Nau Mprơ Ơm - Đoạn 72

1. Ơ Brah Ndu, ăn nau may phat dôih ma hađăch, jêh ri nau sŏng may ma kon hađăch.

2. Păng mra phat dôih phung ƀon lan may ma nau sŏng srăng, Jêh ri phung o ach may ma nau di;

3. Phung yôk toyh, jê̆ tâm nau sŏng srăng Mra ăn nau đăp mpăn ma phung ƀon lan.

4. Păng mra phat dôih phung o ach tâm ƀon lan, Păng mra tâm rklaih phung kon bunuyh pưt mpa, Jêh ri păng mra jot plên phung tŭn jot

5. Bu mra klach ma may dôl ang nar, jêh ri khay tâm lĕ rnôk.

6. Hađăch mra jêng nâm bu dak mih tŭp tâm gơ̆ bu mhe muyh; Tâm ban ma mih rhêh ăn bĕ neh ntu.

7. Dôl păng chiă uănh phung sŏng mra geh kao; jêh ri nau đăp mpăn mra ăn ler kŏ mâu hôm geh khay ôh.

8. Păng mra chiă uănh bơh dak rlai aơ, tât ta dak rlai êng; Bơh dak krong tât ta ntŭk dŭt bri dŭt neh.

9. Ta năp păng phung ƀon lan tâm bri rdah mra chon kô mâk; Jêh ri phung rlăng păng mra lĕr ndruyh neh

10. Phung hađăch n'gor Tarsis jêh ri phung kô dak rlai mra chê̆ pi; Phung hađăch bơh Shêba jêh ri Sêba mra nhhơr ndơ.

11. Nanê̆, lĕ rngôch phung hađăch mra chon ta năp păng; lĕ rngôch mpôl băl mra pah kan ma păng;

12. Yorlah păng mra kơl phung o ach nter vơh, Jêh ri nơm rêh ni mâu geh nơm kơl.

13. Păng mra yô̆ ma phung rêh ni jêh ri o ach; Jêh ri păng mra rklaih huêng phung pưt ndơ.

14. Păng mra tâm chuai huêng khân păng bơh nau tŭn jot, jêh ri nau ƀai; Jêh ri mham khân păng mra geh rnoh khlay ta năp măt păng.

15. Khân păng mra gŭ rêh jêh ri bu ăn ma hađăch mah bơh shêba; Phung bunuyh mra mbơh sơm ma hađăch ƀa ƀơ. Khân păng mra ăn nau ueh lăng ma ôbăl ăp nar.

16. Ba mra jêng âk rmeh tâm neh ntu kalơ kô yôk; Jêh ri ndrŏng ba nây mra mpât dai nâm bu tơm Si Liban; Phung ƀon lan mra luh kao nâm bu gơ̆ tâm neh.

17. Amoh păng mra gŭ ƀaƀơ; Amoh păng mra gŭ ƀaƀơ dôl duh nar; Jêh ri phung bunuyh mra geh nau ueh uĭn tâm păng; Lĕ rngôch mpôl băl bunuyh mra lah ma păng ueh maak yơh.

18. Mât ton ma Yêhôva, Brah Ndu, Brah Ndu phung Israel; Kanŏng păng ƀư kan khlay ngăn,

19. Mât ƀon ƀaƀơ ma amoh păng chrêk rmah; Ăn lĕ rngôch neh ntu mra bêng ma nau chrêk rmah păng. Amen. Amen.

20. Lôch yơh nau Yorlah-David, Kon Yêsê, mbơh sơm.