Y-Luk - Đoạn 1

1. Geh âk jêh bunuyh pah kan ŭch nchih nkoch bri nau tât tâm phung he,

2. tĭng nâm phung nây njuăl jêh ma he bơh lor, ri khân păng jêng phung saơ, jêh ri phung nơm nti Nau Brah Ndu Ngơi.

3. Gâp tâm ban lĕ, mĭn ueh. Hơi Y-Thêôphil, nơm ueh ngăn, jêh gâp sek nanê̆ lĕ rngôch nau nây ntơm bơh tơm, ŭch nchih may ma nau di.

4. Pô nây may mra gĭt ngăn ma lĕ nau may tăng jêh.

5. Rnôk Hêrôt jêng hđăch phung Yuđa, geh du huê kôranh ƀư brah amoh păng Y-Sakari, tă bơh phung Abia Ur păng tă bơh mpôl băl Y-Arôn amoh păng H'Êlisabet.

6. Lĕ khân păng bar hê gŭ sŏng ta năp Brah Ndu, khân păng tĭng ndô̆ nau ngăn lĕ nau vay jêh ri nau Kôranh Brah ntăm.

7. Ƀiălah khân păng mâu geh kon ôh, yorlah H'Êlisabet jêng bu ur mâu dơi deh kon, jêh ri lĕ khân păng bar hê ranh jêh dadê.

8. Pô nây Y-Sakari tĭng lor, nglĕ tâm băl păng, gay ma ƀư Kôranh ƀư brah ta năp Brah Ndu,

9. tĭng nâm nau vay phung kôranh ƀư brah, kan di ma păng ăn lăp gŭch ndơ ƀâu kah tâm ntŭk kloh Kôranh Brah.

10. Jêh ri lĕ rngôch padih gŭ mbơh sơm dôl gŭch ndơ ƀâu kah.

11. Ƀâtlât geh du huê tông păr ueh Kôranh Brah dâk mpeh bơh ma nơng gŭch ndơ ƀâu kah tâm mpơl ma Y-Sakari.

12. Jêh saơ tông păr ueh nây păng geh nau uh ah jêh ri klach ngăn.

13. Ƀiălah tông păr ueh lah ma păng: "Lơi klach ôh hơi Y-Sakari, yorlah Brah Ndu tăng jêh nau may mbơh sơm, ur may H'Êlisabet mra deh ma du huê kon se jêh ri may mra tâm amoh păng Y-Yôhan.

14. May mra geh nau răm jêh ri maak ngăn yor nau deh ma păng.

15. Yorlah păng mra jêng toyh ta năp Kôranh Brah. Păng mâu mra nhêt ndrănh ôh mâu lah dak ƀaƀă vay ƀư nhŭl bunuyh, jêh ri păng mra bêng ma Brah Huêng Ueh ntơm bơh ndŭl mê̆.

16. Păng mra njŭm leo âk phung kon Israel ma Kôranh Brah Ndu khân păng.

17. Păng mra sak nsong ta năp Kôranh Brah, ma nau mĭn jêh ri nau brah Y-Êli gay ma tâm rle nuih n'hâm phung mbơ̆ đah phung kon khân păng, jêh ri phung dăng bôk ma nau gĭt mĭn phung nuih sŏng, gay ma nkra du phung mpôl băl ăn ueh ma Kôranh Brah."

18. Y-Sakari lah ma tông păr ueh nây: "Mâm gâp dơi gĭt nau nây? Yorlah gâp ranh jêh jêh ri ur gâp ranh lĕ."

19. Tông păr ueh plơ̆ lah ma păng: "Gâp jêng Gabriel, nơm gŭ ta năp Brah Ndu. Njuăl gâp văch mbơh ma may nau mhe mhan ueh aơ.

20. Nĕ, aơ may mra jêng mlo, jêh ri mâu dơi ngơi ôh tơlah nau nây tât, yorlah may mâu chroh ma nau gâp ngơi. Nau nây mra jêng ngăn tơlah tât nar păng."

21. Dôl nây bunuyh ƀon lan gŭ kâp Y-Sakari, jêh ri hih rhâl mâm ƀư păng gŭ jŏ tâm ntŭk kloh.

22. Tơlah păng du luh păng mâu dơi ngơi đah bu ôh, jêh ri bu gĭt păng hŏ geh nau bu tâm mpơl tâm ntŭk kloh. Păng tâm ntĭt ma phung nây jêh ri păng hôm jêng mlo.

23. Tơlah lôch nar păng pah kan ƀư brah, păng sĭt ta ngih păng.

24. Jŏ djê̆ ma nây, ur păng H'Êlisabet ntreo. Păng gŭ pôn dôl tâm prăm khay, jêh ri păng lah:

25. "Kôranh Brah ƀư nau yô̆ ma gâp, gay sŏk lơi nau prêng tă bơh gâp ta năp bunuyh."

26. Prau khay pakơi Brah Ndu njuăl Gabriel tông păr ueh păng hăn ta du ƀon tâm n'gor Galilê tâm moh ƀon Nasaret.

27. Păng hăn ta du huê bu ur druh, tâm mbloh jêh đah du huê, moh Y-Yôsep, tâm mpôl băl Y-Đavit. Bu tâm amoh bu ur druh nây H'Mari.

28. Tông păr ueh lăp tâm ngih păng jêh ri lah ma păng: "Gâp mbah ay, nơm Brah Ndu yô̆, Kôranh Brah gŭ ndrel ma ay!"

29. Tơlah H'Mari tăng nau ngơi nây păng geh nau hih rhâl jêh ri ôp êng păng nơm, mâm ƀư geh nau mbah pô nây.

30. Tông păr ueh lah ma păng: "Lơi klach ôh, hơi H'Mari yorlah ay geh jêh nau yô̆ ta năp Brah Ndu.

31. Nĕ aơ, ay mra ntreo jêh ri deh ma du huê kon ay mra amoh Păng jêng Yêsu.

32. Păng jêng toyh jêh ri bu mra kuăl ma Păng Kon Nơm Klơ Lơn, jêh ri Brah Ndu mra ăn ma Păng sưng hđăch Y-Đavit, Mbơ̆ Păng.

33. Păng mra jêng hđăch ƀaƀơ n'ho ro tâm mpôl băl Y-Yakôp jêh ri ƀon bri hđăch păng mâu blau lôch mâu blau dŭt ôh."

34. H'Mari lah ma tông păr ueh nây: "Mâm ƀư nau nây dơi tât? Yorlah gâp ê geh sai?"

35. Tông păr ueh plơ̆ lah ma păng: "Brah Huêng Ueh mra ăn ma ay, jêh ri nau brah tă bơh Nơm Klơ Lơn mra nkŭm ay; yor nây bu mra kuăl Kon Brah Ndu ma Kon Kloh Ueh ay mra deh!

36. Tari prau khay jêh du huê mpôl băl ay H'Êlisabet ntreo tâm ban lĕ ma du huê kon. Dôl păng lĕ ranh. Păng yơh bu lah jêng bu ur mâu dơi deh kon.

37. Yorlah mâu geh du ntil ndơ Brah Ndu mâu dơi ƀư."

38. H'Mari plơ̆ lah: "Gâp jêng oh mon bu ur ma Kôranh Brah. Ăn nau nây mra tât tĭng nâm nau may lah jêh." Jêh ri tông păr ueh luh du.

39. Dôl nây H'Mari dâk hăn ngăch tâm ntŭk yôk ta du ƀon n'gor Yuđa.

40. Păng lăp tâm ngih Y-Sakari jêh ri mbah ma H'Êlisabet.

41. Tơlah H'Êlisabet tăng nau H'Mari mbah, kon păng tâm ndŭl mpât răm rhơn, jêh ri H'Êlisabet bêng ma Brah Huêng Ueh.

42. Dôl nây păng ngơi huy: "Ay yơh geh nau ueh maak tâm phung bu ur jêh ri kon tă bơh ndŭl ay mra geh nau ueh uĭn!

43. Mâm ƀư nau aơ tât ma gâp, kŏ mê̆ Kôranh Brah gâp văch dăch ma gâp?

44. Yorlah tơlah jêh gâp tăng nau ay mbah ma gâp, kon jê̆ tâm ndŭl gâp mpât rhơn.

45. Ueh maak yơh ma bu ur geh nau chroh, yorlah nau Kôranh Brah mbơh jêh ma păng mra tât ngăn."

46. Jêh ri H'Mari lah: "Nuih n'hâm gâp mĭn ŭch mŏt ton ma Kôranh Brah.

47. Jêh ri huêng gâp geh nau maak tâm Brah Ndu, Nơm Tâm Rklaih gâp.

48. Yorlah păng uănh jêh nau phung tông păr bu ur tông yơk. Aơ lĕ ngôch mpôl băl ma nar kăndơ̆ mra lah ma gâp geh nau răm maak.

49. Yorlah Nơm Brah ngăn ƀư jêh nau khlay ngăn ma gâp, Amoh Păng kloh ngăn.

50. Nau Păng yô̆ tât tâm lĕ rngôch rnôk ma phung klach yơk mbah ma Păng.

51. Păng tâm mpơl jêh nau ktang tă bơh ti Păng, Păng mprơh jêh phung geh nau mĭn sưr.

52. Păng tŭn ăn tŭp lơi phung ktang tă bơh sưng hđăch khân păng. Jêh ri Păng n'hao phung blau mbah yơk.

53. Păng n'hơm phung ji ngot ma ndơ kah. Jêh ri Păng mprơh phung ndrŏng jêng dơm dam.

54. Păng kơl jêh Israel, tông păr Păng. Jêh ri Păng kah gĭt nau Păng yô̆.

55. Tâm ban ma Păng lah jêh ma phung mbơ̆ he, ma Y-Abraham jêh ri ma phung kon sau Păng ƀaƀơ ƀaƀơ."

56. H'Mari gŭ ndrel ma H'Êlisabet tâm pe khay. Jêh ri păng plơ̆ sĭt ta ngih păng nơm.

57. Nar H'Êlisabet n'gơch tât jêh. Păng deh ma du huê kon.

58. Phung chiau meng jêh ri phung ndŭl mpôl păng tăng nau Kôranh Brah tâm mpơl jêh ma păng, âk nau yô̆ jêh ri khân păng răm maak ndrel ma păng.

59. Tâm nar pham khân păng văch ŭch koh ntâu kon se jê̆ nây, jêh ri khân păng tâm amoh Y-Sakari, kơt amoh mbơ̆ păng.

60. Ƀiălah mê̆ păng lah: "Mâu! Tâm amoh păng Y-Yôhan."

61. Bu lah ma păng: "Mâu geh du huê tâm phung khân ay may geh amoh tâm ban pô nây."

62. Pôri khân păng tâm ntĭt ma mbơ̆ păng ŭch gĭt mâm păng ŭch tâm amoh kon se jê̆ nây.

63. Y-Sakari dăn kđar jê̆ jêh ri nchih pô aơ: "Amoh păng Y-Yôhan." Jêh ri lĕ rngôch khân păng hih rhâl.

64. Ƀâtlât păng hă mbung, mpiăt păng mpât mbrơi, ngơi tâm rnê mŏt ton ma Brah Ndu.

65. Lĕ rngôch bunuyh tâm ƀon chiau meng geh nau klach, jêh ri bu nkoch bri ma lĕ rngôch nau nây tâm n'gor yôk Yuđa.

66. Lĕ rngôch phung tăng nau aơ djôt prăp tâm nuih n'hâm khân păng, jêh ri lah: "Mâm kon se nây mra jêng!" Jêh ri ti Kôranh Brah gŭ ndrel ma păng.

67. Y-Sakari, mbơ̆ păng bêng ma Brah Huêng Ueh, mbơh lor pô aơ:

68. "Mŏt ton ma Kôranh Brah Ndu Israel, yorlah Păng khâl jêh ri tâm chuai jêh phung mpôl băl Păng.

69. Jêh ri Păng ăn ma he du huê Nơm Tâm Rklaih Brah tâm ngih Y-Đavit, tông păr păng.

70. Tâm ban ma Păng mbơh jêh ma bâr mbung phung Kôranh nơm mbơh lor gŭ ueh ntơm bơh kăl e ri.

71. Nau rklaih he bơh phung rlăng jêh ri bơh ti lĕ rngôch phung tâm rmot đah he.

72. Pôri yơh, Păng tâm mpơl nau Păng yô̆ âk ma phung mbơ̆ he, jêh ri kah gĭt ma nau păng tâm rnglăp kloh ueh.

73. Tĭng nâm nau păng sân săk đah Y-Abraham, mbơ̆ he.

74. Jêh Păng ăn he jêng kon me tă bơh ti phung rlăng, Păng mra ăn ma he dơi pah kan ma Păng mâu geh nau klach ôh.

75. Dôl hăn ta năp Păng tâm nau kloh ueh jêh ri nau sŏng lĕ nar he gŭ rêh.

76. Bi may, hơi kon se jê̆, bu mra kuăl ma may kôranh nơm mbơh lor ma Nơm ta klơ: Yorlah may mra hăn ta năp Kôranh Brah gay nkra trong Păng.

77. Ŭch ăn ma phung mpôl băl Păng nau gĭt rbăng ma nau tâm rklaih ma nau yô̆ an nau tih khân păng.

78. Yor nau yô̆ rdơ̆ rbăn bơh Brah Ndu he. Nar luh jêh ma he tă bơh klơ trôk.

79. Gay ma sol phung gŭ tâm nau ngo, jêh ri tâm dâng gui nau khĭt. Jêh ri gay ma njŭn leo he hăn tâm trong đăp mpăn."

80. Pôri kon se jê̆ nây văch ma toyh, jêh ri nuih n'hâm mĭn jêng ktang. Păng gŭ tâm bri rdah tât nar păng tâm mpơl păng nơm ma phung Israel.