Y-Yôp - Đoạn 13

1. Aơ, măt gâp lĕ saơ jêh lĕ nau nây, tôr gâp lĕ tăng jêh ri gĭt rbăng jêh nau nây.

2. Moh nau khân may gĭt, gâp gĭt tâm ban lĕ, gâp mâu jêng tâm dâng lơn khân may ôh.

3. Ƀialah gâp ŭch ngơi ma Nơm Geh Lĕ Nau Brah. jêh ri ŭch tâm dun gâp đah Brah Ndu.

4. Bi ma khân may, khân may mhĭng mau mƀruh ma nau ngăn; le rngôch khân may jêng nai dak si dơm dam.

5. Khân may ŭch ngăn gŭ klăk klêm! Nau nây mra jêng nau blau mĭn ma khân may.

6. Pônây, iăt hom nau gâp tâm dun, jêh ri kâp iăt ma nau bâr mbung gâp vơh vơl.

7. Mâm khân may dơi janh ngơi ntang ma Brah Ndu ma nau vĭ lĕ? jêh ri ngơi ntang ma Brah Ndu ma nau ndơm lĕ?

8. Khân may mra gŭ mpeh Brah Ndu lĕ? Khân may mra ngơi dôih tâm rlăch Nau di đah Brah Ndu lĕ?

9. Mâm ƀư tơlah Păng sek uănh ma khân may, khân may jêng ueh ma nau nây lĕ? Khân may dơi lĕ ndơm Păng nâm bu khân may ndơm du huê bunuyh?

10. N'hêl nanê̆ Păng mra nduyh ma khân may, tơlah khân may tĭng nding du đah.

11. Mâu di hĕ nau rơnam Păng mra nhhu nkrit khân may, jêh ri nau ƀư nkrit Păng mra ăn tât ma khân may?

12. Nau khân may ngơi hôr jêng nâm bu nau hôr ŭnh buh, nau khân may king mpir nâm bu bŏk.

14. Gâp mra ƀư tĭng nâm nau gâp ŭch ƀư, nđâp tơlah mra ƀư roh nau rêh gâp kađôi lĕ.

15. Nđâp tơlah Kôranh Brah nkhĭt gâp kađôi lĕ, ăt gâp mra nsing ma Păng;

16. ƀiălah gâp king nau gâp ƀư ta năp muh măt Păng.

17. Iăt hom nanê̆ nau gâp ngơi, jêh ri ăn nau gâp mbơh lăp tâm trôm tôr khân may.

18. Aơ, gâp hŏ nkra jêh nau gâp mra ngơi king; gâp gĭt ma gâp mra geh nau ngơi di.

19. Geh lĕ nơm ŭch tâm dun đah gâp? Pônây tơlah gâp gŭ klăk, jêng gâp lĕ khĭt jêh.

20. Kanŏng geh bar ntil nau ăn ma gâp, pôri gâp mâu mra pôn krap ôh gâp nơm tă bơh muh măt may:

21. Dăn Kôranh Brah rhuăt lơi ti may ngai đah gâp, jêh ri lơi may ăn nau klach krit may nhhu nkrit gâp.

22. Jêh ri kuăl hom gâp, pôri gâp mra plơ̆ sĭt lah, mâu lah gâp ngơi, jêh ri ăn may plơ̆ lah ma gâp.

23. Ndah nâm âk nau kue jêh ri nau tih gâp? Dăn Kôranh Brah ăn gâp gĭt nau gâp rlau nau vay jêh ri nau tih gâp.

24. Mâm may pôn muh măt may jêh ri kơp nkhơng gâp jêng rlăng ma may?

25. may mra nkrit lĕ du n'ha sial đô̆ rdu jêh, jêh ri tĭng rhe lĕ kro jêh?

26. Yorlah may chih jêh nau rngot tâm rdâng đah gâp, jêh ri ăn gâp dơn nau tâm rmal ma nau tih gâp ƀư dôl hôm mom ndăm.

27. may lĕ nkông jêh jâng gâp, jêh ri kâp uănh ma lĕ trong gâp hăn; may tâm nal n'har jêh ma ntŭk jâng gâp hăn.

28. Bi ma gâp ntơm ôm lêk nâm bu ndơ ôm, nâm bu bok ao nchiăr reh jêh.