Y-Êsai - Đoạn 23

1. Nau jâk di ma ƀon Tir: Nhĭm nhhiăng hom. Ơ kŭmpăn Tarsis, yor lah bu ƀư rai jêh ƀon Tir, mâu hôm geh ngih ôh, mâu hôm geh ntŭk gŭ ôh. Tă bơh n'gor Kitim bu mpơl nau nây ma khân păng.

2. Gŭ klăk hom, ơ phung gŭ ta kơh dak mƀŭt, Ơ phung tăch rgâl ƀon Sidôn phung khân may prơh hăn rgăn jêh dak mƀŭt, jêh ri gŭ jêh ta ntŭk âk dak êng,

3. Drăp sa kao păng jêng ba bơh dak krong Sihôr, ndơ roih rek bơh dak krong Nil. Khân may jêng nơm tăch rgâl ma phung ndŭl mpôl bunuyh.

4. Ăn may bêk, Ơ ƀon Sidôn, yor lah dak mƀŭt ngơi jêh, pôih dak mƀŭt lah jêh, "Gâp mâu bêch veng ŭnh ôh, mâu lĕ mâp deh, mâu lĕ mâp siăm rong phung bu klâu ndăm, mâu lah phung bu ur druh."

5. Tơ lah nau mhe mhan nây tât ta bri Êjipt, khân păng mra rngot ngăn yor nau mhe mhan di ma ƀon Tir.

6. Rgăn hăn ta ƀon Tarsis, nhĭm nhhiăng hom, ơ phung gŭ ta kơh dak mƀŭt.

7. Aơ hĕ ƀon hâk răm khân may, ƀon tơm geh bơh rnôk ơm kăl e, jâng păng njŭn păng hăn gŭ ntŭk ngai?

8. Mbu nâm gay ŭch ƀư nau aơ ma ƀon Tir, ƀon ăn đon hađăch, phung tăch rgâl păng jêng phung kon hađăch, phung ndranh păng jêng phung bu yơk tâm neh ntu?

9. Yêhôva ma phung tahan yơh hŏ gay ŭch ƀư nau nây, gay ƀư ƀơ̆ nau sưr lĕ nau chrêk rmah, gay ƀư bêk lĕ rngôch phung bu yơk ta neh ntu.

10. Lêng lam bri may tâm ban ma dak krong Nil. Ơ Kon bu ur ƀon Tarsis, mâu hôm geh nau kân ôh.

11. Yêhôva yơr jêh ti păng ta kalơ dak mƀŭt, păng rtuh jêh âk ƀon bri hađăch. Yêhôva ăn jêh nau ntăm di ma bri Kanaan gay ƀư rai lĕ pôih păng.

12. Păng lah: "Ay mâu hôm răm maak ôh. Ơ kon bu ur druh ƀon Sidôn bu tŭn jot jêh. "Dâk hom ay, ăn ay rgăn hăn ta n'gor Kitim. Nđâp ta nây mâu lĕ ay geh nau rlu."

13. Aơ bri neh phung Kaldê, mâu hôm geh phung ƀon lan nây ôh. Phung Asiri njêng ntŭk nây jêng ntŭk prăp ma jun bri. Khân păng rdâk ngih tŭm, khân păng rơih lơi ngih hađăch păng, khân păng ƀư rai lơi.

14. Nhĭm nhhiăng hom, Ơ lĕ rngôch kŭm-păn Tarsis, yor lah pôih khân may rai jêh.

15. Tâm nar nây bu mra chuêl ƀon Tir dôl tâm pơh jât năm, tâm ban ma năm du huê hađăch gŭ rêh. Tăch pơh jât năm mra tât ta ƀon Tir tĭng nâm nau du huê bu ur kan'hong mprơ:

16. "Sŏk gong rêng nsong hom tâm ƀon, Ơ bu ur ka n'hong bu chuêl jêh! Kreh hom ăn ueh, mprơ hom ăn âk, gay ma bu kah gĭt ma ay."

17. Tăch pơh jât năm Yêhôva mra tâm khâl đah ƀon Tir, jêh ri ƀon Tir mra plơ̆ sĭt ma nau nkhôm păng, jêh ri mra ƀư nau kan'hong đah lĕ rngôch ƀon bri hađăch ta kalơ neh ntu.

18. Ƀiă lah ndơ păng tăch jêh ri rnoh nkhôm păng mra prăp ma Yêhôva. Bu mâu mra bun prăp ôh, ƀiă lah ndơ păng tăch mra prăp dơi jêng ndơ sông sa rmeh ler jêh ri bok ao ueh ma phung gŭ ta năp Yêhôva.