Y-Yakơ - Đoạn 5

1. Bi ma phung ndrŏng aƀaơ aơ, nhĭm nter hom khân may, yorlah nau rêh ni mra tât ma khân may.

2. Drăp ndơ khân may jêng ôm jêh, jêh ri kho ao khân may lĕ nchiăr reh jêh.

3. Prăk mah khân may lĕ ek găm, jêh ri ek găm nây mra mbơh tâm rdâng đah khân may, jêh ri păng mra sa rai nglay săk khân may nâm bu ŭnh. Khân may bun jêh drăp ndơ khân may tâm nar lôch dŭt.

4. Aơ, rnoh nkhôm phung rek ba tâm mir lŏ khân may, rnoh nĕ khân may ntŭng prăp ma khân may nơm, nter jêh ri bâr nteh phung rek nter hao tât ta tôr Kôranh Brah phung tahan.

5. Khân may gŭ rêh ta neh ntu ma nau răm maak tĭng nâm nglay săk ŭch, khân may ƀư hơm nuih n'hâm khân may tâm nar geh nau tâm sreh tâm ntâp nkhĭt bunuyh.

6. Khân may tâm rmal jêh, khân may tâm nkhĭt jêh phung sŏng; păng mâu tâm rdâng đah khân may ôh.

7. Hơi oh nâu, ăn khân may srôih tât Kôranh Brah plơ̆ văch. Aơ, bunuyh ƀư mir gŭ kâp, gay geh ndơ khlay tă bơh neh, păng srôih gŭ kâp tât geh dak mih tŭp mih rah jêh ri dak mih dăch lôch.

8. Khân may tâm ban lĕ srôih hom, jêh ri gŭ nâp nuih n'hâm khân may yorlah nar Kôranh Brah plơ̆ văch hŏ dăch jêh.

9. Hơi phung oh nâu, lơi ngơi ƀŭk dŭk suyh ndrăng khân may, gay ma bu mâu phat dôih ma khân may; aơ, kôranh phat dôih gŭ kâp jêh ta bôk mpông.

10. Hơi phung oh nâu, uănh nau phung kôranh nơm mbơh lor srôih jêh ri dơn nau mhĭk jêng nau tâm ntĭt ma khân may. Phung nĕ ngơi jêh ma amoh Kôranh Brah.

11. Aơ, he lah maak yơh ma phung srôih dơn nau rêh ni. Khân may tăng jêh bu nkoch bri ma nau Y-Yôp srôih jêh ri khân may saơ jêh nau Kôranh Brah ăn ma păng dăch ma lôch. Yorlah Kôranh Brah bêng ma nau yô̆ jêh ri ueh.

12. Hơi oh nâu, lor lơn lơi sân săk ôh đah trôk, ma neh ntu mâu lah ma ndơ ƀaƀă, ƀiălah nau khân may lah, mâu, lah mâu, ngăn, lah ngăn, gay ma bu mâu phat dôih khân may ôh.

13. Geh lĕ bunuyh geh nau jêr jêh ri nau bunuyh tih plơ̆ sĭt tâm phung khân ay may? Ăn păng mbơh sơm hom. Geh lĕ bunuyh geh nau răm maak? Ăn păng mprơ tâm rnê hom ma Kôranh Brah.

14. Geh lĕ bunuyh ji tâm phung khân ay may? Ăn păng kuăl hom phung buranh kơl kan tâm ngih Brah Ndu, jêh ri ăn phung nĕ mbơh sơm an ma păng jêh ri mhĭng dak ngi tâm amoh Kôranh Brah.

15. Lah khân păng mbơh sơm ma nau rnơm, Kôranh Brah mra tâm rklaih bunuyh ji, păng mra ƀư bah nơm nĕ jêh ri yô̆ an nau tih păng.

16. Pôri ăn khân ay may tâm mbơh nau tih ndrăng nơm, jêh ri tâm kơl mbơh sơm ndrăng nơm, gay ma khân may gơnh bah. Lah du huê bunuyh sŏng mbơh sơm, geh nau dơi ngăn.

17. Êli jêng bunuyh rdja tâm ban ma he. Păng mbơh sơm dăn gay ma trôk mâu hôm mih jêh ri mâu hôm geh dak mih ôh ta neh ntu dôl tâm pe năm n'gul.

18. Păng mbơh sơm tay, dăn trôk ăn mih jêh ri neh jêng nse.

19. Hơi phung oh nâu, tơlah du huê tâm phung khân may nkhah du ngai bơh nau ngăn, jêh ri geh du huê êng jă păng sĭt.

20. Mbu nơm njŭn du huê bunuyh tih plơ̆ sĭt chalơi nau tih păng, nơm nây mra rklaih huêng bunuyh nĕ tă bơh nau khĭt, jêh ri âk nau tih păng bu mra yô̆ an.