Y-Yôp - Đoạn 9

1. Y-Yôp plơ̆ lah ma Y-Bildat:

2. N'hêl nanê̆ gâp gĭt nau nây jêng di; ƀiălah mâm kon bunuyh ƀư gay dơi geh nau sŏng tra năp măt Brah Ndu?

3. Tơlah bu ŭch tâm dun đah Brah Ndu, bu mâu dơi plơ̆ sĭt lah ma păng ôh du tơ̆ tâm du rbăn, kŏ mâu geh lĕ.

4. Brah Ndu geh nau mĭn blau, jêh ri bêng ma nau brah… Mbu moh ƀư dăng đah Păng dơi ueh lĕ?

5. Brah Ndu yơh dơi rlơk trơn yôk, jêh ri nklơ̆ rlă khân păng yor nau păng ji nuih, ƀiălah yôk mâu gĭt ôh.

6. Păng rgu neh ntu tă bơh mbon păng, jêh ri lĕ meh păng mpât n'gơ.

7. Păng ntĭnh ma măt nar, jêh ri păng mâu hôm luh ôh. Păng nkŭm mănh mâu ăn khân păng chrang ôh.

8. Kanŏng êng Păng dơm ling ăn dĭ trôk, jêh ri chuat hăn ta kalơ n'ha dak rbuh.

9. Păng njêng mănh Mbing, mănh Ôritôn, mănh Plêat jêh ri mănh tâm bri rđŭng.

10. Păng ƀư lĕ kan toyh ngăn rmeh ma nau gĭt rbăng, jêh ri nau khlay mâu hôm dơi kơp ôh.

11. Aơ, Păng hăn rgăn dăch gâp, jêh ri gâp mâu saơ Păng ôh; Păng hăn n'hot, ƀiălah gâp mâu năl Păng ôh.

12. Tơlah Păng nhŭp rdu, mbu nơm dơi buay păng? Mbu nơm dơi lah păng: 'Moh may ƀư nây?'

13. "Brah Ndu mâu dơi djoh ôh nau Păng ji nuih; Phung kơl Rahap chon mon tâm dâng Păng,

14. Pônây mâm gâp dơi plơ̆ sĭt lah ma Păng, jêh ri joi rplay ngơi gay tâm dun đah Păng!

15. Nđâp tơlah gâp gŭ sŏng kađôi lĕ, ăt gâp mâu jo lĕ tâm dun đah Păng; ƀiălah kanŏng gâp vơl dăn nau yô̆ bơh Nơm phat dôih ma gâp.

16. Tơlah gâp vơl dăn ma Păng jêh ri Păng plơ̆ lah ma gâp, gâp mâu hŏ lah nchroh ôh Păng iăt jêh nau ngơi gâp.

17. Yorlah Păng ăn phŭt chuănh ƀư chalôt gâp, jêh ri lơ hâu ntop nau sôt gâp âk lơn mâu geh nau ôh.

18. Păng mâu ăn ôh gâp nsôr n'hâm ƀiălah Păng mbêng gâp ma nau rngot ngăn ngên.

19. Tơlah tâm rlong ma nau dăng katang, Păng yơh geh nau dơi! Tơlah ma nau phat dôih, Păng lah: "Mbu nơm janh nduyh nkra gâp?"

20. Nđâp tơlah gâp gŭ sŏng kađôi lĕ, trôm mbung gâp mra ngơi mpơl jêh nau tih gâp nơm; nđâp tơlah gâp jêng sŏng srăng păng mra ăn n'hêl nanê̆ gâp jêng kue.

21. Nđâp tơlah gâp mâu geh tih, gâp nkoch êng gâp nơm mâu khlay ôh; gâp tâm rmot ma nau rêh gâp.

22. Lĕ rngôch tâm ban da dê, yor nây gâp lah: 'Păng ƀư rai bunuyh sŏng nđâp bunuyh tih lĕ.'

23. Tơlah nau ƀư rai ăn tât nau khĭt ƀât lât dơm, Păng mưch ma nau rêh ni phung mâu geh tih.

24. Bu jao jêh phung neh ntu tâm ti phung ƀai; păng nkŭm muh măt phung kôranh phat dôih ta neh ntu Tơlah mâu di păng, pôri mbu moh?

25. "Nar gâp gŭ rêh jêng pral lơn ma du huê nchuăt; khân păng nchuăt du mâu saơ nau ueh maak ôh.

26. Khân păng vah rgăn nâm bu rkĭt tơm rpho, nâm bu klang pah sĭm.

27. Tơlah gâp lah: 'Gâp chuêl lĕ nau gâp nter, gâp mra tâm mpơl muh măt maak jêh ri gơm rum?

28. Gâp klach krit ngăn lĕ nau nđêh nji gâp; yorlah gâp gĭt may mâu mra kơp ôh gâp jêng rsang tih.

29. N'hêl nanê̆, Brah Ndu kơp gâp tih jêh; pôri mâm gâp pah kan dơm dam?

30. Tơlah gâp ŭm ma kƀu, jêh ri rao ti gâp ma dak buh,

31. ăt may klô̆p đŏng gâp tâm dak nung, jêh ri kho ao gâp mra ƀâu chrĭ.

32. Yorlah Păng mâu di jêng kon bunuyh nâm bu gâp, dĭng gâp janh plơ̆ sĭt lah ma Păng. Gay ma he dơi tât ndrel ma nau phat dôih.

33. Kŏ mâu geh lĕ du huê nơm ta nklang he, nơm dơi dra ti ma lĕ he bar hê,

34. pôri mơ Brah Ndu sŏk lơi mâng Păng dong gâp, jêh ri nau klach ma Păng mâu mra tât ma gâp đŏng ôh.

35. Rnôk nây, gâp mra lah, mâu hôm geh nau klach ôh, yorlah gâp nơm mâu dơi ƀư pô nây ôh aƀaơ ri.