Nau Mprơ Ơm - Đoạn 106

1. Halêluya! Tâm rnê hom ma Yêhôva; Yorlah Păng jêng ueh; Yorlah nau ueh Păng gŭ n'ho ro.

2. Mbu dơi nkoch bri kan toyh Yêhôva ƀư jêh, Mbu dơi nkoch lĕ nau tâm rnê ma Păng?

3. Ueh maak yơh phung bu năch tĭng ndô̆ nau di, Jêh ri nơm ƀư ƀa ƀơ sŏng srăng.

4. Ơ Yêhôva, ăn may kah gĭt ma gâp, ma nau ueh may ăn ma phung ƀon lan may; Văch hom, kơl tâm rklaih gâp ƀă.

5. Gay ma gâp dơi saơ nau ueh ma phung may săch jêh, Jêh ri gŭ ueh maak đah nau phung mpôl băl may maak. Jêh ri dơi tâm rnê ma gâp nơm, ndrel ma phung drăp may krâm (dơn).

6. Hên ƀư tih jêh nâm bu phung mbơ̆ hên, Hên ƀư nau kue jêh, hên ƀư nau djơh jêh.

7. Phung mbơ̆ hên tâm bri Ejipt, mâu gĭt rbăng ma nau khlay may ƀư jêh; Khân păng mâu hôm kah gĭt ma nau ueh may ƀư âk ngăn ngên, Khân păng ƀư nau tâm rdâng ta dak rlai, ta Dak Rlai Chăng.

8. Ƀiă lah Păng tâm rklaih khân păng yor amoh Păng, Gay ma tâm mpơl nau brah Păng.

9. Păng nduyh ma Dak Rlai Chăng, jêh ri păng sơh; Pô ri păng njŭn khân păng rgăn ntŭk jru, nâm bu rgăn ndrêch rdah.

10. Păng tâm rklaih khân păng bơh ti phung tâm rmot ma khân păng, Jêh ri rklaih khân păng jêng kon me bơh ti phung rlăng.

11. Mpiăt dak nkŭm phung rlăng khân păng, Mâu geh du huê hôm ôh.

12. Rnôk nây khân păng chroh ma nau Brah Ndu ngơi; Khân păng mprơ tâm rnê ma Păng.

13. Ƀiălah phung aơ chuêl kan păng gơnh ngăn; Khân păng mâu kâp ôh ma nau Brah Ndu ntăm.

14. Ƀiălah khân păng kơnh ngăn tâm ndrêch rdah; Jêh ri khân păng rlong uănh Brah Ndu tâm ntŭk bri hŏng.

15. Brah Ndu ăn ma khân păng, moh ndơ khân păng dăn, Ƀiălah ăn huêng khân păng kƀah ngăn.

16. Khân păng nach lĕ ma Y-Môise, ta ntŭk khân păng jưh, Nđâp ma Y-Arôn, nơm kloh ueh Yêhôva.

17. Neh đang jêh ri rvăn Dathan, Jêh ri păng lŏ njĭr ta kalơ phung Abiram,

18. Ŭnh sa lĕ rngôch ndrel ma khân păng; Mpiăt ŭnh sa phung ƀai.

19. Khân păng ƀư du mlâm rup kon ndrôk tâm Hôreb. Khân păng chon mon mbah ta năp rup khân păng tŏ.

20. Pô ri khân păng tâm rgâl nau chrêk rmah khân păng. Jêng rup ndrôk blau sa gơ̆.

21. Khân păng chuêl Brah Ndu, nơm tâm rklaih khân păng, Nơm ƀư kan toyh tâm bri Êjipt

22. Kan khlay tâm bri Cham. Nau toyh ngăn ngên ta Dak Rlai Chăng.

23. Pô ri Brah Ndu lah, Păng mra ƀư rai khân păng, Ƀiălah Y-Môise, nơm Păng săch jêh, gŭ râng vah vang khân păng đah Brah Ndu, Gay tâm teng nau păng nuih, klach păng mra ƀư rai.

24. Khân păng tâm rmot ma n'gor ueh uĭn, Khân păng mâu chroh ôh ma nau Brah Ndu ngơi.

25. Ƀiălah khân păng ngơi ƀŭk dŭk suyh tâm ngih bok khân păng. Jêh ri mâu iăt ôh bâr Brah Ndu Yêhôva.

26. Pô ri Brah Ndu sân săk ma khân păng, Mra ƀư rai khân păng tâm bri rdah,

27. Jêh ri bu ƀư rai phung kon sau khân păng ta nklang phung mpôl băl, Jêh ri mprơh khân păng nchah du tâm âk rplay bri

28. Khân păng tâm rnglăp khân păng nơm đah Baal pêor, Jêh ri sa ndơ ƀư brah ma phung khĭt.

29. Pô ri khân păng djrel, nuih n'hâm Yêhôva khek ma kan khân păng; Jêh ri nau ji khĭt tưp tât ma khân păng

30. Y-Phênêas dâk ŭch ăn nau tâm rmal; Pô ri nau ji tưp nây rlu jêh,

31. Nau nây ăn nau kơp sŏng tât ma păng. Tâm lĕ rngôch rnôk ƀaƀơ n'ho ro.

32. Khân păng djrel nuih Yêhôva, khek tâm ban lĕ ta dak Mêriba, Kŏ Môise geh nau tâm rmal yor khân păng;

33. Yorlah khân păng tâm rdâng đah huêng păng; Kŏ tât păng ngơi ma nau mâu njrăng.

34. Khân păng mâu ƀư rai ôh phung ƀon lan, tĭng nâm Yêhôva ntăm jêh ma khân păng.

35. Ƀiă lah khân păng tâm rlŭk, dah phung mpôl băl êng, Jêh ri nti ƀư nâm bu phung nây,

36. Jêh ri pah kan ma rup brah phung nây, Nau nây jêng dăk sân ma khân păng.

37. Khân păng ƀư brah ma phung brah mhĭk, ma kon bu klâu nđâp ma kon bu ur khân păng,

38. Khân păng nkhŭt mham mâu geh tih, Mham kon bu klâu, jêh ri kon bu ur khân păng; Jêng ndơ ƀư brah ma rup brah bri Kanan; Jêh ri bri jêng ƀơ̆ ma mham.

39. Pô ri khân păng jêng ƀơ̆ jêh, đah kan khân păng, Jêh ri njêng khân păng, jêng ka n'hong ma kan khân păng pah.

40. Yor nây Yêhôva nuih ma phung ƀon lan păng, Jêh ri tâm rmot ngăn ma drăp păng dơn;

41. Phung jao phung Israel tâm ti phung mpôl băl êng; Phung rlăng ma khân păng chiă uănh khân păng.

42. Phung rlăng khân păng tŭn jot khân păng; Jêh ri bu nglăp khân păng tâm dâng ti phung rlăng.

43. Âk tơ̆ Brah Ndu tâm rklaih jêh khân păng; Ƀiă lah khân păng tâm rdâng. Jêh ri bu ntrŭnh khân păng yor nau kue.

44. Ƀiă lah Brah Ndu saơ nau rêh ni khân păng, Tơ lah Brah Ndu tăng nau khân păng vơh vơl;

45. Păng kah gĭt yô̆ ma phung nây, yor nau păng tâm rnglăp. Păng yô̆ an ma phung nây, yor nau ueh păng toyh ngăn.

46. Jêh ri păng ăn bu geh nau yô̆. Ta năp lĕ rngôch phung njêng khân păng, jêng bu nă.

47. Sâm rklaih hên, Ơ Yêhôva, Brah Ndu hên, Jêh ri tâm rbŭn hên bơh nklang phung mpôl băl. Gay ma hên mra tâm rnê ma amoh kloh ueh may. Jêh ri dơi tâm nau tâm rnê ma may.

48. Mât ton ma Yêhôva, Brah Ndu phung Israel. Bơh rnôk n'ho ro saơm tât rnôk n'ho ro nglĕ dŭt! Jêh ri ăn lĕ rngôch phung ƀon lan lah. Amen. Halêluya!