Y-Yôp - Đoạn 23

1. Y-Yôp plơ̆ sĭt lah;

2. "Nđâp nar aơ gâp lŭng nter jêng rngot lơn. Ti păng ntŭn kalơ gâp jâk lơn ma nau gâp lŭng nter.

3. Ơ! ntŭk gâp joi gay ŭch mâp ma Kôranh Brah, gay ma gâp dơi tât panăp sưng hađăch Păng!

4. Pôri gay gâp nkoch nau gâp geh tranăp măt Păng, jêh ri ngơi tâm rlăch ăn lĕ nau.

5. Gâp mra gĭt nau Păng plơ̆ lah ma gâp, Jêh ri gĭt rbăng nau Păng ŭch ngơi ndrel ma gâp.

6. Păng mra tâm rlăch đah gâp ma lĕ nau brah toyh Păng lĕ? Mâu ôh, Păng mra gŭ iăt ma gâp.

7. Tanây du huê bunuyh sŏng dơi ngơi tâm rlăch đah Păng, jêh ri gâp dơi klaih bơh nơm phat dôih ma gâp ƀaƀơ.

8. Aơ, gâp hăn tât lor, ƀiălah mâu geh Păng ta nây; gâp plơ̆ pakơi, ƀiălah gâp mâu lĕ dơi saơ Păng.

9. Gâp n'gĭl pachiau, tơlah Păng ƀư kan nây, ƀiălah gâp mâu dơi gĭt năl Păng ôh. Păng krap mpeh pama, ri dĭng gâp mâu saơ Păng.

10. Ƀiălah Kôranh Brah gĭt trong gâp hăn; Tơlah Păng rlong uănh gâp, gâp mra jêng chrêk nâm bu miah.

11. Jâng gâp tĭng ndô̆ trong Păng, Gâp ăt tĭng ndô̆ trong Păng, mâu geh teng ôh.

12. Gâp mâu mâp chalơi ôh lĕ ntil nau vay bơh trôm mbung Păng ntăm, ăt gâp tông tĭng nau ngơi bơh bâr mbung Păng lơn ma đah nau gâp nơm ŭch.

13. Ƀiălah Kôranh Brah mâu blau rgâl ôh, mbu nơm dơi ăn Păng rgâl lơi? Moh ntil nau Păng ŭch, Păng mra ƀư ro yơh.

14. Yorlah nau Păng hŏ ƀư nŭm ăn gâp, Păng mra ƀư ăn jêh ro yơh. Tâm nau mĭn Păng hôm geh âk nau tâm ban pônây.

15. Yor nây, gâp geh nau klach ngăn gŭ panăp măt Păng, dôl gâp gŭ mĭn nau nây gâp klach ma Păng.

16. Yorlah Brah Ndu ăn nuih n'hâm gâp lĕ huơi ngăn Jêh. Nơm Geh Lĕ Nau Brah ƀư nkrit ma gâp.

17. Yorlah gâp mâu klach ôh ma nau ngo, Tâm ban lĕ mâu klach yor ma nau ngo vêt vê nkŭm lơi muh măt gâp.