Nau Mprơ Ơm - Đoạn 45

1. Nuih n'hâm gâp bêng ler ma nau ueh ngăn. Gâp ngơi ma nau gâp ƀư prăp ma hađăch Mpiăt gâp tâm ban ma du mlâm mâng chih du huê nơm njêh

2. may jêng ueh lơn ma lĕ rngôch kon bu klâu bunuyh Nau yô̆ nkhut jêh ta mbung may, Yor nây Brah Ndu ăn nau ueh uĭn ƀaƀơ ma may

3. Ơ Kôranh Brah, cheng hom đao. Jêng nau chrêk rmah jêh ri nau rnam may.

4. Ma nau nkrơ̆ may ăn ncho ta ndeh seh ma nau dơi, yor nau nanê̆, nau rdơ̆ rbăn jêh ri nau song srăng. Jêh ri ti ma may mra tâm mpơl kan toyh ngăn ngên.

5. Hăr may mplanh ngăn Pănh geh ta play nuih phung rlăng đah hađăch Phung ƀon lan mra tup tâm dâng jâng may

6. Ơ, Brah Ndu, sưng hađăch may hôm ƀaƀơ n'ho ro, lôch rnôk aơ, poh rnôk êng. Mâng ƀon bri hađăch may jêng mâng hađăch nau song.

7. may rong nau song jêh ri tâm rmot ma nau ƀai. Yor ri Brah Ndu, jêng Brah Ndu may Brah troch jêh dak ngi ma may, dak ngi nau maak ho lư n'găr lơn ma lĕ rngôch phung mĭt jăng may.

8. Dak myr, alôê, jêh ri kas ƀâu kah tâm bok ao may Tâm ngih hađăch bu ƀư ma la, nau bu uh dĭng vưt ƀư maak may.

9. Phung kon bu ur hađăch jêng tâm phung bu ur may yơk Bu ur hađăch gŭ pa ma may ndrăp ma mah ô phia (Ôphir).

10. Ơ kon bu ur gâp, gŭ iăt hom, uănh jêh ri rkêng tôr ay. Lơi chuêl ƀon lan ay jêh ri ngih mbơ̆ ay.

11. Jêh ri hađăch mra uch ma nau ueh ay Yor Păng jêng kôranh ay, chon mon mbah hom ta năp Păng.

12. Kon bu ur ƀon tir mra gŭ pa năp ndjôt ndơ nhhơr, nđâp phung ndrong tâm ƀon lan mra dăn nau yô̆ ay.

13. Chrêk rmah ngăn kon bu ur hađăch gŭ tâm ngih hađăch Păng soh bok ao tanh ma mhay

14. Păng mra nsoh bok ao cheh jêh ri bu njun păng ta năp hađăch phung băl bu ur druh gŭ pa kơi păng bu mra njun ta năp may.

15. Bu mra ăn khân păng lăp Tâm nklang ngih hađăch ma nau răm maak

16. Phung kon may mra ntrok ntuk mbơ̆ may may mra nkăt njêng khân păng jêng kôranh chiă uănh tâm lam bri

17. Gâp mra ăn amoh may jêng lư n'găr tâm lĕ rnôk. Yor nây phung ƀon lan mra tâm rnê ma may ƀaƀơ n'ho ro.