Nau Mprơ Ơm - Đoạn 109

1. Ơ Brah Ndu, nơm gâp tâm rnê, lơi gŭ rklăk ôh;

2. Yorlah trôm mbung phung ƀai jêh ri phung ndơm ha jêh ma gâp; khân păng ngơi jêh nau mƀruh ma gâp.

3. Khân păng nchueng jêh gâp ma nau ngơi tâm rmot. Jêh ri tâm lơh đah gâp mâu geh nau.

4. Nđâp tơlah gâp rŏng ma khân păng, khân păng jêng phung rlăng đah gâp; ƀiălah gâp jao gâp nơm ma nau mbơh sơm.

5. Khân păng mplơ̆ nau mhĭk ma gâp ntrok nau ueh. Jêh ri nau tâm rmot nsro ma nau gâp rŏng.

6. Ăn du huê bunuyh ƀai mra chiă uănh păng. Ăn du huê bunuyh phong gŭ mpeh pa ma păng.

7. Tơlah bu phat dôih păng, ăn bu kơp păng tih jêh; Jêh ri ăn bu kơp, nau păng mbơh sơm jêng nau tih.

8. Ăn ƀon păng jêng djê̆, Ăn du huê nơm êng djôt kan păng.

9. Ăn phung kon păng jêng kon đơi mbơ̆, Jêh ri ur păng jêng bu ur ndrô khĭt sai.

10. Ăn phung kon păng jêng phung nsong mblêng, jêh ri nsong dan dăn ndơ bu; Ăn khân păng joi kapŭng, ngai đah ntŭk khân păng gŭ, sat rơch jêh.

11. Ăn nơm tâm pit, sŏk pit lĕ rngôch ndơ păng geh; Jêh ri ăn phung bu năch, sŏk rdu lơi play tă bơh kan păng.

12. Lơi ăn du huê ƀư ueh ma păng; Jêh ri mâu lĕ, ăn du huê yô̆ ma phung kon păng kon đơi mbơ̆.

13. Ăn bu koh lơi phung kon sau păng; Jêh ri jut lơi amoh păng tâm rnôk kandơ̆.

14. Ăn Yêhôva kah gĭt ma nau kue phung mbơ̆ păng; Jêh ri lơi jut ôh nau tih me păng.

15. Ăn khân păng gŭ ƀaƀơ ta năp Yêhôva Gay ma păng koh lơi nau kah gĭt, khân păng bơh neh ntu;

16. Yorlah khân păng mâu kah gĭt, ƀư nau yô̆ ôh. Ƀiă lah khân păng ƀư mhĭk ma phung rêh ni, ma nơm o ach. Nđâp ma nơm geh nuih n'hâm chah rai, gay ma nkhĭt lơi khân ôbăl.

17. Păng rŏng ma nau rtăp rak, jêh ri nau nây tŭp ta păng. Păng mâu maak ma nau ueh uĭn ôh, Jêh ri nau ueh uĭn du ngai đah păng.

18. Păng nsoh păng nơm ma nau rtăp rak, jêng bok ao păng. Jêh ri nau rtăp rak nây, lăp jêh tâm păng nâm bu dak. Jêh ri nâm bu ngi, gŭ tâm nting păng.

19. Ăn nau nây jêng nâm bu bok ao păng prăp nsoh. Jêh ri nâm bu du njăr rse, rêt kŭr bŭt păng rêt ƀaƀơ.

20. Tâm ban pô nây, jêng nau nkhôm ma phung rlăng gâp bơh Yêhôva; Jêh ri ma phung ngơi nau ƀai ma huêng gâp.

21. Ƀiă lah, Ơ Yêhôva, Kôranh Brah, ăn may ƀư nau yô̆ ma gâp, yor ma amoh may. Yorlah nau ueh, may jêng toyh, tâm rklaih hom gâp;

22. Gâp jêng rêh ni jêh ri o ach, Jêh ri nuih n'hâm gâp sôt jêh tâm gâp.

23. Gâp du hăn nâm bu gui trôk mhaơ. Bu chiă gâp nâm bu krah.

24. Kô mâk gâp jêng rơ-ai ma nau ver sông sa; Săk jăn mâu geh bêng ôh.

25. Gâp jêng ndơ ma khân păng rak lĕ. Tơlah khân păng saơ gâp, khân păng rteh bôk.

26. Koh dŏng gâp, Ơ Yêhôva, Brah Ndu gâp, Rklaih hom gâp, tĭng nâm nau ueh may.

27. Gay ma khân păng gĭt ti may yơh; may yơh, Ơ Yêhôva, ƀư jêh nau nây.

28. Lơi ăn khân păng suai rak, ƀiălah may ăn hom nau ueh uĭn. Tơlah khân păng dâk, bu mra ƀư bêk khân păng, Ƀiălah phung oh mon may mra răm maak.

29. Ăn phung rlăng đah gâp soh nau bêk. Ăn khân păng soh khân păng nơm, ma nau bêk, nâm bu du bu lah ao mbâl.

30. Bâr mbung gâp mra tâm rnê, hâu ngăn ngên ma Yêhôva; Nanê̆, gâp mra tâm rnê ma păng, ta nklang phung âk.

31. Yorlah păng mra gŭ râng mpeh pa ma nơm o ach. Gay tâm rklaih păng, bơh phung phat dôih huêng păng.