Nau Hôr - Đoạn 31

1. Nau hađăch Y-Lêmuêl ngơi; nau hôr mê̆ păng nti ma păng.

2. Moh nau gâp mra lah ma may, Hơi kon? Moh nau gâp mra lah ma may, Hơi kon buklâu tă bơh ndŭl proch gâp nơm? Moh nau gâp mra lah ma may, Hơi kon, nơm gâp mbơh sơm dăn?

3. Lơi ăn roh dơm ôh n'hâm suan may ma bu ur, mâu lah gŭ ndrel ma phung ƀư rai lơi phung hađăch.

4. Hơi Y-Lêmuêl, Nây jêng nau mâu ueh ôh ăn ma phung hađăch nhêt ndrănh, mâu lĕ ueh ma phung kôranh chiă uănh joi ndrănh,

5. Klach lah tơlah nhêt ndrănh khân păng mra chuêl nau ntĭnh hŏ ntrŭnh jêh. Jêh ri ƀư djơh nau phat dôih ma phung rêh ni.

6. Ăn ndrănh ma phung dăch khĭt jêh, jêh ri ăn hom ndrănh ma phung geh nau rngot ngăn.

7. Ăn khân păng nhêt jêh ri chuêl lơi nau khân păng o ach, jêh ri mâu hôm kah gĭt đŏng ôh ma nau rêh ni khân păng.

8. Hă trôm mbung may sâm ngơi an ma bunuyh mlo, gay ƀư nau di ma phung mâu geh ôh bunuyh kơl.

9. Hă hom trôm mbung may ngơi dôih ma nau sŏng king an nau di ma phung o ach jêh ri ndĭt trơi.

10. Mbu dơi joi gay geh du huê ur khư ăn bu yơk? Păng jêng khlay lơn ma lŭ rsang.

11. Nuih n'hâm sai păng rnơm ma păng, jêh ri păng mâu mra pưt ôh.

12. Du bông rêh, păng leo ăn nau geh jêng ma sai; mâu di nau mhĭk ôh.

13. Păng joi brai rsau biăp jêh ri brai rôt, jêh ri gơih pah kan ma ti.

14. Păng jêng nâm bu du mlâm Kŭmpăn phung tăch drăp, leo ndơ sông sa tă bơh ntŭk ngai.

15. Păng kah rngăl bêch dôl trôk hôm e ngo, jêh ri ăn ndơ sông sa ma phung tâm ngih vâl păng; tâm pă kan ma phung oh mon bu ur păng.

16. Păng uănh n'hêl du lôk mir jêh ri rvăt mir nây; ma prăk tă bơh ti păng ƀư, păng ntơ đang play kriăk ƀâu.

17. Păng rêt rse bŭt ma nau gơih pah kan, jêh ri pah kan ma lĕ n'hâm suan.

18. Păng saơ ndơ păng tăch geh nau hao ueh ngăn, bri măng ngih vâl păng mâu ŭch nhhât ôh ŭnh.

19. Păng ruy brai êng păng nơm jêh ri ti păng vứng tanh bok.

20. Păng ăn ndơ yô̆ kơl ma phung rêh ni, jêh ri păng nta ti păng ăn ndơ ma phung ndĭt trơi.

21. Păng mâu ir klach ôh ma pler dôl nđik srŏ ngăn ƀư ma ngih vâl păng. Yorlah lĕ rngôch khân păng nsoh jêh bok ao răm sur chăng.

22. Păng ƀư âk phôi nah, bok ao păng nsoh ƀư jêh ma mhay rhên jêh ri ma bok sut chăng.

23. Bu gĭt năl sai păng ta mpông pêr ƀon, dơi gŭ ndrel ma phung bu bŭnh bu ranh tâm nklang n'gor bri.

24. Păng ƀư ao đah mhay jêh ri tăch ao nây, păng tăch rse vân bŭt ma nơm tăch drăp.

25. Păng geh nau katang jêh ri nau bu yơk; păng gơm rum lor mâu klach ôh ma nau tât du nar kăndơ̆.

26. Păng hă trôm mbung ngơi nau blau mĭn, jêh ri păng nti ntĭm nau rah rơch.

27. Păng mât njrăng phung tâm ngih vâl păng, jêh ri păng mâu geh nau ƀlao ôh.

28. Phung kon păng dâk jêh ri mbơh nau khân ôbăl kah gĭt tôr ma păng nau ueh lăng, nđâp sai păng tâm ban đŏng tâm rnê ma păng lah:

29. "Geh âk phung kon bu ur ƀư ueh ngăn khư nau bu yơk, ƀiălah ay rlau lơn ma lĕ rngôch khân păng."

30. Nau ray nkrơ̆, jêh ri nau ueh dơi roh; ƀiălah du huê bu ur klach yơk ma Yêhôva mra geh nau tâm rnê.

31. Ăn ma păng nau nkhôm luh tă bơh kan ti păng ƀư, jêh ri ăn kan păng ƀư tâm rnê ma păng ta mpông pêr panăp phung ƀon lan.