Nau Mprơ Ơm - Đoạn 27

1. Yêhôva jêng nau ang jêh ri nau tâm rklaih gâp Ma mbu hôm gâp klach? Yêhôva jêng pôm mbe nau rêh gâp Ma mbu hôm gâp klach?

2. Tơ lah phung ƀai ƀư uch sa hêk rvăn nglay săk gâp Khân păng mra văk jâng prah

3. Nđâp tơ lah du phung kahan nchueng jum gâp Nuih n'hâm gâp mâu mra klach ôh Nđâp tơ lah nau tâm lơh tât ma gâp, Ăt gâp geh nau rnơm lĕ nâp rjăp

4. Gâp dăn ma Yêhôva du ntil nau, jêh ri mra joi nau nây! Jêng nau gŭ tâm ngih Yêhôva, Gay uănh nau ueh maak tă bơh Yêhôva jêh ri gay mĭn ma ngih brah Păng

5. Yorlah tâm nar rêh ni, Păng mra ăn gâp krap tâm ngih bok Păng. Păng mra pôn gâp ăn ndâp tâm ngih bok Păng Păng mra chông gâp ta kalơ lu prêh.

6. Aƀaơ Păng chông bôk gâp ta kalơ phung rlăng gŭ jum gâp; Jêh ri gâp mra nhhơr ndơ ƀư brah tâm ngih bok Păng, ma nau nter răm rhơn Gâp mra mprơ, nanê̆ gâp mra mprơ tâm rnê ma Yêhôva

7. Ơ Yêhôva dăn may iăt bâr gâp, gâp kuăl mbơh sơm ma may; Yô̆ nđach an ma gâp, jêh ri lo plơ lah an ma gâp.

8. Tơlah may lah, joi hom muh măt gâp, Gâp mra joi muh măt may, Ơ Yêhôva

9. Ơ Kôranh Brah Ndu, nơm rklaih gâp, Lơi ta pôn măt may ma gâp Lơi ta may mprơh oh mon may ma nau nuih janh ôh may jêng nơm kơl gâp, lơi ta mƀăr lơi gâp

10. Tơlah mbơ me gâp chalơi gâp, Yêhôva mra rom gâp,

11. Ơ Yêhôva, ntĭm nti an gâp ma trong song may Njun leo an gâp tâm trong song srăng

12. Lơi ta jao gâp ma phung rlăng ôh Yorlah phung nchơt dâk phong gâp, Phung bunuyh thăm ma nau ƀai

13. Ơ! Tơlah gâp mâu chroh ôh mra saơ nau ueh Yêhôva tâm neh phung rêh, gâp mra khĭt huăr yơh.

14. Kâp gân hom ma Yêhôva Ăn nuih n'hâm nâp rjăp! Ăn dơi, kâp gân Yêhôva.