Nau Tâm Mpơl - Đoạn 16

1. Jêh ri gâp tăng bâr ngơi ktang luh bơh ntŭk kloh, jêh ri păng lah ma phung pơh nuyh tông păr ueh Brah Ndu: "Hăn hom, jêh ri nkhŭt ta neh ntu pơh kchok nau Brah Ndu ji nuih!"

2. Tông păr ueh rơh nguay hăn jêh ri nkhŭt kchok păng ta neh ntu. Jêh ri geh eh ji ngăn geh ma phung bunuyh geh nau nchih tă bơh jun jêh ri mbơh rup păng.

3. Tông păr ueh rơh bar nkhŭt kchok păng tâm dak mƀŭt jêh ri dak mƀŭt jêng mham nâm bu du huê bunuyh khĭt, jêh ri lĕ rngôch mpa rêh gŭ tâm dak mƀŭt khĭt lĕ.

4. Tông păr ueh rơh pe nkhŭt kchok păng tâm dak krong jêh ri tâm tu dak, jêh ri khân păng jêng mham.

5. Jêh ri gâp tăng tông păr ueh chiă dak lah: "May jêng sŏng tâm nau may phat dôih, Ơ Nơm Kloh Ueh, Nơm jêng jêh ri Nơm jêng jêh.

6. Yorlah păng nkhŭt jêh mham phung kloh ueh jêh ri phung kôranh nơm mbơh lor, jêh ri may ăn jêh ma khân păng nhêt mham khân păng khư ma nau nây!"

7. Jêh ri gâp tăng nơng ƀư brah nter lah: "Nanê̆, ơ Kôranh Brah Ndu, Nơm Brah Lơn, nau may phat dôih jêng ngăn jêh ri sŏng."

8. Tông păr ueh rơh puăn nkhŭt kchok păng ta nar, jêh ri păng ăn nar su bunuyh ma ŭnh.

9. Jêh ri nar duh hâu ngăn su bunuyh, jêh ri khân păng suai rak ma amoh Brah Ndu, Nơm geh nau dơi ma nau ƀư rêh ni nây. Jêh ri khân păng mâu rmal ôh ma nau tih khân păng, gay ma ăn nau chrêk rmah ma Brah Ndu.

10. Tông păr ueh rơh prăm nkhŭt kchok păng ta sưng hđăch jun, jêh ri ƀon bri hđăch păng nkŭm ma nau ngo, jêh ri phung bunuyh kăp mpiăt khân păng yor nau rêh ni.

11. Khân păng suai rak ma Brah Ndu tâm trôk yor nau ji jêh ri yor eh khân păng, jêh ri khân păng mâu rmal ôh ma kan khân păng ƀư.

12. Tông păr ueh rơh prao nkhŭt kchok păng tâm dak krong toyh Ơprat, jêh ri dak suăt, gay ma nkra trong ma phung hđăch văch tă bơh n'gor lơ.

13. Jêh ri gâp saơ luh tă bơh mbung bêh nhŭk nhăk, tă bơh mbung jun, jêh ri bơh trôm mbung kôranh nơm mbơh lor tih pe brah ƀơ̆ nâm bu phung kĭt.

14. Yor khân păng jêng phung huêng brah mhĭk ƀư nau khlay, jêh ri khân păng hăn ma phung hđăch lam neh ntu, gay ma rgum phung nây ma nau tâm lơh ta nar toyh Brah Ndu Nơm Brah Lơn.

15. "Aơ, gâp văch nâm bu du huê bunuyh ntŭng! Ueh maak yơh mbu nơm gŭ njrăng, jêh ri mât mray ma bok ao păng, gay ma lơi ăn păng rhôk jêh ri lơi ăn bu saơ nau bêk păng!"

16. Khân păng tâm rƀŭn phung nây tâm ntŭk bu rnha tâm nau Hêbrơ Harmagêdôn.

17. Tông păr ueh rơh pơh nkhŭt kchok tâm trôk nđôch, jêh ri bơh ntŭk kloh, bơh sưng hđăch, luh du bâr ngơi ktang lah: "Kan lĕ jêh!"

18. Jêh ri geh lơp nchrat bâr ngơi nglaih, jêh ri nau n'găr neh ntu ktang. Mâu mâp geh nau sâr neh ntu ktang nâm bu nĕ, ntơm bơh bunuyh gŭ ta neh ntu.

19. Jêh ri ƀon toyh tâm pă jêng pe gâl, jêh ri phung ƀon toyh tâm phung mpôl băl tŭp lĕ, jêh ri Brah Ndu kah gĭt ma Ƀon Babilôn toyh, gay ma ăn păng nhêt kchok ndrănh nau păng ji nuih hâu ngăn.

20. Jêh ri lĕ rngôch kôdak mƀŭt du, jêh ri bu mâu hôm saơ phung yôk ôh.

21. Geh pler toyh jâk bar jât ma prao kilô, tă bơh trôk tŭp ta bunuyh jêh ri phung bunuyh suai rak ma Brah Ndu yor nau rêh knap tă bơh pler. Yorlah nau rêh ni nĕ jêng toyh ngăn.