Kan Lêvi - Đoạn 3
Bản dịch: Nau Brah Ndu Ngơi
1. Tơ lah du huê bunuyh nhhơr ndơ ƀư brah jêng ndơ nhhơr ma nau đăp mpăn, tơ lah păng nhhơr du mlâm ndrôk, nkuăng mâu lah me, ăn păng nhhơr mpa nây mâu geh ntŭk iơh ôh ta năp Yêhôva.
2. Ăn păng pah ti ta bôk mpa păng nhhơr jêh ri sreh păng ta bôk mpông ngih bok nau tâm rƀŭn; jêh ri phung kon bu klâu Y-Arôn phung Kôranh ƀư brah mra nkhŭt mham jŭm rvăch nơng.
3. Bơh nau ƀư brah nhhơr mpa ma nau đăp mpăn, jêng mpa nhhơr ăn ŭnh sa ma Yêhôva. Păng mra nhhơr ngi krêp proch khŭng jêh ri lĕ rngôch ngi iang ta proch khŭng,
4. bar mlâm leh ndrel ma ngi krêp nsrom khân păng ta bŭt, jêh ri rsiôm ta klơm, ndơ nây păng mra sŏk ndrel ma leh,
5. phung kon bu klâu Y-Arôn mra gŭch păng ta nơng ta kalơ mpa nhhơr gŭch gŭ ta kalơ long ŭnh dôl hit; păng jêng ndơ nhhơr ăn ŭnh sa, n'hôl ƀâu kah tât ma Yêhôva.
6. Tơ lah mpa păng nhhơr prăp ma nau ƀư brah nhhơr mpa ma nau đăp mpăn ma Yêhôva jêng du mlâm biăp, be, nkuăng mâu lah me, ăn păng nhhơr mpa mâu geh ntŭk iơh ôh.
7. Tơ lah păng nhhơr du mlâm kon biăp jêng mpa nhhơr, ăn păng nhhơr ta năp Yêhôva,
8. pah ti păng ta kalơ bôk mpa păng nhhơr, jêh ri sreh păng ta năp ngih bok nau tâm rƀŭn. Phung kon bu klâu Y-Arôn mra nkhŭt mham păng jŭm rvăch nơng.
9. Bơh nau ƀư brah nhhơr mpa ma nau đăp mpăn jêng du ntil mpa nhhơr ăn ŭnh sa ma Yêhôva, păng mra nhhơr ngi păng lĕ tơm chiăng dăch nting kuyh, ngi krêp proch khŭng,
10. jêh ri bar mlâm leh ndrel ma ngi krêp păng ta bŭt jêh ri rsiôm ta klơm, ndơ nây păng mra sŏk ndrel ma leh.
11. Kôranh ƀư brah mra gŭch păng ta kalơ nơng, jêng ndơ sông sa nhhơr ăn ŭnh sa ma Yêhôva.
12. Tơ lah mpa păng nhhơr jêng du mlâm be, ăn păng nhhơr ta năp Yêhôva
13. pah ti păng ta kalơ bôk, jêh ri sreh păng ta năp ngih bok nau tâm rƀŭn. Jêh ri phung kon bu klâu Y-Arôn mra nkhŭt mham jŭm rvăch nơng.
14. Păng mra nhhơr jêng mpa nhhơr ăn ŭnh sa ma Yêhôva, ngi krêp proch khŭng jêh ri lĕ rngôch ngi iang ta proch khŭng
15. jêh ri bar mlâm leh ndrel ma ngi krêp nsrom păng ta bŭt, jêh ri rsiôm ta klơm, ndơ nây păng mra sŏk ndrel ma leh.
16. Kôranh ƀư brah mra su ndơ nây ta kalơ nơng jêng ndơ sông sa nhhơr ăn ŭnh sa, jêng ndơ ƀâu kah. Lĕ rngôch ngi jêng ndơ Yêhôva.
17. Aơ mra jêng du ntil nau vay ƀaƀơ tâm lĕ rngôch rnôk khân may, tâm lĕ rngôch ntŭk khân may gŭ, lơi ta khân may sa ngi mâu lah mham ôh.