Nau Hôr - Đoạn 5

1. Hơi kon, gơih iăt n'hêl nanê̆ ma nau blau mĭn gâp, rkêng tôr iăt nau gâp gĭt rbăng,

2. gay ma may dơi djôt prăp nau blaul mĭn, jêh ri gay ma mbung may djôt prăp nau gĭt rbăng.

3. Yorlah mbung bu ur văng tĭr kah nâm dak sŭt, jêh ri nau păng ngơi mbĭr lơn ma dak ngi.

4. Ƀiălah ta nglĕ dŭt jêng tăng ngăn, hơr lơn nâm bu mpiăt đao bar đah măt.

5. Jâng păng trŭnh rlet ma ntŭk khĭt; nhuat păng hăn tĭng trong bri phan (Ƀon Phung Khĭt)

6. Păng mâu ŭch joi ôh trong sâng hăn ma nau rêh; păng mblêng lĕ hiơt trong jêh, ƀiălah păng mâu hôm gĭt ôh.

7. Pôri aƀaơ, Hơi phung kon buklâu gâp, iăt hom nau gâp; lơi ta chalơi ôh lĕ nau ngơi bơh bâr mbung gâp.

8. Du ngai tă bơh păng, jêh ri lơi hăn prot dăch mpông ngih păng ôh;

9. Klach lah khân ay may ăn nau katang ay may ma phung êng, jêh ri năm ay may gŭ rêh ăn ma nơm tŭn jot.

10. Klach lah phung bunăch sŏk lơi drăp ndơ ay may, jêh ri n'hâm suan ay may pah kan sĭt ma ngih phung bunăch.

11. Tât kêng dăch dŭt ay may mra nter, yorlah puăch jêh ri săk jăn khân păng djoh jêh.

12. Jêh ri ay mâu lah: "Mâm đĭng gâp tâm rmot lơi ma nau bu ntĭm nti, jêh ri nuih n'hâm gâp dun lơi ma nau bu nduyh

13. Mâm gâp mâu tông ôh bâr phung sâm nti ma gâp, mâu lĕ ŭch rkêng tôr iăt nau bunuyh ntĭm gâp?

14. Ta nklang phung ƀon lan jêh ri phung tâm rƀŭn, gâp lĕ dăch roh jêh ŭch tŭp tâm nau tât jêr.

15. Nhêt hom dak bât may jêh ri nhêt dak hoch luh bơh ndrâm ntu may.

16. Di lĕ tu dak may mra hoch padih, jêh ri n'hor dak may hoch rŏ trong sâng?

17. Prăp hom khân păng kanŏng êng ma may nơm, jêh ri mâu di ma phung bunăch ndrel ma may ôh.

18. Ăn tu dak may geh nau ueh uĭn, jêh ri hâk răm hom ndrel ur may nơm geh ntơm bơh druh ndăm.

19. Nâm bu du mlâm junme tâm rŏng, jêh ri du mlâm kon jun me ueh ngăn, pô nây lĕ toh păng ăn mpay ma may ƀaƀơ jêh ri ăn may hâk răm ma nau păng rŏng mro mrăng.

20. Hơi kon, yorlah moh nau khlay may rŏng ma bu ur văng tĭr, jêh ri ut ntang ntơh du huê bu ur blă blơ?

21. Yorlah trong bunuyh hăn gŭ panăp măt Yêhôva, jêh ri păng sek uănh lĕ rngôch trong khân păng.

22. Nau kue phung tih ƀư jêng dăk sân ma păng, nau tih păng nơm mra chăp păng.

23. Păng mra khĭt yor mâu geh nau ntĭm nti, păng mra roh yor nau rluk păng toyh ngăn.