Nau Hôr - Đoạn 30

1. Nau Y-Agur kion buklâu Y-Yakê ngơi, nau hôr aơ păng ngơi ma Y-Ithiêl, jêh ri ma Y-Ukal.

2. Nanê̆, gâp rluk lơn ma bunuyh êng, jêh ri gâp mâu geh nau gĭt rbăng nâm bu du huê bunuyh ôh.

3. Gâp mâu hŏ mâp nti ôh nau blau mĭn, mâu lĕ gâp geh nau gĭt rbăng ma Nơm Kloh Ueh.

4. Mbu hŏ hao jêh kalơ trôk jêh nây plơ̆ jŭr tay? Mbu hŏ rgum jêh sial tâm klŏ mpang ti nơm? Mbu hŏ nklâm jêh dak tâm ao nơm? Mbu hŏ ƀư nâp jêh bôl neh ntu? Mbu amoh păng, jêh ri amoh kon buklâu păng? Mbơh ma gâp, tơlah may gĭt?

5. Lĕ nau Brah Ndu Ngơi bu rlong uănh, Brah Ndu jêng khêl ma mbu nơm nde tâm Păng.

6. Lơi dĭng ntop ôh ma nau Păng ngơi, klach lah Păng nduyh may jêh ri may jêng bunuyh ngơi mƀruh ngăn.

7. Gâp geh dăn ma May bar ntil nau, lơi dun ôh ăn nau nây ma gâp, ê lor gâp khĭt.

8. Sŏk rđah ăn ngai đah gâp nau ngơi mƀruh jêh ri ngơi nchơt; lơi ăn gâp jên g o ach, mâu lĕ jêng kuăng ndrŏng, kanŏng ăn ma gâp ndơ sông sa ăn tŏng ăp nar.

9. Klach lah gâp hơm jêh ri dun ma May, jêh ri lah: "Mbu moh Yêhôva?" Mâu lah tơlah ndĭt trơi gâp hăn ntŭng jêh ri gâp ƀư bơ̆ amoh Brah Ndu gâp.

10. Lơi ta ngơi nchơt ôh ma du huê oh mon ta năp kôranh păng, klach lah bu rak rtăp may jêh ri may bu kơp jêng tih.

11. Geh ntil bunuyh rak rtăp ma mbơ̆ khân păng, jêh ri mâu ŭch mŏt ton ôh nau ueh lăng ma mê̆ khân păng;

12. geh phung bunuyh mĭn khân păng jêng kloh, ƀiălah nau ƀơ̆ ƀơch khân păng mâu hŏ rao ôh;

13. geh phung bunuyh măt uănh rnam, Muh măt rnam ngăn.

14. Geh phung bunuyh sêk jêng nâm bu mpiăt đao, găm nâm bu pêih. Khân păng ŭch ƀư rai phung ndĭt trơi ta kalơ neh ntu jêh ri bunuyh rêh ni mâu tŏng ndô ndơ ta nklang kon bunuyh.

15. Plơm geh bar hê kon bu ur, khân păng nter: "Ăn hom, ăn hom." Geh pe ntil ndơ mâu blau mpay ôh, puăn ntil ndơ mâu ŭch ôh lah: "Găp hơi."

16. Ƀon Phung Khĭt, ndŭl bu ur nglên, neh ji hir mro mrăng ma dak, jêh ri ŭnh; khân mâu ŭch ôh lah: "Găp jêh."

17. Măt bunuyh mưch ma mbơ̆ jêh ri dun mâu tông ôh ma bâr mê̆, mra geh nđak tâm rlŭng chôk rloch măt.

18. Geh pe ntil khlay ngăn rlau lơn ma gâp dơi gĭt rbăng; jêh ri puăn ntil nau gâp mâu dơi gĭt rbăng ôh;

19. trong klang mpăr kalơ trôk, trong bêih hung ta kalơ lŭ trong Kŭmpăn nsong ta nklang dak mƀŭt jêh ri trong du huê bu klâu rnglăp ndrel đah du huê bu ur.

20. Aơ jêng nau bu ur văng tĭr ƀư, păng sa jêh ri jut trôm mbung, lah: "Gâp mâu mâp ƀư nau tih ôh."

21. Geh pe ntil ƀư ăn ma neh mpât n'găr jêh ri puăn ntil nau păng mâu dơi dơn ôh:

22. Du huê dĭk tơlah păng jêng nkhơng hađăch, du huê bunuyh rluk hơm jêh ma ndơ sông sa,

23. du huê bu ur bu mâu ŭch ôh nkhơng ma geh sai, jêh ri du huê oh mon bu ur ntrok kôranh bu ur păng:

24. Geh puăn ntil ndơ jê jê̆ ta neh ntu ƀiălah khân păng jêng nkhơng phung blau mĭn ngăn;

25. Ngonh (sam) jêng ntil ndơ mâu geh n'hâm suan katang ôh, ƀiălah khân păng prăp nkrem ndơ sông sa ma khân păng nơm dôl yan ta vai;

26. Rpai jêng mpa mâu geh suan katang ôh, ƀiălah khân păng ƀư rsuăn tâm trôm lŭ;

27. krah mâu geh hađăch ôh, ƀiălah lĕ rngôch nau hăn n'hoch tĭng phung.

28. Bŭl ka bu dơi nhŭp ma ti, ƀiălah păng gŭ tâm ngih hađăch.

29. Geh pe ntil mpa chuat hăn ueh ngăn, geh puăn mpa chuat ma nau rnam ngăn.

30. Yau mŭr jêng mpa katang lơn ma lĕ rngôch, ta nklang lĕ ntil mpô mpa; păng mâu dơi seng ôh đah du mlâm mpa êng.

31. Iăr nkuăng ntoch trôko ueh ngăn đah be. Jêh ri du huê hađăch phung tahan păng gŭ n'hanh păng.

32. Tơlah may geh ƀư nau rluk jêh ri n'hao may nơm, mâu lah tơ lah may mĭn ŭch ƀư nau mhĭk, rdêp trôm bung ma ti may nơm!

33. Yorlah nâm bu vâr dak toh ndrôk ƀư ngi dak toh. Jêh ri pet trôm muh luh du mham; tâm ban pônây đŏng nsônh nau ji nuih mra tât ma nau tâm djrel.