Y-Yôp - Đoạn 31

1. Gâp hŏ ƀư nau tâm rnglăp jêh đah măt gâp; pônây, mâm ƀư gâp dơi uănh ma du huê bu ur druh?

2. Yor kô̆ tă Brah Ndu kalơ trôk pă ăn ma gâp, jêh ri drăp ndơn gâp tă Nơm Geh Lĕ Nau Brah ta ntŭk prêh kalơ, moh nau hăn?

3. Mâu hĕ nau rêh ni ăn ma nơm djơh mhĭk, jêh ri nau rai yot tât ma phung pah kan nau kue?

4. Mâu hĕ Brah Ndu saơ trong gâp, jêh ri kơp lĕ nhuat gâp?

5. "Tơlah gâp gŭ ngao ma nau mƀruh jêh ri jâng gâp chuat ndal ma nau ndơm;

6. ăn Brah Ndu yơk njing gâp tâm du mlâm njing di; jêh ri ăn păng gĭt nau sŏng srăng gâp!

7. Tơlah jâng gâp der chalơi trong di ngăn, jêh ri nuih n'hâm gâp kơnh ma ndơ măt gâp saơ, tơlah geh nau ƀơ̆ ƀơch krêp ta ti gâp,

8. pôri ăn gâp srih, jêh ri geh nơm êng mra rek, ăn bu rôk lơi ndơ gâp tăm jêh!

9. Tơlah nuih n'hâm gâp tŭp nau bu ur ndơm, jêh ri tơlah gâp gŭ grem kâp ta mpông nơm chiau meng gâp;

10. pôri ăn ur gâp peh ba ma nơm êng, jêh ri geh nơm êng bêch ndrel păng.

11. Yor nau nây jêng nau tih jru mhĭk ngăn; nau nây jêng nau kue lĕ di ma phung kôranh phat dôih tâm rmal:

12. Nau tih nây jêng ŭnh hit sa tât ma ntŭk bêch kuh rih hôk, ƀư rai lĕ drăp ndơ gâp kŏ tât le rngôch ƀhiau…

13. Tơlah gâp geh dun nau di ma oh mon bu ur mâu lah buklâu gâp, dôl khân păng tâm rlăch đah gâp,

14. pôri mâm gâp mra ƀư tơlah Brah Ndu du dâk? Tơlah Păng tât ôp sek gâp, mâm gâp mra plơ̆ lah?

15. Nơm hŏ njêng gâp tâm trôm ndŭl me gâp, mâu hĕ di bu rhăk njêng nđâp ma khân păng lĕ? Mâu hĕ di kanŏng du huê Brah Ndu dơm nơm rli hên tâm trôm ndŭl me?…

16. Tơlah gâp dun mâu ăn ôh ndơ phung o ach ŭch, ƀư ăn bu ur ndrô huănh măt ma nau nhĭm.

17. Tơlah gâp sa êng ndơ du huê gâp, jêh ri bunuyh kon đơi mâu dơi ăn sa ndrel ôh;

18. N'hêl nanê̆ ntơm bơh gâp ndăm, păng văch ma toyh ndrel ma gâp nâm bu kon ndrel mbơ̆. Bi ma bu ur ndrô, gâp hŏ kơl ncheng păng ntơm bơh gâp luh bơh ndŭl me gâp;…

19. tơlah gâp saơ mbu nơm khĭt yor mâu geh bok ao, jêh ri bunuyh o ach mâu geh ndơ nsoh ntâk;

20. Tơlah nuih n'hâm păng mâu geh ôh mŏt ton nau ueh ma gâp, jêh ri păng tơlah mâu geh ôh ao rsau biăp gâp dơi geh nau răm păng;

21. tơlah gâp yơr ti gâp gay ƀư ma phung kon đơi, yorlah gâp saơ geh bunuyh kâp kơl gâp tâm mpông pêr ƀon toyh.

22. pôri ăn săng nglik gâp răch rŭng bơh săk jăn jêh ri ăn nting tur gâp tăch bơh ntŭk păng tâm rdjŭm.

23. Yorlah nau rêh ni bơh Brah Ndu ntŭp ƀư ăn gâp klach krit, jêh ri ta năp nau rnam Păng, gâp mâu dơi ƀư ôh…

24. Tơlah gâp nsing ma miah, jêh ri lah đah miah chrêk pô aơ: May jêng ndơ gâp rnơm nsing;

25. tơlah gâp răm rhơn ma drăp ndơ gâp geh âk, jêh ri yor tă bơh ti gâp hŏ geh ndơ âk ngăn ngên;

26. tơlah gâp saơ măt nar sol ang, jêh ri khay luh mpơl nchrang lơ vơ

27. pô ri nuih n'hâm gâp geh nau kơnh ntŭng ŭch yơk mbah ma ndơ nây.

28. Nau nây jêng du ntil nau tih tâm ban lĕ di ma phung kôranh phat dôih tâm rmal, yor nây gâp jêng tih đah Brah Ndu ta kalơ.

29. "Tơlah gâp răm maak yor ma nơm ƀư djơh gâp geh nau rêh ni, mâu lah rhơn tơlah geh nau mhĭk tât ma păng;

30. gâp mâu mâp ôh ăn trôm mbung gâp ƀư tih, gay ŭch sŏk nau rak rtăp thăm man, gay ƀư mhĭk nau rêh păng;

31. tơlah phung bunuyh tâm ngih mâu mâp lah ôh; "Mbu mra dơi joi mbu moh bunuyh mâu hŏ mâp sa mpay ndơ sông sa păng?"

32. Bu năch mâu geh bêch ôh rŏ trong; gâp pơk jêh mpông gâp ƀaƀơ ăn bu năch nsong trong;…

33. Tơlah gâp pôn mo nau tih gâp nơm nâm bu Y-Ađam, jêng pôn lơi nau djơh mhĭk gâp nơm tâm trôm nuih n'hâm gâp.

34. Yorlah gâp geh nau klach krit ma khân păng âk ngăn, jêh ri klach lah mpôl băl mưch rmot; kŏ tât gâp gŭ klăk klêm, mâu janh chuat hăn luh du padih mpông…

35. Ơ! mâu geh ôh bunuyh gŭ iăt gâp! Aơ jêng gâp chih kach amoh gâp! Ăn Nơm Geh Lĕ Nau Brah plơ̆ sĭt lah ma gâp! Gay ăn nơm rlăng ma gâp geh sămƀŭt chih prăp!

36. N'hêl nanê̆ gâp mra tuy nau nây ta kalơ săng nglik gâp, ndô păng ta kalơ bôk gâp nâm bu đon hađăch.

37. Gâp mra nkoch ma păng le rngôch nau gâp ƀư; Văch tât tra năp măt păng nâm bu du huê hađăch…

38. Tơlah neh nter tâm rdâng đah gâp, Jêh ri lĕ trong kai păng nhĭm ndrel;

39. Tơlah gâp sa jêh play păng mâu geh trok rnoh ôh, jêh ri ăn nau khĭt tât ma păng nơm.

40. Ăn pôm lok hon ntrok ba, jêh ri gơ̆ mhĭk ntrok ma ba orgơ. "Tât ta aơ nau Y-Yôp ngơi lôch jêh.