Nau Mprơ Ueh - Đoạn 6

1. Ta ntŭk nơm ay rŏng du hăn jêh, Hơi nơm ueh reh lơn ma phung bu ur êng? Ta ntŭk nơm ay rŏng du hăn jêh, Gay ma hên dơi joi păng ndrel ma ay?

2. Nơm gâp rŏng hăn jur leo ma n'gar trao păng rlet ma n'gar ndơ ƀâu kah, gay chiăp biăp păng tâm n'gar trao, jêh ri dônh kao lili.

3. Gâp jêng ndơ ma nơm gâp rŏng, jêh ri nơm gâp rŏng jêng ndơ gâp; păng chiăp biăp păng tâm ntŭk geh kao lili.

4. Hơi nơm gâp rŏng, ay jêng ueh ngăn nâm bu ƀon Yêrusalem, ay blau nhhu bu nâm bu du phung tahan djôt bok n'ha kơ.

5. Nhêp lơi măt ay lơi hôm treng uănh gâp, yorlah măt ay rhêp gâp, sŏk ay jêng nâm bu phung be njŭr sop pĭng yôk Galaat.

6. Sêk ay jêng nâm bu du phung biăp me, hao văch tă bơh ntŭk khân păng ŭm, lĕ rngôch khân păng deh kon bar, jêh ri mâu geh du mlâm rlêh kon ôh.

7. Trô bom ay jêng nâm bu ôlu đah play pom granat pakơi bok nkŭm muh măt ay.

8. Geh prao jê̆t nuyh hađăch bu ur jêh ri pham jê̆t nuyh ur yông, jêh ri phung bu ur druh mâu dơi kơp ôh.

9. Plŭk gâp, nơm ueh ngăn ngên gâp, jêng kanŏng du huê dơm, nơm me păng rŏng lơn mâu geh ntŭk mhĭk ôh ma mê̆ nơm deh ma păng. Phung bu ur druh saơ păng jêh ri ntơ ma păng nơm hâk răm; Nđâp phung hađăch bu ur jêh ri Phung ur yông saơ păng jêh ri tâm rnê ma păng.

10. Mbu nơm aơ uănh nâm bu nchrat luh nar, ueh nâm bu khay, nchrang nâm bu măt nar, blau nhhu bu nâm bu du phung tahan djôt bok n'ha kơ?

11. Gâp jŭr hăn ta n'gar play nhăr gay uănh ma kao tâm rlŭng, gay saơ gĭt lah tơm play kriăk ƀâo chăt nkŭr jêh, gĭt lah play pom granat lĕ kao jêh.

12. Gâp ntôn lah, nâm bu mbơi gâp gŭ tâm du mlâm ndeh she ta meng kon hađăch gâp.

13. Sĭt hom, sĭt hom, Hơi bu ur ƀon Sulam, Sĭt hom, sĭt hom gay ma hên dơi uănh ay.