Y-Yôp - Đoạn 40

1. Tă tâm nklang sial vănh blông, Yêhôva plơ̆ sĭt lah ma Y-Yôp, jêh ri lah:

2. Rêt hom rse bŭt may nâm bu du huê bunuyh katang; gâp mra ôp may jêh ri ăn may mra mbơh ma gâp!

3. May mra ăn nđâp gâp jêng tih lĕ? May mra kơp gâp tih gay may dơi geh nau kơp sŏng lĕ?

4. May geh lĕ nting tur katang nâm bu Brah Ndu? Dơi lĕ may ƀư nteh bâr nglaih dah nâm bu Păng?

5. Pôri aƀaơ, may nkrơ̆ hom may ma nau rnam jêh ri khưm ro, jêh ri nsoh nau chrêk ma lơp, nchrat ang.

6. Mbêng ler hom nau may ji nuih, jêh ri uănh hom ma nơm sưr rlau gay ma n'glưh păng.

7. Uănh ma ăp nơm mbu nơm jêng sưr, jêh ri ntrŭnh păng; jot plên lơi phung djơh ta ntŭk khân păng gŭ.

8. Tâp brôi lơi le rngôch khân păng ndrel n'grŭp tâm ndruyh neh, put bok ta muh măt khân păng tâm môch.

9. Rnôk nây lĕ gâp mra dơn ma may geh nau dơi may nơm ma ti ma may.

10. Aơ, rpu dak gâp hŏ njêng ndrel may; păng sa gơ̆ nâm bu ndrôk.

11. Uănh hom ma nau katang pakơi păng. Nau dăng katang păng tă tâm jreng n'ho păng.

12. Păng ƀư đơr chiăng păng nâm bu tơm si sêdar. Suan nglu păng tâm ƀăr ndrel.

13. Nting păng jêng nâm bu dĭng kông, jâng păng nâm bu loih.

14. "Păng jêng kan mrô nguay ma Brah Ndu. Nơm rhăk njêng păng sŏk pêh đao kâp ƀư ma păng!

15. Yorlah yôk hon gơ̆ nse ăn ndơ sa ma păng. Jêng ntŭk phung mpô mpa bri pâl rlưn.

16. Păng kuen bêch tâm gơ̆ chrăch-chrêl, tâm ntŭk ndâp tâm proh treng jêh ri trâp.

17. Gơ̆ chrăch-chrêl nkŭm păng ma gui n'hâm păng; tơm yôm ta n'hor dak nchueng jŭm păng.

18. Aơ, dak hao toyh hâu ngăn, ƀiălah păng mâu klach ôh ăt păng gŭ đăp mpăn. Nđâp tơlah dak krong Yurdan ntat trôm mbung păng, păng ăt gŭ nâp tâm ban lĕ.

19. Mbu nơm dơi nhŭp păng ta nây ro? Mbu nơm dơi veng păng ma nhuăl, jêh ri sŏk rse chuh muh păng?

20. "Dơi lĕ may klĕ mphâk rbư ma nglĕ ndar, jêh ri sŏk rse sro mpiăt păng?

21. Dơi lĕ chuh muh păng n'groi du njăr rse, jêh ri klĕ kang păng ma nglĕ ndar?

22. Păng mra vơl hâu ngăn lĕ ma may? Păng mra ngơi rdơ̆ lĕ ma may?

23. Păng mra ƀư nau tâm rnglăp đah may, ăn may sŏk păng jêng oh mon ma may n'ho ro lĕ?

24. May mra pâl rlưn đah păng nâm bu du mlâm sĭm, mâu lah kât rse têk ta trôko păng ăn ma phung oh mon bu ur may rlưn pâl lĕ?

25. Phung tăch rgâl mra tăch păng lĕ? Tâm pă păng ăn ma ndrăng phung tâm tăch lĕ?

26. Dơi lĕ may sŏk tak ntâp bêng ntâu săk păng, mâu lah ntâp bôk păng ma jôih lĕ?

27. Lŏng nâl yơr hom ti may ƀư ma păng; kăndơ̆ tơlah may kah gĭt ma nau mra tât nây lơi hôm ƀư đŏng ôh!

28. Aơ, nau kâp gân ŭch nhŭp păng lĕ roh jêh; kanŏng saơ mpơl săk păng, bu lĕ krit êng jêh.