Y-Yôp - Đoạn 5

1. Pônây, "Kuăl hom aƀaơ ri geh lĕ nuyh plơ̆ lah ma may? Ma mbu phung kloh ueh may mra nsing?

2. Yorlah nau thăm man nkhĭt bunuyh rluk, nau tâm nach nkhĭt bunuyh dơm dam.

3. Gâp saơ jêh bunuyh rluk ntơm chăt hon reh, ƀiălah ƀât lât gâp rak rtăp jêh ma ntŭk păng gŭ.

4. Phung kon sau păng mâu geh nau mpăn ôh, bu jot plên khân păng ta mpông pêr, jêh ri mâu geh nơm kơl khân păng ôh.

5. Phung ji ngot ji hir sa lơi play păng kăch roih, kŏ tât păng pĕ play ta nklang mpach lok; jêh ri ran grŭ gră ma drăp ndơ păng.

6. Yorlah krit rngot mâu ôh luh tă ndruyh neh, mâu lĕ nau jâk jêr chăt hon tă bơh neh;

7. Ƀiălah bu deh bunuyh ma nau uh ah, nâm bu kao ŭnh sial khôm ta kalơ.

8. "Bi ma gâp, gâp mra joi Brah Ndu, jêh ri gâp mra jao nau gâp geh ma Brah Ndu,

9. Păng pah kan toyh ngăn jêh ri bu mâu dơi gĭt rbăng ôh. Kan khlay ngăn bu mâu dơi kơp ôh;

10. Păng ăn trôk mih ta neh ntu, ăn dak djrah lam mir;

11. Păng n'hao phung dêh rhêt jêh ri pư chông phung nhĭm nhiăng n'gân ta ntŭk ueh mpăn.

12. Păng ăn roh lơi kan phung blau plĕch ŭch ƀư, pôri kan ti khân păng ƀư mâu dơi jêng ôh.

13. Păng sŏk kân phung blau mĭn tâm nau plĕch rlăm khân păng; jêh ri păng ƀư ăn lôch lơi gơnh kan phung plĕch rlăm ƀư.

14. Dôl nôk nar khân păng mâp nau ngo, Dôl nar nklang bôk khân păng hăn but nâm bu klong măng ngo klĕng.

15. Brah Ndu rklaih phung kon đơi tă bơh trôm mbung phung nây jêh ri klaih bơh ti phung katang.

16. Pôri, phung o ach geh nau kâp gân, jêh ri ma phung kue mêm mbung dơm (ât ndơ sa).

17. "Aơ, ueh maak ngăn bunuyh Brah Ndu nduyh; yor nây lơi tâm rmot ôh ma nau Nơm Geh Lĕ Nau Brah Nduyh nkra.

18. Yorlah păng ăn sôt, ƀiălah păng put; păng dong, ƀiălah ti păng ƀư bah.

19. Păng mra tâm rklaih may tă bơh prao ntil nau tât uh ah; nđâp pơh ntil kađôi lĕ nau ƀai mâu mra ƀư ma may ôh.

20. Tâm nau sa sât ji ngot, Păng mra sâm rklaih bơh nau khĭt, jêh ri dôl geh nau tâm lơh, sâm rklaih may tă bơh mpiăt đao.

21. May mra dơi nchuăt krap klaih tă bơh mpiăt nau krit; jêh ri may mâu mra klach ôh tơlah geh nau bu ƀư rai tât.

22. May mra gơm rum ma nau ƀư rai jêh ri nau sa sât ji ngot, jêh ri may mâu mra klach lĕ ma mpô mpa bri ta neh ntu;

23. Yorlah may mra geh nau tâm rnglăp ma lŭ tâm mir, jêh ri mpô mpa bri mra gŭ đăp mpăn ndrel may.

24. May mra gĭt ma ngih bok may gŭ mpăn, jêh ri may mra chop uănh biăp ndrôk may. jêh ri saơ khân păng lĕ nŭm da dê.

25. May mra saơ tâm ban lĕ ma phung kon sau may mra jêng âk, jêh ri phung kon may nâm bu gơ̆ ta neh ntu.

26. May mra jŏk rêh tât ranh tơlah rnôk may lăp tâm trôm môch, nâm bu du nchăp ba tât ta ntŭk bu mprah di yan păng.

27. Aơ, hên sek uănh nanê̆ jêh; nau nây jêng ngăn. Iăt hom, jêh ri gĭt nau nây jêng di ma may.