Nau Mprơ Ơm - Đoạn 102

1. Ơ Yêhôva, iăt hom nau gâp mbơh sơm, Jêh ri ăn nau gâp nter hao tât ta may.

2. Lơi pôn muh măt may ma gâp ôh, dôl nar gâp geh nau rêh ni; Rkêng tôr may ma gâp; Tơ lah gâp nter may plơ̆ lah ma gâp ăn gơnh.

3. Yorlah nar gâp roh, du nâm bu nhhuk ŭnh. Jêh ri nting gâp rai nâm bu ŭnh sa sa-ônh.

4. Nuih n'hâm gâp bu dong, jêh ri jêng kro nâm bu gơ̆; Kŏ gâp chuêl sa kapŭng gâp.

5. Yor bâr gâp nđêng. Nting gâp krăp đah nglay gâp.

6. Gâp jêng nâm bu sĭm djrăch djrao tâm ndrĭch rdah. Gâp jêng nâm bu klang kô tâm bri hŏng.

7. Gâp rngeh, jêh ri gâp jêng nâm bu du mlâm sĭm srai. Gŭ êng ta chor bôk pho.

8. Lĕ nar phung rlăng đah gâp suai rak ma gâp; Jêh ri phung nuih ma gâp, dŏng amoh gâp rtăp rak.

9. Yorlah gâp sa jêh buh nâm bu kapŭng. Jêh ri gâp lŭk lai dak, gâp nhêt ndrel ma dak măt.

10. Yorlah nau may ji nuih jêh ri khek; Yor may rƀiah nhŭp gâp, jêh ri mƀăr gâp ngai.

11. Nar gâp jêng nâm bu gui dăch roh; Jêh ri gâp kro jêh nâm bu gơ̆.

12. Ƀiă lah may, Ơ Yêhôva, mra gŭ n'ho ro; Jêh ri nau kah gĭt ma may tâm lĕ rngôch rnôk.

13. May mra dâk, jêh ri may yô̆ ma ƀon Siôn; Yorlah tât jêh nar yô̆ ma păng, nanê̆, nar tâm nal tât jêh.

14. Yorlah phung oh mon may rŏng ma lŭ păng, Khân păng yô̆ ma ndruyh neh păng.

15. Pô ri phung mpôl băl mra klach yơk mbah ma amoh Yêhôva, Lĕ rngôch phung hađăch ta neh ntu, mra klach yơk mbah ma nau chrêk rmah may.

16. Yorlah Yêhôva rdâk jêh ƀon Siôn, Păng tâm mpơl jêh tâm nau chrêk rmah Păng.

17. Păng kâp iăt jêh nau phung rêh ni mbơh sơm, Păng mâu tâm rmot ma nau bu mbơh sơm ôh.

18. Nau nây bu mra chih tâm rnôk kandơ̆; Jêh ri phung ƀon lan bu mra rhăk njêng pakơi, mra tâm rnê ma Yêhôva.

19. Yorlah Yêhôva uănh jêh tâm dâng bơh ngih kloh ueh Păng kalơ; Bơh trôk Yêhôva uănh ta neh ntu;

20. Ŭch iăt nau phung bu nă nđêng; Gay ma klaih phung bu jao jêh ma nau khĭt;

21. Gay ma phung bunuyh mbơh amoh Yêhôva tâm ƀon Siôn, Jêh ri nau tâm rnê Păng tâm ƀon Yêrusalem;

22. Tơ lah lĕ rngôch phung ƀon lan tâm rƀŭn, Jêh ri phung ƀon bri hađăch, gay pah kan ma Yêhôva.

23. Brah Ndu ƀư rdja jêh nau katang gâp ta trong; Păng ƀư gleh n'hŭch lơi nar gâp.

24. Gâp lah, Ơ Brah Ndu gâp, lơi sŏk gâp ta n'gul nar gâp ôh; Năm may gŭ tâm lĕ rngôch rnôk.

25. Kăl e may rhăk njêng jêh neh ntu; Jêh ri trôk jêng kan ti may nơm.

26. Khân păng mra rai lôch, ƀiă lah may ăt hôm; Nanê̆ khân păng mra mŭnh lĕ nâm bu bok ao; may mra tâm rgâl khân păng nâm bu du b lah ao, Jêh ri khân păng mra tâm rgâl;

27. Ƀiă lah may ăt hôm tâm ban, Jêh ri năm may mâu mra lĕ ôh.

28. Phung kon phung oh mon may mra gŭ hôm nâp, Jêh ri phung kon sau khân păng gŭ rjăp ta năp may.