Y-Yôp - Đoạn 35

1. Y-Êtihu ngơi tay pôaơ: May hŏ ngơi lah:

2. "Gâp geh nau sŏng di lơn ma Brah Ndu; may lah tay, 'Mâm nau gâp ŭch lah? Gay lơi ăn geh nau tih,

3. Gâp mâu hĕ dơi geh nau khlay? Mâm may mĭn ma nau nây geh khlay lĕ?

4. Gâp mra plơng nau ngơi may, jêh ri phung mĭt jiăng ndrel ma may đŏng.

5. N'gơr uănh hom kalơ trôk; Uănh hom ma ndâr tŭk, păng prêh lơn ma may.

6. Tơlah may hŏ ƀư tih, geh djơh lĕ tât ma Brah Ndu? Tơlah lĕ nau tih may ƀư jêh ntop lơ hâu âk, moh nau may ƀư ma Păng?

7. Tơlah may jêng sŏng, moh may mra ăn ma Păng? Mâu lah moh ntil ndơ Păng mra sŏk dơn tă bơh ti may?

8. Nau djơh may kanŏng ƀư mhĭk ma du mpôl may nơm jêh ri nau sŏng srăng may jêng khlay êng ma du huê kon bunuyh.

9. "Yorlah geh âk nau tŭn jot, yor ri ƀon lan lŭng nter, yorlah phung katang ƀư ma khân păng yor ri vơl gay bu kơl an.

10. Ƀiălah mâu geh nuyh ôp: "Brah Ndu jêng Nơm Rhăk Njêng gâp, mbah ntŭk gŭ? Păng ăn bu mprơ maak dôl bri măng,

11. ntĭm nti hên dơi gĭt rbăng lơn lĕ ntil mpô mpa bri ta kalơ neh ntu jêh ri njêng he blau mĭn lơn ma sĭm tâm trôk.

12. Bu lŭng nter, ƀiălah Brah Ndu mâu plơ̆ sĭt lah ôh, yor nau sưr rlau phung bunuyh djơh mhĭk.

13. N'hêl nanê̆ Brah Ndu m âu iăt ôh nau vơh vơl n'hi mâu geh nuih n'hâm răp jăp, Nơm Geh Lĕ Nau Brah kŏ mâu chrê lĕ ma nau nây.

14. Lơ hâu ma nây tơlah may lah mâu saơ ôh Păng. Nau tâm mpơl hŏ tât jêh ta năp măt Păng, jêh ri may gŭ kâp Păng phat dôih!

15. Aƀaơ ri, yorlah nau Păng ji nuih mâu hŏ klăp ndăng ôh, jêh ri yorlah Păng mâu klăp ndăng ir ôh nau sưr rlau bu hŏ ƀư nây.

16. yor ri Y-Yôp hă trôm mbung păng ngơi dơm dam jêh ri ngơi mâu geh nau gĭt rbăng ôh."