Y-Yôp - Đoạn 21

1. Y-Yôp plơ̆ sĭt lah:

2. "Iăt hom ăn nanê̆ nau gâp ngơi; ăn nau nây jêng nau bonh leng khân may.

3. Srôih iăt gâp, gay ăn gâp ngơi: hŏ lôch jêh nau gâp ngơi, khân may mưch tay hom.

4. Bi ma gâp, nau gâp ngơi vơl săk geh ngơi rbeh tât ma bu lĕ? Mâm dĭng nau mĭn gâp mâu blau nsrôih?

5. Uănh hom ma gâp, jêh ri hih rhâl hom, sŏk ti rdêp lơi mbung păng nơm.

6. Tơlah gâp nklân ma nau nây gâp klach ngăn, jêh ri săk jăn gâp jêng nsâr êng.

7. Mâm dĭng phung ƀai gŭ rêh kŏ tât ranh, jêh ri nau dơi chăt jêng?

8. Phung noi deh khân păng njêng gay ăn măt khân păng saơ, jêh ri nđâp kon sau khân păng đŏng.

9. Ngih vâl khân păng gŭ mpăn mâu geh ntil klach ôh, jêh ri Brah Ndu mâu hôm dong khân păng ôh.

10. Ndrôk nkuăng khân păng tâm jơng mâu ach ôh, jêh ri ndrôk me deh kon mâu geh rlêh lĕ.

11. Khân păng ăn phung kon se jê̆ khân păng pâl rlưn nâm bu du phung biăp, jêh ri phung kon sau khân păng talô̆ pâl ndrel.

12. Khân păng mpât mprơ tĭng nteh gâr jêh ri gong rêng, jêh ri răm maak ma nau uh n'hôm uh rlet.

13. Khân păng gŭ rêh tâm nau ƀŭn lap du bông nau rêh khân păng, jêh nây hăn ma Ƀon Phung Khĭt ueh lĕ.

14. Khân păng lah ma Brah Ndu pô aơ: "May gŭ ngai hom đah hên, Yorlah hên mâu ŭch ôh gĭt nau nti bơh may."

15. Mbu moh Nơm Geh Lĕ Nau Brah, gay hên pah kan ma Păng? Moh nau khlay tơlah hên mbơh sơm ma Păng?

16. Aơ, nau ƀŭn lap khân păng mâu hôm gŭ tâm ti khân păng nơm ôh: Lĕ nau ƀai phung kue ƀah ngai đah gâp.

17. Ŭnh kađen nau ang phung ƀai lĕ nhhât, Nau rai yot tât ma khân păng,v Pônây nau Brah Ndu ji nuih ăn nau nđêh nji ma khân păng, Mâm nau nây mâu hĕ mra tât?

18. Mâu hĕ khân păng jêng nâm bu rhe sial đô̆, nâm bu lâk phŭt chuănh khôm mpruh.

19. Khân may lah: Brah Ndu têm prăp nau kue khân păng gay rơm tâm rmal ăn ma phung kon khân păng nơm, gay ăn khân păng nơm gĭt nau nây.

20. Ăn măt khân păng nơm saơ nau ƀư rai tât ma khân păng, jêh ri ăn khân păng nhêt nau Nơm Geh Lĕ Nau Brah ji nuih.

21. Yorlah tơlah nar bu nal ma khân păng gŭ rêh lĕ lôch jêh, mâm dĭng khân păng mâu chrê ma phung kon khân păng du nar kăndơ̆?

22. Brah Ndu phat dôih ma phung gŭ ta kalơ; pônây, geh lĕ nơm sâm nti an nau gĭt rbăng Păng?

23. Du huê aơ khĭt tôdôl geh nau dăng katang săk jăn, geh nau đăp mpăn Jêh ri mleh rmên,

24. săk jăn păng lay rmŏng ma dak toh jêh ri glo nting păng bêng ma dak rêh.

25. Du huê êng khĭt nđêh nji tâm huêng, Mâu mâp chiăm lep ôh nau ueh.

26. Tâm ban lĕ khân ôbăl gŭ tâm trôm môch ndrĭt rhai sa ôbăl.

27. "Aơ, gâp gĭt nau khân may mĭn, jêh ri nau khân may ŭch ƀư mhĭk ma gâp.

28. Yorlah khân may lah: "Ta ntŭk ngih nơm djơh mhĭk? Ngih bok nơm ƀai ntŭk tra păng?"

29. Mâu hĕ khân may mâp ôp ma phung hăn rŏ trong? Dĭng lah mâu tă bơh nau khân păng sâm mbơh an,

30. tâm nar ƀư rai, phung mhĭk dơi klaih, jêh ri tâm nar geh nau ji nuih păng dơi nchuăt klaih?

31. Tra năp măt păng, mbu nơm janh nduyh păng, yor nau di păng hŏ ƀư jêh?

32. Bu tung leo păng rlet tâm môch jêh ri bu mra gak njrăng môch păng.

33. Glo neh tâm rlŭng ƀư ăn nđik rngêt ma păng; le rngôch bunuyh groi tĭng păng, jêh ri phung lĕ hăn lor ma păng mâu hôm dơi kơp ôh.

34. Pôri, mâm khân may dơi bonh leng gâp ma nau dơm dam? Nau khân may plơ̆ sĭt lah jêng nau mƀruh."