Nau Mprơ Ơm - Đoạn 71

1. Ơ Yêhôva, gâp du krap tâm may: Lơi ăn bu mâp ƀư bêk gâp ôh.

2. Tâm nau sŏng may tâm rkhail gâp, jêh ri ăn gâp jêng kon me. Rkêng tôr may ma gâp, jêh ri tâm rklaih gâp.

3. Ăn may jêng lŭ gâp dơi gŭ, ta nây gâp dơi mbe ƀa ƀơ: May ăn jêh nau ntăm, gay may tâm rklaih gâp;

4. Yorlah may jêng lŭ gâp, tâm rklaih gâp bơh ti bunuyh ƀai, Ma ti bunuyh kue jêh ri janh ƀai

5. Yorlah may jêng nau gâp kâp gân, Ơ kôranh Brah Yêhôva; Ma may gâp rnơm bơh gâp jêng mom.

6. Gâp nsing ma may ntơm bơh nar ma deh ma gâp; may yơh ăn gâp du luh tă bơh ndŭl me gâp; Gâp mra tâm rnê ma may ƀaƀơ.

7. Gâp jêng nau hih rhâl ma lĕ rngôch bunuyh Ƀiălah may jêng ntŭk nâp gâp krap

8. Mbung gâp mra tâm rnê ma may Jêh ri yơk mbah ma may ăp nar

9. Lơi ta dun gâp tơ lah gâp lĕ ranh, Tơlah n'hâm suan gâp lĕ djoh, lơi ta cha lơi gâp;

10. Yorlah phung rlăng đah gâp ngơi ma gâp, Phung rmiăt huêng gâp tâm nchră ndrăng khân păng,

11. Khân păng lah, Brah Ndu cha lơi păng jêh; Ntâp păng, kuăn rdâng păng, Yorlah mâu geh bunuyh tâm rklaih păng ôh

12. Ơ Brah Ndu, lơi gŭ ngai đah gâp ôh; Ơ Brah Ndu gâp, ndal kơl gâp.

13. Ăn phung ƀư ngroh huêng gâp, geh nau bêk jêh ri rai yot; Mbu nâm joi nau ƀư mhĭk ma gâp, geh nau bêk jêh ri nau gơm mưch, nkŭm khân păng.

14. Ƀiălah gâp mra kâp gân ƀaƀơ Jêh ri gâp mra tâm rnê ma may lơ hô âk.

15. Bâr mbung gâp mra mbơh nau sŏng srăng may; Jêh ri nau may tâm nklaih ăp nar; Yorlah gâp mâu dơi kơp mrô khân păng

16. Gâp mra nkoch bri nau brah Kôranh Brah Yêhôva; Gâp mra mbơh nau sŏng may, kanŏng ma nau sŏng may.

17. Ơ Brah Ndu, may ntĭm nti an jêh gâp bơh gâp hôm mom. Jêh ri tât ta nar aơ, gâp mbơh kan khlay may

18. Lơi ta chalơi gâp ôh, Ơ Brah Ndu, tơlah gâp ranh jêh ri ndra jêh. Tât gâp mbơh jêh nau dăng ka tang ma rnôk kan dơ̆, Nau brah may ma ăp kon sau.

19. Nau rŏng may, Ơ Brah Ndu, prêh ngăn; Nơm ƀư jêh âk kan toyh, Ơ Brah Ndu, mbu mra jêng tâm ban ma may?

20. May yơh tâm mpơl jêh ma hên âk nau rêh ni toyh, Mra mplơ̆ nau rêh ma hên. Jêh ri mra ăn hên hao luh tă bơh ntu jru tâm neh ntu.

21. Ăn may n'hao an nau toyh gâp, Jêh ri lŏ plơ̆ rthi nuih gâp.

22. Gâp mra tâm rnê ma may ma bâr dĭng. Gâp mra mprơ ma nau nanê̆ may, Ơ Brah Ndu gâp; Ma may yơh gâp mra mprơ, tâm mê ma gong rêng Ơ Nơm kloh Ueh ma Israel.

23. Bâr mbung mra nter hâk tơ lah gâp mprơ tâm rnê ma may. Nđâp ma huêng gâp may hŏ tâm chuai jêh.

24. Mpiăt gâp tâm ban lĕ mra mbơh nau sŏng may ăp nar; Yorlah bu ƀư bêk, jêh ri tâm rlŭk jêh nau mĭn phung ŭch ƀư ma gâp.