Y-Yôp - Đoạn 19

1. Y-Yôp plơ̆ sĭt lah:

2. "Ndah nâm jŏ may ƀư nđêh nji gâp, jêh ri nchah gâp hăch rhên ma nau ngơi?

3. Aơ jêng jê̆t tơ̆ jêh may nduyh gâp; may mâu prêng ôh ƀư nau mhĭk ma gâp.

4. Nđâp tơlah ngăn gâp jêng tih jêh, nau tih gâp hôm e ndrel ma gâp nơm.

5. Tơlah ngăn khân may ŭch n'hao may nơm ƀư ma gâp, jêh ri sŏk nau rêh ni gâp jêng nau khân may gay ŭch har plơng đah gâp.

6. Pôri, ăn khân may gĭt jêng Brah Ndu yơh ƀư ma gâp, jêh ri văk tâm nhuăl Păng nthăng jŭm gâp. Aơ gâp nter, "Geh nau djơh mhĭk!"

7. Ƀiălah gâp mâu gay ma bu plơ̆ sĭt lah ôh; Gâp vơh vơl bu kơl, ƀiălah bu mâu ƀư nau di ôh.

8. Kôranh Brah king trong gâp, pôri gâp mâu dơi lăn ôh, jêh ri Păng nkŭm ăn nau ngo klĕng rgŏ trong gâp hăn.

9. Păng doh lơi jêh nau chrêk rmah gâp, jêh ri sŏk rdu lơi đon hađăch bơh bôk gâp.

10. Păng ƀư nchah gâp văr jŭm chiau meng kŏ tât gâp rai lôch; păng rôk nau gâp kâp gân nâm bu rôk du tơm si.

11. Păng hao ji nuih ma gâp tâm ban lĕ, kơp gâp jêng du huê nơm rlăng păng.

12. Phung tahan Păng văch rduh ndrel; khân păng nchueng ŭch ƀư ma gâp, jêh ri gŭ jŭm ngih bok gâp.

13. "Păng rđah phung oh nâu gâp ăn gŭ ngai đah gâp, Jêh ri ăn phung mĭt jiăng gâp jêng bunăch ngăn ngên ma gâp.

14. Băl mpôl gâp lĕ chalơi jêh gâp, jêh ri phung mĭt lăng jiăng sŏng lĕ chuêl jêh ma gâp.

15. Phung gŭ tâm ngih gâp, jêh ri oh mon, bu ur gâp kơp gâp jêng du huê bu năch. Ta năp măt khân păng, gâp hŏ jêng jêh du huê bunuyh bu êng.

16. Gâp kuăl oh mon gâp, ƀiălah khân păng mâu hôm plơ̆ lah ôh ma gâp; nđâp tơlah gâp vơl ma păng ma bâr mbung gâp ăt tâm ban lĕ.

17. Nsôr n'hâm gâp ƀư ăn ur tâm rmot ma gâp, jêh ri kon buklâu mê̆ gâp nuih ma nau gâp vơl dăn.

18. Kŏ tât phung kon se jê̆ mưch rmot ma gâp tâm ban lĕ; tơlah gâp dâk khân păng ntêh rmot ma gâp.

19. Phung mĭt jiăng gâp răp jăp tâm rmot ngăn ma gâp. Phung gâp rŏng jêh plơ̆ ƀư rlăng đŏng đah gâp.

20. Nting gâp lĕ tâm dop đah ntâu jêh ri mpơl nting nđăng dơm, Gâp hŏ klaih jêh kanŏng hôm e dơm ntâu dâr lưnh sêk gâp.

21. Hơi phung mĭt jiăng gâp, yô̆ an hom ma gâp, yô̆ an hom ma gâp! Yorlah ti Brah Ndu dong jêh gâp.

22. Mâm ƀư khân may tĭng nhŭp gâp tâm ban ma Brah Ndu, jêh ri ê hŏ hơm đŏng ma puăch gâp?

23. "Ơ! ŭch ngăn bu lĕ chih jêh nau gâp ngơi! Ŭch ngăn ăn bu dơi chih păng tâm du ndrom sămƀŭt!

24. Ŭch ngăn ma mâng chih loih jêh ri ndrak bu tor păng ta kalơ lŭ gay ndray hôm mro mrăng!

25. Bi gâp, gâp gĭt Nơm Tâm Chuai gâp ăt hôm rêh. Kŏ tât nar kêng lôch Păng dâk ta neh ntu.

26. Jêh ri tơlah ntâu gâp lĕ rai jêh ăt tâm săk jăn gâp mra saơ Brah Ndu,

27. gâp mra saơ Păng ma măt gâp nơm yơh, mâu di ma bu êng ôh. Nuih n'hâm gâp lĕ huăr jêh!

28. Tơlah khân may lah: 'Mâm he mra tĭng păng?' Jêh ri' Tơm nau jêr aơ luh tă păng nơm.'

29. Klach hom ma mpiăt đao, Yorlah đao jêng ndơ tâm lơh janh djơh ngăn ŭch rmal nau tih mhĭk. Gay ăn khân may gĭt geh nau phat dôih."