Nau Mprơ Ơm - Đoạn 38

1. Hơi Yêhôva! lơi ta may nduyh gâp, tâm nau may khek Mâu lĕ mbang gâp tâm nau may ji nuih

2. Yorlah hăr may geh ta gâp jêh. Jêh ri ti may grun gâp jâk ngăn

3. Yor nau may khek, nglay săk gâp mâu ngăch prăl ôh. Mâu geh nau rlu lĕ ma nting gâp yor nau tih gâp.

4. Yorlah nau tih gâp hao tât ta kalơ bôk gâp. Păng jêng tâm ban ma ndơ rdeng jâk ir tâm gâp.

5. Ntuk sôt gâp ôm jêh ri ndâng. Yor nau gâp ƀư lă lêng.

6. Ndur kơi gâp jêng gô kuăt jêh ri rdja nuih n'hâm ngăn. Gâp hăn nsong lĕ nar ma nau klân ndrê

7. Unh duh ring sa hut klơm gâp. Jêh ri tâm nglay săk gâp mâu geh nau ngăch prăl

8. gâp huăr jêh, jêh ri bĭ sôt Nau uh ah tâm nuih n'hâm gâp, ăn gâp nđêng

9. Ơ Kôranh brah, lĕ rngôch nau gâp uch gŭ ta năp may. Jêh ri nau gâp nđêng mâu pôn mo ma may ôh.

10. Nuih n'hâm gâp nsâr, nau nđơr gâp luh tă bơh gâp jêh ri nau ang măt gâp, chalơi gâp jêh

11. Phung mĭt jăng, phung băl gâp tĭt trơn ngai đah nau sôt gâp Jêh ri phung mpôl băl gâp gŭ ngai

12. Nđâp ma phung joi nau rêh gâp sân dăk ma gâp Phung uch ƀư jêr ma gâp ngơi nau mhĭk Ăp nar khân păng rvê ma nau ndơm.

13. Ƀiălah gâp jêng tâm ban ma du huê tĭk mâu tăng nau Tâm ban ma du huê mlo, mâu blau ngơi

14. Gâp jêng tâm ban ma du huê bunuyh mâu tăng nau. Jêh ri mâu hôm geh nau tâm rlăch ôh tâm trôm mbung gâp.

15. Ơ Yêhôva, tâm may yơh gâp kâp gân may mra lo plơ̆ lah, Ơ Kôranh Brah, Brah Ndu gâp

16. Yorlah gâp lah: Lơi ta ăn khân păng hâk răm yor gâp. Tơlah jâng gâp prah mbĭr. Khân păng dâk uch ƀư mhĭk ma gâp.

17. Yorlah gâp, bơi ma prah Jêh ri nau rngot gâp gŭ ta năp gâp ƀaƀơ

18. Pôri gâp mra mbơh nau mhĭk gâp Gâp mra rngot yor nau tih gâp

19. Ƀiălah phung rlăng đah gâp ngăch ngăn Phung tâm rmot ma gâp mâu geh nau âk ôh

20. Phung mplơ̆ nau mhĭk, ntrok nau ueh gâp ƀư jêh Jêng phung rlăng gâp, Yorlah gâp tĭng nau ueh.

21. Lơi ta chalơi gâp ôh, Ơ Yêhôva, Ơ Brah Ndu gâp, lơi gŭ ngai đah gâp ôh.

22. Dăn may văch gơnh kơl gâp, Ơ Kôranh Brah, nau tâm rklaih gâp.