Y-Yôp - Đoạn 8

1. Y-Bildat, phung Suah plơ̆ lah:

2. "Ndah nâm jŏ may mra ngơi nau aơ. Jêh ri nau ngơi tă mbung may tât nâm bu phŭt ndah nâm jŏ?

3. Mâm Brah Ndu nsŭk ăn tih nau sŏng srăng lĕ? Mâu lah Nơm Geh Lĕ Nau Brah nsŭk ăn tih đah nau di lĕ?

4. Tơlah phung kon may ƀư tih ma Păng, Păng ăn khân păng dơn nau tâm rmal yor nau tih khân păng hŏ ƀư jêh.

5. Tơlah may gơih joi Brah Ndu, jêh ri vơh vơl ma Nơm Geh Lĕ Nau Brah,

6. jêh ri tơlah may jêng rsang jêh ri sŏng srăng, pôri n'hêl nanê̆ Păng mra dâk kơl may, jêh ri chiă uănh may ăn ueh jêng nau nkhôm ma may.

7. Jêh ri nđâp tơlah aƀaơ ri may jêng jê̆, ƀiălah kêng dăch lôch may mra jêng toyh ngăn.

8. "Gâp vơh vơl ma may, ôp hom ma phung rô̆ kăl e, jêh ri ôp sek hom moh nau phung chô yau mâp saơ jêh;

9. Yorlah he jêng kanŏng phung mbe, jêh ri mâu gĭt âk nau ôh, jêh ri rnôk he gŭ rêh ta neh ntu jêng nâm bu du ntŭk nde n'hâm.

10. Mâu hĕ khân păng mra nti ma may jêh ri nkoch ma may, jêh ri ngơi nau khân păng gĭt rbăng jêh hĕ?

11. "Dơi lĕ tơm siăt hon tâm ntŭk mâu geh trâp? Dơi lĕ treng chăt hom ntŭk mâu geh dak ôh?

12. Tơlah hôm chăt nse, mâu hŏ bu muyh ôh, khân păng lĕ ơm kro jêh ma gơ̆ tơm si êng.

13. Pô nây yơh nau tât ma le rngôch phung chuêl ma Brah Ndu; nau kâp gân phung bunuyh mâu chroh ôh ma Brah Ndu mra rai lôch.

14. Nau păng rnơm-nsing lĕ roh jêh, jêh ri ntŭk păng nsing gơnh tăch nâm bu ntêng vĭl.

15. Bunuyh nây nsing ma ngih vâl păng nơm, ƀiălah ngih kŏ mâu nâp lĕ; păng kuăn rdâng ôbăl, ƀiălah ôbăl mâu hôm dơi nâp ôh.

16. Nâm bu tơm si chăt nse ta duh nar, nkeh păng chăt nkâm lam tâm n'gar păng.

17. Reh păng sŏr tâm mbŭch lŭ păng hon ta nklang nđa lŭ.

18. Tơlah bu rôk păng tă bơh ntŭk păng, pôri ntŭk păng gŭ jêh mra dun ma păng, lah: "Gâp mâu mâp saơ may ôh?"

19. Nây jêng nau răm maak ma trong păng. Mra geh si gơ̆ êng luh hon tă bơh neh.

20. "Aơ, Brah Ndu mâu mra dun ôh ma bunuyh sŏng srăng, mâu lĕ mra kơl ma bunuyh djơh mhĭk.

21. Ƀiălah Kôranh Brah mra mbêng ăn trôm mbung may gơm maak; Jêh ri may mra răm rhơn.

22. Phung tâm rmot mra bêng ma nau bêk prêng. Jêh ri ngih bok phung ƀai mra rai lôch."