Nau Mprơ Ơm - Đoạn 77

1. Gâp mra nter ma Brah Ndu ma bâr gâp, Ma Brah Ndu yơh đah bâr gâp, jêh ri Păng mra rkêng tôr ma gâp.

2. Ta nar rêh ni gâp joi Kôranh Brah, Dôl măng gâp yơr ti gâp, mâu rlu ôh; Huêng gâp dun dơn nau bonh leng,

3. Gâp kah gĭt ma Brah Ndu, jêh ri gâp mra uh ah; Gâp nter rđêng jêh ri huêng gâp huăr jêh. (Sêla)

4. May kuăn n'gô măt gâp gŭ kuăn rdâng ƀaƀơ; Gâp rŭng răng hâu ngăn ngên, tât gâp mâu dơi ngơi.

5. Gâp rnê ma nar kăl e, ma năm kăl e.

6. Gâp kah gĭt ma nau gâp mprơ dôl măng; Gâp gŭ mĭn tâm nuih n'hâm gâp.

7. Kôranh Brah mra dun mro lĕ? Păng mâu mra hôm jêng ueh lĕ?

8. Nau ueh păng du jêh mro lĕ? Nau păng ton roh n'ho ro lĕ?

9. Brah Ndu chuêl lĕ nau Păng blau kơp Dôl păng ji nuih, păng mâp chăng lơi lĕ nau păng vay yô̆? (Sela)

10. Jêh ri gâp lah, aơ, nau rêh ni gâp; Ƀiălah gâp mra kah gĭt năm, ti ma Nơm kalơ Lơn gŭ ndrel.

11. Gâp mra mbơh kan Yêhôva; Yorlah gâp mra kah gĭt ma kan khlay may kăl e.

12. Gâp mra mĭn lĕ ma lĕ rngôch kan may, Jêh ri mĭn ma nau may ƀư.

13. Ơ Brah Ndu, trong may jêng tâm nau kloh ueh; Ntă brah jêng toyh tâm ban ma Brah Ndu?

14. May jêng Brah Ndu ƀư nau khlay; may tâm mpơl jêh nau brah may ma phung ƀon lan.

15. Ma ti may, may tâm chuai jêh phung ƀon lan may, Phung kon bu klâu Yakôb jêh ri Yôsep (sêla)

16. Ơ Brah Ndu, phung dak saơ jêh may; Phung dak saơ jêh may, jêh ri khân păng klach; Phung ntu jru n'găr.

17. Phung ndâr tŭk nkhŭt dak mih; nglaih rdah tâm ndâr tŭk; Jêh ri hăr may mpăr lam ntŭk.

18. Nglaih may rdah tâm sial hĭt; Lơp nchrat tâm neh ntu; neh ntu n'găr jêh ri nsâr.

19. May nkra trong tâm dak rlai, Ƀaƀă trong may ta dak toyh. Jêh ri têl may bu mâu gĭt ôh.

20. May njŭn leo phung ƀon lan may nâm bu du phung biăp, Ma ti Môise jêh ri Y-Arôn.