Nau Mprơ Ơm - Đoạn 73

1. Nanê̆ Brah Ndu jêng ueh ma phung Israel; Ma phung geh nuih n'hâm kloh

2. Ƀialah jâng gâp bơi ma văk prah, nhuat gâp bơi ma prah

3. Yorlah gâp geh nau kơnh ma phung sưr; Tơlah gâp saơ nau ueh maak phung ƀai.

4. Yorlah khân păng mâu geh ôh nau rêt ni, tơlah khân păng khĭt; Ƀiălah nau katang khân păng gŭ nâp.

5. Khân păng mâu gŭ ôh tâm nau rêh ni nâm bu phung bunuyh êng

6. Yor nây nau sưr jêng bok ao khân păng soh n'gut.

7. Măt khân păng rgloh padih yorlah khân păng geh rmeh lơn ma nuih n'hâm ŭch

8. Khân păng mưch, jêh ri ma nau ƀai ngơi ma nau tŭn jot; Khân păng ngơi bêng ma nau sưr.

9. Bâr mbung khân păng ngơi tâm rdâng tât ta kalơ trôk; Jêh ri mpiăt khân păng nsong lam bri neh

10. Păng mra lŏ njŭn leo phung ƀon lan păng; Khân păng rvăn dak âk rmeh.

11. Jêh ri khân păng lah, mâm ƀư Brah Ndu dơi gĭt? Mâm ƀư Nơm Kalơ Lơn dơi năl?

12. Aơ, pô aơ phung ƀai; Khân păng hâk răm ƀaƀơ, khân păng bun drăp ndơ.

13. Pô ri mâu khlay ôh gâp ƀư kloh jêh nuih n'hâm gâp; Jêh ri rao jêh ti gâp tâm nau mâu mâp tih;

14. Yorlah ăp nar bu dong gâp; ăp ôi nau tâm rmal tŭp ta gâp;

15. Tơlah gâp lah, gâp mra ngơi pô aơ; Aơ, gâp mra rlăng ma mpôl phung kon may

16. Tơlah gâp joi ŭch gĭt rbăng nau nây, Păng jêng nau jê̆, toyh ta năp măt gâp;

17. Kŏ gâp lăp tâm ntŭk kloh ueh Brah Ndu; Jêh ri mĭn ma nar dăch lôch khân păng.

18. Nanê̆, may dơm khân păng ta trong mbĭr; may ăn prah khân păng tâm nau rai lôch.

19. Uănh khân păng rai lôch ƀât lât! Khân păng roh ngăn ma nau klach toyh,

20. Nâm bu nau mbơi tơlah bu kah rngăl; Pô ri, Ơ Kôranh Brah, tơlah may kah rngăl, may mra tâm rmot ma rup khân păng;

21. Yorlah huêng gâp rngot, jêh ri nuih n'hâm gâp nâm bu ntâp jêh;

22. Rnôk nây gâp jêng rluk jêh ri mâu gĭt rbăng ôh; Ta năp măt may gâp jêng tâm ban ma jun

23. Ƀiălah gâp gŭ ndrel ma may ƀaƀơ; may kuăn jêh gâp tâm ti ma may

24. may mra njŭn leo gâp ma nau may mƀăp nti; Jêh ri kandơ̆ may mra rom gâp tâm nau chrêk rmah.

25. Mbu hôm geh êng đŏng ma may tâm trôk? Ta neh ntu tâm ban lĕ, gâp mâu hôm ŭch ma bu êng ôh, kanŏng may yơh.

26. Nglay săk jêh ri play nuih gâp mra roh rai; Ƀiălah Brah Ndu jêng nau katang ma nuih n'hâm gâp jêh ri jêng drăp gâp krâm n'ho ro.

27. Yorlah pô aơ; Phung gŭ ngai đah may mra rai yot; may ƀư rai jêh phung du tă bơh may ƀư nau ka n'hong.

28. Ƀiălah hăn dăch ta Brah Ndu jêng nau ueh ma gâp; Gâp dơn Kôranh Brah Yêhôva jêng ntŭk gâp gŭ krap; Gay ma gâp dơi nkoch bri lĕ rngôch kan may.