Rôm - Đoạn 7
Bản dịch: Nau Brah Ndu Ngơi
1. Hơi phung oh nâu, yor gâp ngơi đah phung gĭt nau vay, khân may mâu gĭt hĕ nau vay chiă uănh bunuyh knŏng dôl păng hôm gŭ rêh?
2. Pôri tĭng nâm nau vay lah, bu ur geh sai tâm krêp đah sai păng dôl păng hôm gŭ rêh; ƀiălah tơlah sai păng khĭt jêh, păng klaih đah nau vay tâm krêp đah păng.
3. Pôri, dôl sai păng hôm rêh, tơlah bu ur gŭ bu klâu êng, bu mra rnha păng, bu ur văng tĭr. Ƀiălah, tơlah sai păng khĭt, păng klaih jêh ma nau vay, pôri tơlah păng gŭ sai êng, păng mâu jêng bu ur văng tĭr ôh.
4. Tâm ban lĕ, hơi phung oh nâu tâm săk jăn Brah Krist khân may khĭt jêh ma nau vay, gay ma khân may jêng ndơ bu êng, nơm nây hŏ dâk rêh jêh tă bơh phung khĭt, pô nây mơ he geh play ma Brah Ndu.
5. Yor nây dôl he gŭ rêh tĭng nâm nglay săk, nau kơnh mhĭk luh tă bơh nau vay ƀư tâm săk jăn he, jêh ri geh play ma nau khĭt.
6. Ƀiălah aƀaơ he khĭt jêh ma nau vay tŭn jot he saơm ri. He klaih jêh bơh nau vay nây jêh ri ŭch pah kan ma nau mĭn mhe bơh Brah Huêng Ueh, mâu di đah samƀŭt ơm ôh.
7. Moh he mra lah? Nau vay jêng tih lĕ? Mâu! Ƀiălah knŏng ma nau vay gâp gĭt năl nau tih. Ƀiălah tơlah nau vay mâu lah: "Lơi may kơnh ôh."
8. Pôri, ma nau vay nây nau tih njêng tâm gâp ăp ntil nau kơnh. Yorlah tơlah mâu geh nau vay, nau tih khĭt jêh.
9. Rnôk kăl e ri gâp mâu geh nau vay ôh, jêh ri gâp gŭ rêh, ƀiălah ntơm bơh nau vay tât, nau tih rêh jêh ri gâp khĭt.
10. Pôri nau vay dơi ăn, nau rêh, ƀiălah păng njŭn leo jêh gâp ma nau khĭt.
11. Yorlah ma nau vay, nau tih ndơm gâp lĕ, jêh ri yor nây păng nkhĭt jêh gâp.
12. Pôri nau vay jêng kloh, nau ntăm jêng kloh, sŏng, ueh lĕ.
13. Pôri, di lĕ nau ueh nây njêng ma gâp nau khĭt? Mâu! Ƀiălah nây jêng nau tih hŏ dŏng nau ueh nkhĭt gâp, gay nau tih dơi tâm mpơl jêng tih ngăn, jêh ri yor tă nau vay nau tih jêng lơ hâu lơn.
14. Pôri he gĭt nau vay jêng nau brah ƀiălah gâp jêng nglay săk hŏ tăch jêh ma nau tih.
15. Yorlah gâp mâu gĭt rbăng nau gâp ƀư. Gâp mâu ƀư nau gâp ŭch, ƀiălah gâp ƀư nau gâp rmot.
16. Tơlah gâp ƀư nau gâp mâu ŭch, pôri gâp gĭt nau vay jêng ueh.
17. Pôri aƀaơ aơ, mâu di gâp ôh ƀư nau nây, ƀiălah nau tih gŭ tâm gâp.
18. Gâp gĭt nau ueh mâu gŭ tâm gâp ôh, nâm bu ntĭt, tâm nglay săk gâp. Gâp geh nau ŭch, ƀiălah mâu dơi ƀư nau ueh ôh.
19. Yorlah gâp mâu ƀư nau ueh gâp ŭch ôh, ƀiălah ƀư nau mhĭk gâp mâu ŭch.
20. Pôri, tơlah gâp ƀư nau gâp mâu ŭch, mâu di gâp ôh ƀư nau nây, ƀiălah nau tih gŭ tâm gâp.
21. Gâp saơ tâm gâp nau vay pô aơ, tơlah gâp ŭch ƀư nau ueh, nau mhĭk iang ta gâp.
22. Yorlah tĭng nâm bunuyh tâm trôm nuih gâp răm ma nau vay Brah Ndu,
23. Ƀiălah gâp saơ tâm săk jăn gâp du nau vay êng tâm lơh đah nau vay gâp mĭn jêh ri nau vay nây ăn gâp jêng dĭk ma nau vay nau tih gŭ tâm săk jăn gâp.
24. Rêh ni ngăn gâp! Mbu nơm mra rklaih gâp bơh săk jăn blau khĭt aơ?
25. Lah ueh ma Brah Ndu tâm Yêsu Krist, Kôranh Brah he! Pôri yơh, ma nau mĭn gâp jêng dĭk ma nau vay Brah Ndu, ƀiălah ma nglay săk gâp jêng dĭk ma nau vay nau tih.