Nau Mprơ Ơm - Đoạn 49

1. Hơi lĕ rngôch phung ƀon lan, iăt hom nau aơ: Ăn lĕ rngôch rkêng tôr. Ơ phung gŭ tâm neh ntu.

2. Phung jê̆ jêh ri phung toyh. Ndrong jêh ri o ach.

3. Bâr mbung gâp mra ngơi ma nau blau mĭn Nau mĭn tă bơh nuih n'hâm gâp, mra luh tă bơh nau gĭt rbăng

4. Gâp mra rkêng tôr nau ngơi hôr Gâp mra sok gong rêng gay ma pơk nau ngơi hôr gâp

5. Mâm ƀư gâp mra klach tâm nau rêh ni Tơlah nau kue phung rlăng gâp gŭ jum gâp

6. Phung rnơm ma nau ndrong khân păng nơm Ntưih êng nơm geh drăp ndơ âk rmeh.

7. Mâu geh ôh du huê nơm dơi tâm chuai an oh nâu Mâu lĕ dơi ăn ma Brah Ndu rnoh tâm chuai

8. Yor nau tâm chuai huêng khân păng khlay ngăn Bu mâu mra dơi nkhôm rnoh nây ôh.

9. Gay ma bunuyh geh nau rêh n'ho ro. Gay ma Păng mâu mra saơ nau rai yot ôh.

10. Yor may saơ nơm gĭt mlĕh khĭt. Phung brut moih jêh ri bunuyh rluk mâl rai yot tâm ban lĕ. Jêh ri chalơi drăp ndơ ăn ma bu êng

11. Nuih n'hâm khân păng, mĭn ma ngih khân păng gŭ hôm ƀaƀơ n'ho ro. Jêh ri ntuk păng gŭ lôch rơh aơ poh rơh êng Khân păng sok amoh khân păng nơm jêng rnha moh neh lo-mir.

12. Ƀiălah kon bunuyh, nđâp tơlah ndrong kuăng toyh, mâu dơi hôm n'ho ro ôh. Păng jêng tâm ban ma mpô mpa rai lôch.

13. Bu chôk amoh khân păng jêng tâm ban ma du mpôl biăp prăp ma ƀon phung khĭt. Nau khĭt mra jêng rmăk biăp khân păng

14. Tơlah tât ôi, phung song mra geh nau dơi chiă uănh khân păng Ƀon phung khĭt mra sa nau ueh khân păng Tât mâu hôm geh ntuk khân păng gŭ

15. Ƀiălah Brah Ndu mra tâm chuai huêng gâp bơh ti phung ƀon khĭt; Yorlah păng mra rom gâp (Sêla).

16. Lơi ta klach ôh tơlah geh bunuyh plơ̆ jêng ndrong kuăng Yorlah drăp ndơ tâm ngih păng mra jêng bĭk. Dôl geh nau chrêk rmah ngih păng geh nau hao

17. Yorlah păng mâu mra djôt leo du ntil ndơ ôh tơlah păng khĭt. Nau lư n'găr păng mâu dơi tĭng păng jur tâm trôm môch lĕ

18. Nđâp tơlah păng tâm rnê ma huêng păng dôl păng gŭ rêh Jêh ri phung bunuyh tâm rnê ma may tơlah may ƀư ueh ma may nơm,

19. Phung mra hăn ta ntuk phung mbơ̆ păng. Khân păng mâu mra hôm dơi saơ nau ang ôh.

20. Nơm gŭ tâm nau bu yơk jêh ri mâu geh nau gĭt rbăng, Jêng tâm ban ma mpô mpa hăn tâm nau rai yot.