Nau Mprơ Ơm - Đoạn 147

1. Halêluya; Yorlah ueh yơh mprơ tâm rnê ma Brah Ndu he; Yorlah maak jêh ri di tâm rnê ma Păng.

2. Yêhôva rdâk ƀon Yêrusalem; Păng tâm rƀŭn phung kon Israel nchah du jêh.

3. Păng ƀư bah phung geh nuih n'hâm nchah, jêh ri păng put ntŭk sôt khân păng.

4. Păng kơp dŭm âk play mănh. Păng tâm amoh jêh lĕ rngôch mănh.

5. Kôranh Brah he jêng toyh, brah ma nau katang păng; Nau gĭt rbăng păng mâu geh lôch bôl ôh.

6. Yêhôva kâp kơl phung dêh rhêt. Păng njŭr tâm dâng phung ƀai tât ta neh.

7. Mprơ hom ma Yêhôva ma nau tâm rnê; Mprơ tâm rnê hom ma Brah Ndu he ma gong rêng.

8. Nơm nkŭm trôk ma ndâr tŭk, Nơm nkra dak mih ma neh ntu, Nơm ăn gơ̆ hon tâm yôk.

9. Nơm ăn ndơ ma phung mpa bri, Jêh ri ma phung kon nđak, tơ lah khân păng nter.

10. Păng mâu maak ôh ma nau dăng seh. Păng mâu maak lĕ tâm jâng bunuyh.

11. Yêhôva maak tâm phung klach yơk ma Păng, Tâm phung kâp gân ma nau ueh Păng.

12. Ơ ƀon Yêrusalem tâm rnê hom ma Yêhôva Ơ ƀon Siôn, tâm rnê hom ma Brah Ndu may.

13. Yor păng ƀư nâp mâng nđăng mpông pêr may; Păng ăn nau ueh uĭn ma phung kon may ta nklang may.

14. Păng ăn nau đăp mpăn ma bri may. Păng n'hơm may ma phe blê ueh lơn

15. Păng njuăl nau păng ntăm ta neh ntu; Nau păng ngơi nchuăt ngăch ngăn

16. Păng ăn dak pler nâm bu rsau biăp. Păng nkhŭt glo dak nđik nglang, nâm bu ŭnh buh.

17. Păng klŭp phung rchuăl dak nđik, Mbu dơi gŭ ta năp nau nđik păng?

18. Păng njuăl nau păng ngơi, jêh ri ƀư lêk lơi; Păng ăn sial n'hĭt, jêh ri dak hoch.

19. Păng tâm mpơl nau Păng ngơi ma Yakôb; Nau vay Păng jêh ri nau Păng ntăm ma phung Israel.

20. Păng mâu ƀư pô nây ôh ma moh mpôl băl; Jêh ri khân păng mâu gĭt rbăng ôh nau păng ntăm. Alêluya.