti ma păng tâm chuai jêh.

55. Brah Ndu mprơh âk băl mpôl ta năp khân păng; Brah Ndu tâm pă neh ma khân păng jêng drăp ndơ khân păng, Jêh ri ăn phung mpôl băl Israel gŭ tâm ngih bok khân păng

56. Ƀiălah phung Israel rlong uănh, jêh ri tâm rdâng đah Brah Ndu, Nơm Kalơ Lơn, Jêh ri khân păng mâu tĭng ndô̆ ôh nau Brah Ndu mbơh;

57. Khân păng rŭch, jêh ri ƀư rlăng nâm bu phung mbơ̆; Khân păng teng nâm bu pănh na mhĭk.

58. Khân păng lŏk lôr ăn Yêhôva ji nuih đah ntŭk ta Kalơ khân păng Jêh ri yơk mbah ma rup, dĭng geh Kôranh Brah ji nuih ma khân păng

59. Tơlah Brah Ndu tăng nau nây păng ji nuih; Păng tâm rmot hâu ngăn ma phung Israel;

60. Yor nây Păng cha lơi ngih bok ta ƀon Silô; Ngih bok Păng dơm jêh ta nklang bunuyh;

61. Păng jao nau ka tang Păng ma nau jêng dĭk; Jêh ri nau chrêk rmah Păng ma ti nơm rlăng;

62. Păng jao phung ƀon lan Păng ma đao gưm; Păng nuih ma drăp păng krâm

63. Ŭnh sa phung bu klâu ndăm khân păng; Jêh ri phung bu ur druh khân păng mâu geh nau mprơ tâm nkol ôh;

64. Phung Kôranh ƀư brah khân păng tŭp tâm đao gưm; Jêh ri phung bu ur ndrô khân păng mâu nhĭm nhhiăng ôh.

65. Dôl nây Kôranh Brah nâm bu bunuyh kah rngăl bêch; Nâm bu du huê janh katang nter. Yor dak play kriăk ƀâu ƀư ma Păng.

66. Păng dong mprơh lơi phung rlăng; Ƀư bêk khân păng n'ho ro.

67. Păng n'ho ma dun ngih bok Yôsep, Jêh ri mâu săch ôh mpôl băl Êphraim.

68. Ƀiălah Păng săch mpôl băl Yuda, Yôk Siôn, Yôk păng rŏng.

69. Păng ƀư ntŭk kloh ueh Păng tâm ban ma ntŭk kalơ, Tâm ban ma neh ntu, Păng ƀư nâp rjăp n'ho ro.

70. Păng săch Y-David oh mon Păng Păng têk sŏk tă bơh n'gar biăp;

71. Păng sŏk tă bơh kơi phung biăp me gŭ pu kon; ay ma păng jêng rmăk biăp Y-Yakôb, phung ƀon lan păng.

72. Pô ri Y-David jêng rmăk biăp khân păng ma nuih n'hâm sŏng, Jêh ri njŭn leo khân păng ma ti gĭt rbăng.