Nau Mprơ Ơm - Đoạn 132

1. Ơ Yêhôva ăn may kah gĭt ma David, Ma lĕ nau rêh ni păng;

2. Nau păng sân săk ma Yêhôva, Jêh ri nau păng ton ma Nơm Brah Yakôb.

3. Na nê̆ gâp mâu mra lăp ôh tâm ngih bok ntŭk gâp gŭ, Mâu lĕ gâp mra hao ta sưng bêch;

4. Gâp mâu mra ăn măt gâp bêch ôh, Mâu lĕ geh nau rlu ndô măt gâp;

5. Kŏ gâp geh ntŭk gŭ ma Yêhôva, Du rplay ngih bok ma Nơm Brah Yakôb,

6. Aơ, he tăng bu lah ma hip nau tâm rnglăp, gŭ ta n'gor Êphratha; He saơ jêh păng tâm mir Ja ar.

7. He mra lăp tâm ngih bok păng; He mra mbah yơk ta năp ntŭk păng chrong jâng.

8. Dâk hom may, Ơ Yêhôva, văch ta ntŭk may rlu; may, jêh ri hip nau katang may.

9. Ăn phung Kôranh ƀư brah may nsoh nau sŏng srăng; Jêh ri ăn phung kloh ueh may nter hâk.

10. Yor David, oh mon may, Lơi dun ôh ma nơm may troch dak ngi

11. Yêhôva sân săk jêh ma nau nanê̆ David Păng mâu mra rgâl ôh, Gâp mra n'hao ta kalơ sưng hađăch may du huê bơh ndŭl proch may.

12. Tơlah phung kon may djôt prăp nau Gâp tâm rnglăp, jêh ri nau mbơh gâp mra sâm nti khân păng, Pô ri phung kon khân păng mra gŭ ta sưng hađăch may ƀaƀơ n'ho ro.

13. Yorlah Yêhôva săch jêh ƀon Siôn; Păng ŭch njêng ntŭk păng gŭ.

14. Ta aơ jêng ntŭk gâp ƀaƀơ n'ho ro; Gâp mra gŭ tâm păng; Yorlah gâp ŭch jêh ma păng.

15. Gâp mra ăn nau ueh uĭn ma ndơ păng sông sa; Gâp mra n'hơm ma kapŭng phung o ach păng.

16. Gâp mra sâm nsoh ma nau tâm rklaih, phung Kôranh ƀư brah păng. Jêh ri phung kloh ueh păng mra nter hâk.

17. Ta nây gâp mra ăn nŭng David kao ƀaƀơ n'ho ro. Gâp nkra jêh du mlâm ŭnh kađen ma nơm gâp troch jêh dak ngi.

18. Gâp mra sâm nsoh phung rlăng păng ma nau bêk; Ƀiă lah đon hađăch păng mra hao ta nau chrêk rmah lơn ta kalơ păng nơm.