Y-Mathiơ - Đoạn 9

1. Brah Yêsu ncho plŭng, rgăn dak mƀŭt, jêh ri plơ̆ ta ƀon Păng nơm.

2. Jêh ri aơ, bu tung njŭn ma Păng du huê bunuyh rvĕn gŭ bêch ta sưng. Brah Yêsu saơ nau rnơm phung nây. Păng lah ma bunuyh rvĕn: "Hơi kon gâp ơi, maak hom may yorlah nau tih may yô̆ an jêh."

3. Dôl nây geh phung kôranh nchih samƀŭt, mĭn tâm nuih n'hâm khân păng: "Bunuyh aơ ngơi sưr."

4. Ƀiălah Brah Yêsu hŏ gĭt jêh nau mĭn khân păng lah pô aơ: "Mâm ƀư khân may geh nau mĭn mhĭk pôri tâm nuih n'hâm khân may?

5. Moh nau ngơi di lơn: 'Nau tih may yô̆ an jêh!' Mâu lah.' Dâk hom may jêh ri hăn.'

6. Ƀiălah ŭch ăn khân may gĭt ma Kon Bunuyh ta neh ntu aơ dơi yô̆ an nau tih" Brah Yêsu lah tay ma bunuyh rvĕn "Dâk hom may, sŏk sưng may, jêh ri sĭt ta ngih may."

7. Pôri păng dâk ro, jêh ri sĭt ma ngih.

8. Saơ nau khlay nây, phung bunuyh âk klach ngăn jêh ri khân păng mŏt ton ma Brah Ndu, yorlah Păng ăn nau dơi nâm bu pô nây ma bunuyh.

9. Brah Yêsu du tă bơh nây. Păng saơ du huê bunuyh amoh păng Y-Mathiơ, gŭ ta sưng riu pi, Brah Yêsu lah ma păng: "Tĭng gâp!" Păng dâk jêh ri tĭng Brah Yêsu ro.

10. Dôl Brah Yêsu gŭ sông sa ta ngih Y-Mathiơ, geh âk phung riu pi jêh ri phung tih hăn gŭ sông sa ndrel ma Brah Yêsu, jêh ri phung oh mon Păng ta nây.

11. Phung Pharisi saơ pô nây, khân păng lah ma phung oh mon Brah Yêsu: "Mâm ƀư kôranh nơm nti khân may, sông sa ndrel ma phung riu pi, jêh ri đah phung tih?"

12. Brah Yêsu tăng nau nây jêh ri lah ma khân păng: "Mâu di phung ngăch săk jăn ôh ŭch ma nai dak si, ƀiălah phung ji kuet.

13. Hăn hom jêh ri nti ăn gĭt nâm bu ntĭt nau ngơi aơ: Gâp ŭch nau yô̆ an, mâu di ndơ ƀư brah ôh. Yorlah gâp văch mâu di ŭch kuăl phung sŏng ôh, ƀiălah phung tih."

14. Dôl nây phung oh mon Y-Yôhan hăn ta Brah Yêsu jêh ri lah: "Mâm ƀư hên jêh ri phung Pharisi ât sông sa, ƀiălah phung oh mon may mâu ât sông sa ôh?"

15. Brah Yêsu plơ̆ lah ma khân păng: "Phung mĭt jiăng bu klâu ntơm gŭ ur, dơi lĕ ât sông sa dôl bu klâu nây gŭ ndrel đah khân păng? Ƀiălah tât ta nar bu kuăl bu klâu nây du tă bơh khân păng, khân păng mra ât sông sa.

16. Mâu mâp ôh geh bunuyh koh du blah bok mhe ŭch jĭm ndop ta du blah bok ơm, yorlah bok mhe mra ƀư sat bok ơm jêh ri trôm sat mra khêk huy lơn.

17. Mâu lĕ bu troch dak play kriăk ƀâu mhe tâm dŭng ntâu ơm tơlah troch pô nây dŭng mra rai, ƀiălah bu troch dak play kriăk ƀâu mhe tâm dŭng mhe, jêh ri bu dơi prăp lĕ bar ăn ueh."

18. Dôl păng gŭ ngơi nau nây, geh du huê kôranh ngih brah, văch chon mon mbah tra năp Păng jêh ri lah pô aơ: "Kon bu ur gâp khĭt jêh mhe aơ pơ, văch hom, pah ti may ta păng jêh ri păng mra rêh tay."

19. Brah Yêsu dâk tĭng kôranh ngih brah nây ndrel ma phung oh mon păng.

20. Jêh ri aơ, geh du huê bu ur ji rung mham geh jât ma bar năm jêh, hăn êp pakơi Păng jêh ri pah ta n'gar ao Brah Yêsu.

21. Yorlah păng mĭn tâm nuih n'hâm păng: "Tơlah gâp pah ta ao Păng, gâp mra bah ro."

22. Brah Yêsu n'gĭl uănh ma păng jêh ri lah: "Maak hom ay, hơi kon bu ur gâp, nau chroh ay yơh ƀư bah ay jêh." Jêh ri mông nây ro bu ur bah nau ji păng.

23. Tơlah Brah Yêsu tât ta ngih kôranh ngih brah, Păng saơ phung uh nŭng, uh mbuăt jêh ri bunuyh âk ƀư nhau nhau,

24. Păng lah ma phung nây: "Luh hom khân ay may, bu ur jê̆ aơ mâu khĭt ôh, păng bêch." Pôri lĕ rngôch bunuyh mưch ma Păng.

25. Jêh phung âk luh padih Brah Yêsu lăp, kuăn ti bu ur jê̆ nây jêh ri păng dâk ro.

26. Jêh ri nau mhe mhan ueh aơ lư lam n'gor nây.

27. Dôl Brah Yêsu du tă bơh ntŭk nây, geh bar hê bunuyh chieh măt groi pakơi Păng ma nau nter lah: "Hơi kon Đavit, yô̆ an ma hên ƀă."

28. Jêh Păng lăp tâm ngih, phung bunuyh chieh măt nây văch, jêh ri Brah Yêsu lah ma khân păng: "Khân may rnơm lĕ gâp dơi ƀư nau khân may ŭch?" Khân păng lah: "Hơi Kôranh, hên rnơm ngăn."

29. Brah Yêsu bi măt khân păng jêh ri lah: "Ăn nau aơ tât ngăn, tĭng nâm nau khân may chroh."

30. Jêh pah, măt khân păng lin ro. Brah Yêsu lah ma: "Khân păng ma nau săr lah, njrăng hom, lơi ăn bunuyh êng gĭt ôh nau aơ."

31. Ƀiălah jêh khân păng luh padih, khân păng mbơh nau lư n'găr Brah Yêsu lam bri nây.

32. Dôl khân păng luh, bu njŭn ma Brah Yêsu du huê bunuyh mlo brah mhĭk lơh.

33. Tơlah brah djơh luh jêh, bunuyh mlo nây blau ngơi. Phung âk gŭ ta nây hih rhâl, jêh ri lah: "Mâu, mâu mâp saơ ôh nau aơ tâm bri Israel."

34. Ƀiălah phung Pharisi lah: "Păng mprơh brah mhĭk tâm amoh kon hđăch brah mhĭk."

35. Brah Yêsu hăn tâm ăp ƀon toyh ƀon jê̆, nti tâm ngih rƀŭn Yuđa nau mhe mhan ueh ƀon bri hđăch Brah Ndu, jêh ri ƀư bah ăp ntil nau ji.

36. Tơlah saơ phung âk Brah Yêsu geh nau yô̆ ma khân păng, yorlah khân păng jêng rêh ni jêh ri nhhơt nkhah du êng êng nâm bu phung biăp mâu geh rmăk.

37. Jêh nây Brah Yêsu lah ma phung oh mon Păng: "Geh âk ba ŭch rek, ƀiălah geh djê̆ bunuyh rek.

38. Pôri yơh, dăn hom ma kôranh mir ăn păng njuăl hom bunuyh hăn rek."