Y-Yôhan - Đoạn 7

1. Jêh ma nau nây Brah Yêsu hăn tâm n'gor Galilê. Păng mâu ŭch hăn ôh tâm n'gor Yuđa, yorlah phung Yuđa ŭch joi ŭch nkhĭt Păng.

2. Nar phung Yuđa ƀư nau nhêt sa yơk ma ngih njơh hŏ dăch jêh.

3. Phung oh Păng lah ma Păng: "May du hom hăn tâm n'gor Yuđa, gay ma phung oh mon dơi saơ kan khlay may ƀư.

4. Yorlah mbu nơm ŭch ăn bu gĭt năl păng mâu geh ƀư kan ndâp ôh. Yor may ŭch ƀư kan nây ăn may mpơl ma phung neh ntu gĭt ƀă."

5. Yorlah nđâp ma phung oh Păng, nơm mâu chroh ma Păng ôh.

6. Brah Yêsu lah ma phung oh Păng: "Mông gâp ê tât, bi mông khân may ŭch tât ƀaƀơ.

7. Neh ntu mâu dơi ji nuih ma phung khân may ôh, yorlah neh ntu ji nuih ma gâp, yor nau gâp mbơh kan khân păng jêng mhĭk.

8. Khân may dơi hăn râng nau nhêt sông aơ, bi gâp mâu hăn râng ôh, yorlah mông gâp ê tât."

9. Jêh Brah Yêsu lah nau nây, Păng hôm gŭ ta n'gor Galilê.

10. Lah phung oh Păng lăn hăn râng nau nhêt sông jêh, Păng nơm hăn lĕ, ƀiălah hăn ma nau ndâp, mâu ăn bu saơ ôh.

11. Pôri phung Yuđa joi Brah Yêsu tâm nar ver nây, khân păng lah: "Ntŭk Păng gŭ?"

12. Tâm phung nây geh âk bunuyh ngơi ma Brah Yêsu, ƀaƀă khân păng lah: "Păng jêng bunuyh ueh ngăn." Phung êng lah: "Mâu geh. Păng ndơm phung ƀon lan."

13. Ƀiălah mâu geh bunuyh janh nkoch tĭng nau Brah Yêsu ôh, yor klach ma phung Yuđa.

14. N'gul nar nau nhêt sông nây, Brah Yêsu hăn lăp tâm ngih brah jêh ri ntơm nti lah.

15. Phung Yuđa geh nau hih rhâl jêh ri lah: "Bunuyh aơ ê mâp nti, mâm Păng dơi gĭt Nau Brah Ndu Ngơi?"

16. Brah Yêsu lah: "Nau gâp nti lah mâu di nau gâp nơm ôh, ƀiălah nau Nơm tơm njuăl gâp.

17. Mbu nơm ŭch ƀư tĭng nau Brah Ndu ŭch, nơm nây mra gĭt nau gâp nti, gĭt luh tă bơh Brah Ndu, mâu lah tă bơh gâp nơm.

18. Bunuyh nkoch tĭng nau nơm ŭch, jêng păng nkoch joi nau lư n'găr ma nơm tơm njuăl păng, nây mơ jêng nau ngăn jêh ri nanê̆, mâu geh ôh du ntil nau kue tâm Păng.

19. Di lĕ Y-Môis ăn nau vay ma khân may? Ƀiălah mâu geh du huê tâm phung khân may tông nau vay nây ôh? Mâm khân may joi nau ƀư nkhĭt gâp?"

20. Phung ƀon lan lah: "May bunuyh brah lơn, mbu nơm joi ŭch ƀư nkhĭt may?"

21. Brah Yêsu lah: "Gâp hŏ ƀư du ntil kan lĕ khân may hih rhâl dadê.

22. Y-Môis hŏ ăn jêh nau vay ma khân may koh ntâu (nau nây mâu geh Y-Môis hŏ ăn, ƀiălah bơh u che khân may kăl e), jêh ri khân may ƀư nau koh ntâu ma phung bu klâu tâm nar Saƀat.

23. Lah phung bu klâu dơn nau koh ntâu tâm nar Saƀat gay ma mâu ƀư tih tâm nau vay Y-Môis, pôri mâm nau khân may ji nuih ma gâp tâm nau gâp dơi ƀư bah bunuyh ji tâm nar Saƀat?

24. Lơi ta phat dôih tĭng nau saơ tih aơ ôh, ƀiălah ăn khân may phat dôih tĭng nau sŏng."

25. Geh ƀaƀă bunuyh tâm ƀon Yêrusalem lah: "Di lĕ bunuyh nây bu joi ŭch ƀư nkhĭt lơi?

26. Uănh ri Păng gŭ nti ta năp lĕ rngôch, mâu geh bunuyh lah Păng ôh. Phung kôranh chiă uănh gĭt lĕ Păng nây jêng Brah Krist?

27. Ƀiălah he gĭt jêh bunuyh aơ, mbah tă ntŭk păng văch, ƀiălah lah Brah Krist mra văch mâu geh bunuyh gĭt mbah tă ntŭk Păng văch ôh."

28. Pôri Brah Yêsu gŭ nti lah tâm ngih brah, Păng ngơi huy lah: "Khân may bên đah gâp, khân may gĭt ntŭk tă gâp văch. Gâp mâu văch tĭng nâm gâp nơm ŭch, ƀiălah Nơm tơm njuăl gâp. Nơm nây jêng ngăn, khân may mâu năl Păng ôh.

29. Gâp gĭt năl Păng, yorlah gâp văch tă bơh Păng, jêh ri Păng hŏ njuăl gâp jêh."

30. Jêh nây khân păng ŭch nhŭp Brah Yêsu, ƀiălah mâu geh du huê janh nto ti ta Păng ôh, yorlah mông Păng ê tât.

31. Jêh ri tâm phung ƀon lan nây geh âk lĕ bunuyh chroh ma Păng, khân păng lah: "Lah Brah Krist mra tât, Păng mra ƀư nau khlay âk lơn ma nau khlay bunuyh aơ hŏ ƀư đŏng?"

32. Phung Pharasi tăng nau phung ƀon lan ngơi ƀŭk dŭk suyh nkoch tâm nau Brah Yêsu, pôri phung kôranh ƀư brah ndrel ma phung Pharisi njuăl phung tahan nhŭp Brah Yêsu.

33. Pôri Brah Yêsu lah ma khân păng: "Gâp hôm gŭ ndrel ma khân may djê̆ nar, jêh ri gâp mra sĭt ma Nơm tơm njuăl gâp.

34. Khân may mra joi gâp, ƀiălah mâu dơi saơ, jêh ri ta ntŭk gâp gŭ khân may mâu dơi hăn ôh."

35. Phung Yuđa tâm ngơi ndrăng khân păng: "Mbah ntŭk Păng mra hăn, kŏ he mâu dơi joi Păng? Păng mra hăn ma phung du gŭ tâm nklang phung Grek, jêh ri nti lah ma phung Grek ƀơh?

36. Nâm bu Păng hŏ lah: 'khân may mra joi gâp ƀiălah mâu dơi saơ, 'jêh ri: 'Ta ntŭk gâp gŭ khân may mâu dơi hăn ôh, moh ntơ nau Păng lah nây'?"

37. Dăch dŭt tâm nar ver jêng nar sa nhêt khlay Brah Yêsu gŭ dâk ta nây, jêh ri nti lah: "Mbu nơm ji hir văch ma gâp jêh ri nhêt.

38. Mbu nơm chroh ma gâp, pôri n'hor dak rêh mra hoch tâm nuih n'hâm păng, tĭng nâm nau bu hŏ nchih jêh Nau Brah Ndu Ngơi."

39. Păng lah nau nây di Brah Huêng Ueh ma bunuyh chroh ma Păng mra sŏk dơn, yorlah nar nây Brah Huêng Ueh ê hŏ jŭr, jêh ri Brah Ndu ê hŏ ăn nau chrêk rmah ma Brah Yêsu ôh.

40. Tâm phung ƀon lan geh âk bunuyh tăng lĕ nau nây, ƀaƀă lah: "Păng nây jêng kôranh nơm mbơh lor, "bu êng lah: "Păng jêng Brah Krist."

41. Bunuyh êng đŏng lah: "Brah Krist tă bơh n'gor Galilê ƀơh?

42. Tâm Nau Brah Ndu Ngơi mbơh Brah Krist Păng luh bơh noi deh hadăch Đavit ƀon Ƀêtlêhem, jêng ƀon hadăch Đavit ƀơh?"

43. Pôri phung ƀon lan geh nau tâm rlăch tâm jin ndrăng nơm yor ma Kôranh Brah.

44. Geh ƀaƀă phung ƀon lan tâm nây ŭch nhŭp chăp Brah Yêsu, ƀiălah mâu geh bunuyh nto ti pah ta săk Păng ôh.

45. Pôri phung kôranh tahan plơ̆ sĭt ta phung kôranh ƀư brah jêh ri ta phung Pharasi. Phung kôranh aơ ôp khân păng: "Mpa khân may mâu djôt leo Păng tât ta aơ?"

46. Phung kôranh tahan lah: "Mâu geh bunuyh mâp ngơi tâm ban ma bunuyh aơ hŏ ngơi!"

47. Phung Pharasi lah: "Khân may tŭp nau păng ndơm đŏng ƀơh?

48. Geh lĕ du huê tâm phung kôranh mâu lah phung Pharasi chroh ma bunuyh nây?

49. Phung ƀon lan aơ mâu gĭt ro nau vay, di ngăn ma phung bu lĕ rtăp rak."

50. Y-Nikôđem jêng du huê tâm phung khân păng, kăl e dôl măng păng hŏ hăn jêh ta Brah Yêsu, ôp khân păng:

51. "Nau vay he dơi lĕ tâm rmal bunuyh lah ê mâp bu tăng nau Păng ngơi, jêh ri ê mâp gĭt mâm nau Păng ƀư?"

52. Phung Pharisi plơ̆ lah ma Nikôđem: "May jêng bunuyh tâm n'gor Galilê? Rlong sek uănh jêh ri may mra gĭt mâu mâp geh ôh kôranh nơm mbơh lor luh bơh n'gor Galilê."

53. jêh ta nây lĕ rngôch khân păng du sĭt êng êng ta ngih khân păng nơm.