Nau Hôr - Đoạn 7

1. Hơi kon, djôt prăp hom nau gâp ngơi jêh ri sŏk prăp tâm nuih n'hâm nau gâp ntăm.

2. Tông hom nau gâp ntăm, jêh ri may mra gŭ rêh, sŏk prăp nau gâp ntăm jêng nâm bu găr măt may.

3. Kât hom păng ta nglau ti may, chih prăp păng tâm trôm nuih n'hâm may.

4. Lah hom ma nau blau mĭn: "Aơ jêng yuh gâp." Bu ntơ nau gĭt rbăng jêng jiăng may.

5. Gay ma khân păng nking may ma bu ur văng tĭr, ma bu ur blă blơ ngơi njĭp n'hĭr.

6. Yorlah gâp gŭ ta mpông bloh ngih gâp, gâp gŭ n'gơr uănh bơh ntŭk nây.

7. Gâp gŭ uănh ma phung rluk gâp saơ tâm phung mom ndăm, mâu geh ôh du huê ndăm geh nau blau mĭn;

8. Păng nsong rŏ trong dăch ngih bu ur văng tĭr nây gŭ; păng đă hăn rlet ma ngih păng.

9. Dôl ngo nsrŭp măng, tơlah lĕ nhâp nar, mâu lah klong măng dôl ngo vêt-vê.

10. Aơ, du huê bu ur tâm mâp đah păng, bu ur nây nkrơ̆ nâm bu du huê bu ur văng tĭr, nuih n'hâm bêng ma nau ndơm.

11. Păng lĕ mơng ngơi nteh jêh ri mâu gĭt bêk ôh, păng mâu kơn gŭ tâm ngih vâl păng nơm ôh;

12. geh tơ̆ gŭ tâm trong sâng, geh tơ̆ gŭ kâp bu tâm ăp njônh trong.

13. Bu ur nây kuăn rdâng păng jêh ri chŭm păng, jêh ri păng janh lah ma bu klâu ndăm nây:

14. "Gâp nhhơr jêh ndơ nhhơr nau đăp mpăn ta ngih gâp; nar aơ gâp trok lôch jêh rnoh gâp ton.

15. Yor nau nây, gâp luh vơt chuă may gay joi may, gâp hŏ saơ jêh may?

16. Gâp hŏ rơm ơm jêh, gâp lăk sưng bêch gâp ma phôi ueh ƀư đah brai mhay tă bơh bri Êjipt.

17. Gâp djrah jêh sưng bêch gâp ma ndơ ƀâu kah, dak si tăng alôê, jêh ri ma Sinamon.

18. Văch hom ăn he ƀư mpay he nơm ma nau rŏng ăn tât ang ôi; ăn he ƀư maak ma he nơm ma nau rŏng!

19. Yorlah sai gâp mâu gŭ ôh gŭ tâm ngih, păng hăn nsong jêh ma ntŭk ngai.

20. Păng ndjôt leo dŭng prăk ndrel ma păng, păng plơ̆ sĭt ma ngih tơlah bŏng khay.

21. Păng ngơi ndơm ôbăl đah âk nau ngơi ueh, ma nau ngơi njĭp n'hĭr păng nchâp ôbăl.

22. Gơnh ro ôbăl tĭng ndô̆ păng, nâm bu ndrôk hăn leo ntŭk bu gŭch, nâm bu du huê bunuyh moih bu nkông hăn ma nau tâm rmal;

23. tât du tong hăr sŏr ta klơm păng, nâm bu sĭm geh nhuăl; păng mâu gĭt ôh nau nây mra roh nau rêh păng.

24. Pôri aƀaơ, Hơi phung kon, iăt hom nau gâp jêh ri rkêng tôr ma nau gâp ngơi;

25. lơi ăn nuih n'hâm may tĭng ôh trong du huê bu ur kơt nây; lơi hăn vĭ tâm trong păng.

26. Yorlah păng hŏ nsŭk âk jêh bunuyh, tŭp tâm nau ndơm jêh ri âk ngăn phung păng hŏ nkhĭt.

27. Ngih păng jêng trong hăn ma ƀon khĭt, njŭr leo tâm jrô nau khĭt.