Nau Vay Rơh Bar - Đoạn 14

1. Khân may jêng phung kon Yêhôva Brah Ndu; lơi tor săk jăn khân may nơm mâu lah ƀư ntŭk hil ta ndăr kleng yor bunuyh khĭt.

2. Yorlah khân may jêng du phung ƀon lan kloh ueh ma Yêhôva Brah Ndu khân may, jêh ri Yêhôva săch jêh khân may ăn jêng du phung ƀon lan jêng ndơ păng nơm luh bơh lĕ rngôch phung ƀon lan gŭ ta kalơ neh ntu.

3. Lơi sa ôh du ntil mpa gâp tâm rmot.

4. Aơ ntil mpô mpa khân may dơi sa: ndrôk, biăp, be,

5. jun, njoih, njơn be bri (keh) be yôk, jĭl jêh ri biăp yôk.

6. Ăp mpa geh nchop tâm nkhah tâm dâng jêh ri kalơ ndơl jêh ri blau mƀlah sa gơ̆ đơ mpô mpa khân may dơi sa.

7. Ƀiălah đơ mpa mƀlah gơ̆ mâu lah geh nchop tâm nkhah lơi sa ôh mpa aơ seh samô, rpai, sŭk lŭ yorlah khân păng blau mƀlah gơ̆ ƀiălah mâu geh nchop tâm nkhah ôh, khân păng jêng ƀơ̆ ma khân may.

8. Jêh ri sŭr, yorlah păng mâu geh nchop tâm nkhah, ƀiălah mâu blau mƀlah gơ̆ ôh, jêng ƀơ̆ ma khân may. Lơi sa nglay khân păng ôh, jêh ri lơi pah săk jăn păng khĭt ôh.

9. Aơ lĕ mpa gŭ tâm dak khân may dơi sa ntĭl aơ: mpa geh rsâng jêh ri nsiap khân may dơi sa.

10. Jêh ri mpa mâu geh rsâng jêh ri mâu geh nsiap khân may mâu dơi sa ôh; păng jêng ƀơ̆ ma khân may.

11. Khân may dơi sa lĕ rngôch sĭm och kloh,

12. ƀiălah ntil aơ khân may mâu dơi sa ôh; klang grât, klang kok,

13. klang ƀŭng, klang ntơp tĭng nâm mpôl khân păng;

14. lĕ rngôch nđak tĭng nâm mpôl khân păng;

15. sĭm ôtrus, klang kô, sĭm te văch, klang, tĭng nâm mpôl;

16. klang kô jê̆ jêh ri klang kô toyh, sĭm njơch dak, jêh ri

17. sĭm jônh, klang sa iăm ôm, Kômôran,

18. sĭm kŭk kreo, sĭm ra dak tĭng nâm mpôl khân păng, sĭm rkleh, jêh ri rêt mbing (vât).

19. Lĕ rngôch mpa geh năr vơr ma ndŭl jêng ƀơ̆ ma khân may; bu mâu dơi sa khân păng ôh.

20. khân may dơi sa lĕ rngôch sĭm kloh geh năr.

21. Khân may mâu dơi sa ôh mlâm mpa khĭt êng păng nơm; khân may dơi ăn păng ma bu năch gŭ tâm ƀon khân may, ăn khân păng dơi sa, mâu lah khân may dơi tăch ndơ nây ma du huê bu năch; ƀiălah khân may jêng du phung ƀon lan kloh ueh ma Yêhôva Brah Ndu khân may. Lơi gâm ôh du mlâm kon be tâm dak toh me păng.

22. Ăn khân may nhhơr du kô̆ tâm jât bơh lĕ rngôch play geh bơh ntil khân may srih jêh ndơ nây luh tă bơh mir ăp năm.

23. Jêh ri ta năp Yêhôva Brah Ndu khân may tâm ntŭk păng mra săch. Gay dơm amoh păng gŭ ta nây, khân may mra sa du kô̆ tâm jât ba khân may, dak play kriăk ƀâu khân may, dak play Ôlive khân may, jêh ri kon bôk rah ndrôk mâu lah biăp khân may, gay ma khân may dơi nti klach yơk ma Yêhôva Brah Ndu khân may ƀaƀơ.

24. Tơ lah Yêhôva Brah Ndu khân may ăn nau ueh uĭn ma khân may, tơ lah trong jêng ngai ir đah khân may, pô ri khân may mâu dơi njŭn mpa du kô̆ tâm jât yorlah ntŭk nây jêng ngai ir ma khân may, ntŭk Yêhôva Brah Ndu khân may mra săch, gay dơm amoh păng ta nây,

25. pô ri khân may dơi tâm rgâl păng ma prăk jêh ri djôt tâm ti khân may, jêh ri hăn ta ntŭk Yêhôva Brah Ndu khân may mra săch,

26. jêh ri rvăt ma prăk moh mpa khân may ŭch ndrôk, biăp, dak play kriăk ƀâu, mâu lah dak ndrănh katang, moh ndơ khân may kơnh ŭch sa; jêh ri khân may mra sa ta nây ta năp Yêhôva Brah Ndu khân may jêh ri răm maak, khân may jêh ri bunuyh tâm ngih khân may.

27. Lơi dun ôh ma phung Lêvi gŭ tâm ƀon khân may, yorlah khân păng mâu geh du kô̆ neh tâm pă mâu lah drăp ndơn ndrel ma khân may ôh.

28. Tăch pe năm ăn khân may njŭn lĕ ndơ du kô̆ tâm jât, ndơ khân may geh năm nây, jêh ri bun prăp ndơ nây tâm ƀon khân may.

29. Phung Lêvi, yorlah khân păng mâu geh kô̆ tâm pă mâu lah drăp ndơn ndrel ma khân may ôh, jêh ri nơm gŭ jưh ƀât, kon đơi mbơ̆, jêh ri bu ur ndrô khĭt sai gŭ tâm ƀon khân may mra văch sa jêh ri hơm; gay ma Yêhôva Brah Ndu khân may dơi mŏt ton tâm lĕ rngôch kon ti khân may ƀư.